ءىس-شاراعا اقپارات جانە قوعامدىق دامۋ ءمينيسترى ا.بالاەۆا, قازاقستان حالقى اسسامبلەياسى توراعاسىنىڭ ورىنباسارلارى ز.كۋزيەۆ پەن م.بەكباەۆا, قازاقستان حالقى اسسامبلەياسىنان سايلانعان پارلامەنت ءماجىلىسىنىڭ دەپۋتاتتارى, نۇر-سۇلتان, الماتى, شىمكەنت قالالارى مەن وبلىستار اكىمدەرىنىڭ ورىنباسارلارى, قحا مۇشەلەرى, ەتنومادەني بىرلەستىكتەر مەن جاستار قاناتىنىڭ وكىلدەرى جانە ت.ب. قاتىستى.
دوڭگەلەك ۇستەل بارىسىندا قاتىسۋشىلار تاۋەلسىزدىكتىڭ 30 جىلدىعى مەن تۇڭعىش پرەزيدەنت – ەلباسى بەلگىلەگەن العىس ايتۋ كۇنىنىڭ 5 جىلدىعىنىڭ بىرىكتىرۋشى ماڭىزىن, قازاقستاندىق قۇندىلىقتار – ۇلتتىق بىرلىك پەن كەلىسىمدى, قوعامدىق ىنتىماقتاستىق پەن ءوزارا قولداۋدى, دوستىق داستۇرلەرىن جاڭا ۇرپاققا جەتكىزۋدى بەينەلەيتىنىن ءسوز ەتتى.
ءىس-شارانى اشقان مەملەكەتتىك حاتشى بيىل تاۋەلسىزدىگىمىزدىڭ 30 جىلدىعىن اتاپ وتە وتىرىپ, العىس ايتۋ كۇنىن ەرەكشە ماعىناعا بولەيتىنىمىزدى باسا ايتتى. ء«بىز تاۋەلسىز قازاقستاننىڭ قۇرىلۋى مەن دامۋىنىڭ باستاۋىندا بولعان ادامدارعا ۇلكەن العىسىمىزدى بىلدىرگىمىز كەلەدى. ەڭ الدىمەن, ءبىز اتا-بابالارىمىزدىڭ ازاتتىق پەن ەگەمەندىك تۋرالى عاسىرلار بويعى ارمانىن جۇزەگە اسىرعانى ءۇشىن تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆقا تەرەڭ العىسىمىزدى ءبىلدىرۋىمىز كەرەك», دەدى.
ق.كوشەرباەۆ زاماناۋي سىن-قاتەرلەرگە بەيىمدەلگەن ساپالى جاڭا ۇلتتىق بىرەگەيلىكتى قالىپتاستىرۋدىڭ قازىرگى زامانعى جاعدايىندا ەل پرەزيدەنتى قاسىم-جومارت توقاەۆتىڭ ساياسي جانە ەكونوميكالىق رەفورمالارمەن قاتار قوعامدىق سانانى جاڭعىرتۋعا ۇلكەن كوڭىل ءبولىپ وتىرعانىن اتاپ ءوتتى.
مەملەكەتتىك حاتشىنىڭ ايتۋىنشا, مىسالى ءبىزدىڭ قوعامدى رۋحاني جاڭعىرتۋدىڭ ماڭىزدى باعىتى ساياسي قۋعىن-سۇرگىن قۇرباندارىن تولىق اقتاۋ جونىندەگى اۋقىمدى جۇمىستاردى اياقتاۋ بولۋى كەرەك. «توتاليتاريزمنەن زارداپ شەككەن كوپتەگەن حالىق ءۇشىن قازاق جەرى ناعىز باسپاناعا اينالدى. تاريحي ادىلەتتىلىكتى قالپىنا كەلتىرۋ, ادىلەتسىز سوتتالعانداردىڭ ادال ەسىمىن قايتارۋ – مىنە, ءبىز وزىمىزگە ريزاشىلىق بىلدىرەتىن ۇرپاقتاردىڭ جادىندا وسىنى قالدىرۋىمىز كەرەك. بۇل سونداي-اق اشارشىلىقتىڭ قايعىلى سالدارىنا, «الاش» قوزعالىسىنىڭ جەتەكشىلەرىن جويۋعا, كوپتەگەن شىنايى پاتريوتتىڭ تاعدىرىنا, حالقىمىزدىڭ تاريحىن بۇرمالاۋ ارەكەتتەرىنە دە قاتىستى», دەدى ول.
ءسوز سوڭىندا مەملەكەتتىك حاتشى قازاقستاندىقتارعا ارقايسىنىڭ يگىلىگى مەن ەلىمىزدىڭ وركەندەۋى جولىنداعى كۇندەلىكتى ەڭبەكتەرى ءۇشىن العىس ءبىلدىردى.
سونداي-اق «تۇڭعىش پرەزيدەنت جولىمەن – بەيبىتشىلىك پەن كەلىسىمگە 30 جىل» حالىق ەكسپەديتسياسى» قحا جوباسىنىڭ جانە «قايىرىمدىلىق كەرۋەنى: 30 يگى ءىس» قايىرىمدىلىق مارافونىنىڭ تۇساۋكەسەرى ءوتىپ, ءتۇرلى سالا مەن ازاماتتىق قوعام, ەتنومادەني بىرلەستىكتەردىڭ وكىلدەرى مەن ستۋدەنتتەر ءسوز سويلەدى.
* * *
رەسپۋبليكا پرەزيدەنتىنىڭ 2016 جىلعى 14 قاڭتارداعى №173 جارلىعىمەن قازاقستاندا العىس ايتۋ كۇنى بەلگىلەندى.
تۇڭعىش پرەزيدەنت – ەلباسى نۇرسۇلتان نازارباەۆ قازاقستان حالقى اسسامبلەياسىنىڭ XXII سەسسياسىندا «قازىرگى قازاقستاندى مەكەندەگەن ەتنوستىق توپتاردىڭ ورتاق تاريحي تاعدىرى حالىقتىڭ دىلىندە, ونىڭ ومىرلىك كوزقاراستارى مەن ۇمتىلىستارىندا جاعىمدى كورىنىس تاۋىپ, بارلىق ەتنوسقا ورتاق قۇندىلىقتار مەن يدەالداردى قالىپتاستىرعانىن» اتاپ ءوتتى.
كوپ ەتنوستى قازاقستان حالقىنىڭ قالىپتاسۋ تاريحىن اشا وتىرىپ, ەلباسى العىس ايتۋ كۇنى تۋرالى: «قازاقستان حالقى اسسامبلەياسى قۇرىلعان كۇن –
1 ناۋرىزدى جىل سايىن بارلىق ەتنوستىڭ ءبىر-بىرىنە مەيىرباندىق تانىتىپ, ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا گورى جاقىنداستىرا تۇسپەك. بۇل كۇن مەيىرىمدىلىكتىڭ, بۇكىل قازاقستاندىقتىڭ ءبىر-بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى», دەگەن ۇسىنىس جاساعان بولاتىن.
