ءوزىم جۋرناليست رەتىندە ءومىرىمنىڭ ۇلكەن بولىگىن ۇكىمەت جۇمىسىن ناسيحاتتاۋعا, ونىڭ جاساپ جاتقان جۇمىستارىن حالىققا جەتكىزۋگە ارناعان ەكەنمىن. ەندى مىنە, مەنىڭ ءومىرىم دە سۋداي جىلجىپ قوڭىر كۇزىمە كەلىپ قالىپتى. اللا بۇيىرتسا, كەلەسى جىلى زەينەتكە شىقپاقپىن.
وسى ماقساتتا وسىدان ءبىر جىلدان استام ۋاقىت بۇرىن سول جاعالاۋدان جايلى پاتەر الۋ ماقساتىندا حالىق اراسىندا سەنىمدىلىگىمەن اتى شىققان قۇرىلىس كومپانياسىنا بارىپ, وزىمە ۇناعان, وتباسىم ءۇشىن دە قولايلى ءبىر پاتەرگە جۇبايىمنىڭ اتىنان جانە ونىڭ قاتىسۋىمەن كەلىسىمشارت جاساستىق.
ارينە, جايلى پاتەردىڭ باعاسى جەڭىل بولمايدى عوي. ءبىزدىڭ جيعان-تەرگەنىمىز ازداپ جەتىڭكىرەمەدى. بىراق كاسىپورىننىڭ بۇل تىعىرىقتان شىعاراتىن جولى بار ەكەن. سول جەتىڭكىرەمەگەن قارجىنى قۇرىلىس ابدەن اياقتالعانعا دەيىن تولەپ تۇرۋعا كومپانيامەن كەلىستىك جانە ەشقانداي ۇستەمە پايىزسىز. قۇرىلىس ءبىر جارىم جىلدىڭ ىشىندە اياقتالىپ, پاتەر كىلتى قولعا تيەتىن بولدى. كەلىسىمشارتتا وسىنىڭ ءبارى جازباشا حاتتالدى.
وسى ارالىقتا ەل ومىرىندە ءبىراز جاعىمدى جاڭالىقتار دا بولدى. سونىڭ ءبىرى − مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ەل ازاماتتارىنا وزدەرىنىڭ زەينەتاقى شوتتارىندا جيناعان قارجىسىنىڭ ءبىر بولىگىن تۇرعىن ءۇي جاعدايىن جاقسارتۋ ءۇشىن پايدالانۋعا جول اشىلۋى. بۇگىنگى كۇنى وسىنىڭ زاڭدى تەتىكتەرىن ۇكىمەت ورگاندارى, ءتيىستى مينيسترلىكتەر ازىرلەپ تە قويدى.
وسى وزگەرىستەر تۋرالى حالىق اراسىندا مينيسترلىكتەر, بىرىڭعاي جيناقتاۋشى زەينەتاقى قورى جانە وسى ءىستى جۇرگىزۋ ءۇشىن ۇكىمەت تاراپىنان ارنايى بەلگىلەنگەن وپەراتور بانك وكىلدەرى ءتۇسىندىرۋ جۇمىستارىن جۇرگىزە باستادى. ولاردىڭ ءباسپاسوز ءماسليحاتتارى مەن بريفينگتەردە ايتقان سوزدەرىن ەستىپ, قۋانعانداردىڭ ءبىرى مەن بولدىم. ويتكەنى ولاردىڭ سوزىنە قاراعاندا, مەن ءوزىمنىڭ زەينەتاقى جيناعىندا جاتقان قارجىمنىڭ شەكتى دەڭگەيدەن ارتىلعان مولشەرىن قۇرىلىس كومپانياسى سالىپ جاتقان پاتەرىمنىڭ جەتپەگەن بولىگىنە جۇمساۋعا ابدەن بولادى ەكەن. مۇنى ءتىپتى وپەراتور بانك باسشىلىعى دا قايتا-قايتا ناقتىلاپ ايتتى. ەگەر زەينەتاقى شوتىڭىزدا باسى ارتىق قارجىڭىز بولسا, ءسىزدىڭ سالىنىپ جاتقان باسپاناڭىز مەيلى بيزنەس ساناتىنداعى ءۇي بولسا دا, ونىڭ وتەۋ مەرزىمى ۇزارتىلعان بولىگىنە (راسسروچكا) دە پايدالانۋعا بولادى دەگەن ءسوز دە ايتىلدى.
قۇدايدىڭ قۇدىرەتى-اي! ونىڭ ۇستىنە, مەنىڭ پاتەردىڭ قالعان اقشاسىن ءبولىپ تولەۋ بويىنشا وتەيتىن قارجى كولەمى زەينەتاقى قورىنان الاتىن ارتىق اقشامنىڭ سوماسىمەن سايكەس كەلە كەتكەنى. بۇل – ماسەلە تولىق شەشىلدى دەگەن ءسوز.
دەگەنمەن ەرتە قۋانعان ەكەنمىن. ەندى تۇرعىن ءۇي جاعدايىم بويىنشا جەكە ماسەلەمدى ناقتى شەشۋ ءۇشىن قۇرىلىس كومپانياسىنىڭ ساتۋ بولىمىنە بارعان كەزىمدە ءبىر كولدەنەڭ دۇنيە الدىمنان شىعا كەلدى. ونداعى جىگىتتەردىڭ ايتۋىنشا, زەينەتاقى قورىنداعى قارجىنى تۇرعىن ءۇي قۇرىلىسىنا كەپىلدىك بەرۋ قورى ماقۇلداعان ۇيلەرگە عانا پايدالانۋعا بولادى ەكەن. كومپانياداعىلار ماعان وسى جونىندەگى يندۋستريا جانە ينفراقۇرىلىمدىق دامۋ مينيسترلىگى ازىرلەگەن ءتيىستى ەرەجەنى كورسەتتى.
«قازىرگى كۇنى ازاماتتار زەينەتاقى قورىنداعى باسى ارتىق قارجىسىن يپوتەكامەن العان پاتەرگە جانە كومفورت كلاستى ۇيلەرگە عانا پايدالانا الادى. ال بيزنەس كلاستى ۇيلەر ازىرگە وعان جاتپايدى. ارينە, ءبىز اتالعان ماسەلەنى شەشۋدى جوعارى جاقتان سۇراپ وتىرمىز. بىراق ازىرشە جاۋاپ جوق. ال نەگىزىندە ءسىز سەكىلدى سۇراقپەن حابارلاسىپ جاتقاندار كوپ» دەپ ءتۇسىندىردى ولار.
بىراق مىناداي سۇراق تۋادى: زەينەتاقى شوتىمدا مەنىڭ باسى ارتىق قارجىم بار ما؟ بار. تۇرعىن ءۇي جاعدايىمدى جاقسارتپاق نيەتىم راس پا؟ راس. پرەزيدەنتتىڭ مەن سەكىلدىلەرگە كومەك جاساعىسى كەلگەنى اقيقات پا؟ اقيقات. ەندەشە, مەن نەگە ءوز جيناعىمدى ءوز جاعدايىم ءۇشىن پايدالانا المايمىن؟
بۇل – كوپ ادامدى تولعاندىرىپ جۇرگەن ماسەلە. سوندىقتان زەينەتاقى قورىنداعى «ارتىق» اقشانى پايدالانۋ ەرەجەلەرى تاعى ءبىر پىسىقتالىپ, كەيبىر ازاماتتاردىڭ ءۇيلى بولۋىنا كەدەرگى بولىپ وتىرعان وسى ءبىر پروبلەما شەشۋىلەدى دەگەن ءۇمىتىمىز بار.
