تاياۋدا «RG GOLD» كاسىپورنى اۋىل مەكتەبىنە جاڭا اۆتوبۋس سىيلادى. جالعىز وقۋشىلار عانا ەمەس, ولاردىڭ اتا-انالارى ءۇشىن دە جان جادىراتار جومارتتىق اق تۇيەنىڭ قارنى جارىلعانمەن بىردەي ايتۋلى وقيعا بولدى. ويتكەنى, بوران-شاشىنى كوپ, قىراۋ قاباقتى قىستا جاس بالالاردى ونداعان شاقىرىم جەرگە تاسىمالداپ وقىتۋ وڭاي-وسپاق شارۋا ەمەس. بۇرىنعى كونەتوز اۆتوبۋس ابدەن توزىعى جەتكەن, جۇرگەننەن تۇرعانى كوپ كولىك بولاتىن. اۆتوبۋس جاڭارتۋعا قاراجات تا تابىلماي كەلدى. ەندى مىنە ەل بولاشاعىن ويلاعان ىسكەر جاندار جاس تولقىنعا جاناشىرلىق جاساپ وتىر.
–اۋىلدىڭ 11 وقۋشىسى قاتىناپ وقۋشى ەدى, – دەيدى كارامىشەۆ اۋىلدىق وكرۋگىنىڭ اكىمى ساۋلە دانيەۆا, – مات اۋىلىنان شۇباراعاش ورتا مەكتەبىنە التى وقۋشى, سۋۆوروۆكا اۋىلىنان نوۆوبراتسك ورتا مەكتەبىنە بەس وقۋشى تاسىمالداناتىن. كاسىپكەرلەردىڭ قولداۋىمەن شۇباراعاش ورتا مەكتەبىنە سىيلانعان جاڭا «گازەل» وقۋشىلاردىڭ ساباقتان قالماۋىنا, قاۋىپ-قاتەرسىز بولۋىنا سەپتىگىن تيگىزبەك.
مەكتەپ ديرەكتورى يۆان رىبلەردىڭ ايتۋىنا قاراعاندا, جەرگىلىكتى جۇرتشىلىق جاناشىر جانداردىڭ قامقورلىعىنا ءدان رازى. ءسوز اراسىندا اۋدانداعى 18 ەلدى مەكەننەن جالپى ءبىلىم بەرەتىن مەكتەپتەرگە 223 وقۋشىنىڭ تاسىمالداناتىنىن ايتا كەتەلىك.
