ماڭعىستاۋدا مال شارۋاشىلىعىمەن بىرگە بالىق شارۋاشىلىعىنىڭ دا ماڭىزى زور بولىپ, تالاي جاتاقتىڭ اۋزىنا اس سالىپ, تالاي كوپەستىڭ بايىعان ۇستىنە باي تۇسۋىنە سەپ بولعانى تاريحتان بەلگىلى. تەڭىز بەن بالىقشىلىققا قاتىستى سان الۋان حيكايالار, بالىق شارۋاشىلىعى سالاسىنىڭ قايراتكەر ەڭبەككەرلەرى تۋرالى قىزعىلىقتى اڭگىمەلەر, تەڭىز ايدىنىندا بولعان وقيعالار تۋرالى شەجىرەلى سىرلار – ماڭعىستاۋ وڭىرىندە ۇمىتىلمايتىن ەستەلىكتەردىڭ ءبىرى.
بالىقشىلارعا قويىلاتىن ەسكەرتكىش تە وسى ماقساتتا بولماق.
– بۇل ءبىزدىڭ وتكەن تاريحىمىزدا ەلەۋلى ەڭبەگى سىڭگەن ارداگەرلەرگە دەگەن قۇرمەتتىڭ سيمۆولى بولۋى ءتيىس. وسكەلەڭ ۇرپاقتىڭ جادىندا وتكەن تاريحىمىز جاڭعىرىپ تۇرۋى ءۇشىن اتالعان دەمالىس ورنى مەن ەڭسەلى ەسكەرتكىشتىڭ الار ورنى, اتقارار ءرولى زور, – دەيدى تۇپقاراعان اۋدانىنىڭ اكىمى ايبەك قوسۋاقوۆ. «بالىقشىلار» دەمالىس ورنىندا كىرەبەرىس اركا, سپورتتىق شىنىعۋ الاڭى, بالالار الاڭى, اۆتوتۇراق پەن شاتىرلى ورىندىقتار جانە ەڭسەلى «بالىقشىلار» ەسكەرتكىشى ورناتىلادى. ءمۇسىنشى ب.سالاەۆ تۋىندىسىنىڭ بيىكتىگى – 3,60 مەتر بولسا, تۇعىر بيىكتىگى 2,20 مەتردى قۇرايدى. تاعى ءبىر قۋانىشتىسى – «بالىقشىلار» دەمالىس ورنى بيىل پايدالانۋعا بەرىلەدى.
ءيا, ماڭعىستاۋ بالىقشىلارى قانداي قۇرمەتكە دە لايىق. جاڭالىق جاقسى بولعانىمەن, ەل اراسىندا ەسكەرتكىشتىڭ سۇلباسى تالقىعا ءتۇستى. ءبىرى اۋلاۋعا تىيىم سالىنعان بەكىرەنى ۇستاپ تۇرعان بالىقشىعا شۇيلىكسە, ەكىنشىسى ءبىر شاباق تا قاپپاعان بوس اۋعا ءمىن تاقتى. كەلەسىلەرگە ەكەۋى ەكى جاققا قاراعان بالىقشىلاردىڭ تۇرىسى ۇناماسا, بىرەۋلەر بالىقشىلاردىڭ كيىمىنە سىن ايتتى.
جالپى ەسكەرتكىش ماسەلەسىندە كۇنى بۇگىنگە دەيىن ء«اپ, بارەكەلدى!» دەيتىندەي قوشەمەتكە يە بولىپ كورمەگەن ماڭعىستاۋدا وسىلايشا تاعى ءبىر ەسكەرتكىش بوي كوتەرمەك. بىراق ءاپ دەگەننەن اڭگىمەسى ءمازدى ەمەس...
ماڭعىستاۋ وبلىسى
