ايماقتار • 03 ناۋرىز، 2021

قىزىلوردادا ۆاكتسينا ەگۋدىڭ ەكىنشى كەزەڭى باستالادى

قىزىلورداعا كوروناۆيرۋس ينفەكتسياسىنا قارسى ەگىلەتىن 6200 دانا «سپۋتنيك V» دوزاسى كەلدى. ونىڭ 3600-ءى - ءبىرىنشى كومپونەنتتە، 2600-ءى - ەكىنشى كومپونەنتتە ەگىلەدى، دەپ حابارلايدى Egemen.kz

ايىم ءداۋىت

بۇل كەزەڭدە ۆاكتسينا الماعان مەديتسينا قىزمەتكەرلەرىنە، مۇعالىمدەرگە جانە جۇقتىرۋ قاۋپى نەعۇرلىم جوعارى جۇمىس ورىندارىنىڭ قىزمەتكەرلەرىنە سالىنادى.

«بۇدان بۇرىن ەكپە سالدىرعىندار اراسىندا دەنساۋلىعىنا شاعىمدانعان ازاماتتار بولعان جوق. ال 4 ناۋرىزدان ەكپەنىڭ ەكىنشى كەزەڭىن باستاماقپىز. العاشقى كەزەڭدە ۆاكتسيناتسيالاۋ تەك قالاداعى №1، 3، 6 ەمحانالاردا جۇرگىزىلگەن ەدى. ەندى ەكىنشى كەزەڭنەن ول اۋدانداردا جالعاسادى. بۇل رەتتە ەگۋ ناۋقانىن ساپالى وتكىزۋ ءۇشىن اۋدانداعى مەديتسينا قىزمەتكەرلەرى دە دايىندىق كۋرسىنان ءوتىپ، وقىتىلدى»، دەدى وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازيلوۆ.

ايتا كەتەيىك، ۆاكتسينا اۋداندارعا تەمپەراتۋرالىق رەجيمدى قاداعالايتىن ارنايى ماشينامەن جەتكىزىلەدى.

وسى باعىتتا العاشقى مەديتسينالىق-سانيتارلىق كومەك مەكەمەلەرىندە 14 ەگۋ كابينەتى دايىندالعان.

«قازىر حالىقتىڭ ۆاكتسيناتسيالاۋدىڭ قاۋىپسىز ەكەنىنە كوزى جەتتى دەپ ويلايمىن. ءبىر جاعىنان اسقىنۋ، اۋرۋ بەلگىلەرى 1-ءشى، 2-ءشى كومپانەنتتەردە دە بايقالمادى. ۆاكتسينا كەلە سالاسىمەن بارلىق تالاپتارعا سايكەس مۇزداتقىشتارعا ورنالاستىرىلدى. قازىرگى تاڭدا قويمادان قاجەتتى ۆاكتسينا وبلىس ورتالىعىنداعى ەمحانالار مەن اۋداندارعا تاسىمالدانۋدا. بۇل رەتتە ءتيىستى سالا ماماندارىمەن كوميسسيا قۇرىلدى. ياعني، ۆاكتسينانى اۋداندارعا جىبەرگەندە، دوزا ەشقانداي بۇزىلۋسىز جەتسە، قۇرىلعان كوميسسيا مۇشەلەرى قابىلداپ الاتىن بولادى»، دەدى وبلىستىق سانيتاريالىق-ەپيدەميالىق باقىلاۋ دەپارتامەنتى باسشىسى مىندەتىن اتقارۋشى ءاليا ابدىقايىموۆا.

ەسكە سالا كەتەلىك، بۇدان بۇرىن قىزىلوردادا 505 ادام كوروناۆيرۋسقا قارسى ەكىنشى مارتە ۆاكتسينا سالدىردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز