قازاقستان • 01 ناۋرىز، 2021

ومىربەك جولداسبەكوۆتىڭ 90 جىلدىق مەرەيتويى تويلاندى

69 رەت كورسەتىلدى

ءال-فارابي اتىنداعى قازاق ۇلتتىق ۋنيۆەرسيتەتى وقۋ ورنى تاريحىندا ەلەۋلى ءىز قالدىرعان، قازىرگى قازۇۋ قالاشىعىن سالۋعا تىكەلەي ىقپال ەتكەن ازامات، تەحنيكا عىلىمدارىنىڭ دوكتورى، پروفەسسور ومىربەك جولداسبەكوۆتىڭ 90 جىلدىق مەرەيتويىن اتاپ ءوتىپ جاتىر.

العىس ايتۋ مەرەكەسىمەن تۇسپا-تۇس كەلگەن ايتۋلى شارا ستۋدەنتتەر سارايى الدىنداعى جولداسبەكوۆ ەسكەرتكىشىنە گۇل شوقتارىن قويىپ، تاعزىم ەتۋمەن باستالدى.

– ول ەلدەگى جوعارى ءبىلىمنىڭ دامۋىنا ۇلكەن ەڭبەك ءسىڭىردى. ستۋدەنتتەر دايارلاناتىن عىلىمي باعىت پەن ماماندىقتار ونىڭ اتىمەن تىكەلەي بايلانىستى. ونىڭ باسشىلىعىمەن لابوراتوريا، كافەدرا، عىلىمي ورتالىقتار جانە قازاقستان ۇلتتىق ينجەنەرلىك اكادەمياسى قۇرىلدى. تىكەلەي باسشىلىق ەتۋىمەن ەلىمىزدەگى ستۋدەنتتىك شاقتىڭ سيمۆولىنا، عىلىم مەن ءبىلىمنىڭ اينىماس بەلگىسىنە اينالعان قازۇۋ قالاشىعى بوي كوتەردى، – دەدى قۇتتىقتاۋ سوزىندە ۋنيۆەرسيتەت رەكتورى جانسەيىت تۇيمەباەۆ.  

مەرەيتوي ءارى قاراي ارنايى جيىن ارقىلى جالعاسىن تاپتى. جيىندى اشقان ۋنيۆەرسيتەت رەكتورى 90 جىلدىقتىڭ تاۋەلسىزدىكتىڭ 30 جىلدىعىمەن، ەلىمىزدەگى العىس ايتۋ كۇنىمەن قاتار كەلگەنىن دە جاقسى ىرىمعا بالايتىنىن ايتتى. سەناتور باقىتجان جۇماعۇلوۆ مەرەيتوي يەسىنىڭ عىلىمعا جاساعان قامقورلىعىنا باسا نازار اۋداردى.

– كەزىندە عىلىمنىڭ بارلىعى ۇلتتىق عىلىم اكادەمياسىندا ورىندالاتىن. ال جوو-لار تەك وقىتۋمەن اينالىستى. ول كىسى كەلە سالا مىقتى جاستاردى تاڭداپ، ماسكەۋ، كيەۆ، سانكت-پەتەربۋرگ قالالارىنا جىبەرىپ، تاربيەلەۋگە كىرىستى. ءار سالانىڭ عىلىمىن كوتەرۋگە بار كۇشىن سالدى. باتىس ەۋروپادا، اقش-تا عىلىمنىڭ ءبارى ۋنيۆەرسيتەتتە داميدى. ومىربەك ارىسلان ۇلى سول ءۇردىستى بىزگە الىپ كەلدى. قازىر مينيسترلىك تە ۋنيۆەرسيتەت قابىرعاسىندا عىلىمدى وركەندەتۋگە قاتىستى جۇمىستار جۇرگىزىپ جاتىر. بۇل دا سول كەزدە-اق سالىپ كەتكەن ومىربەك اعامىزدىڭ جولى دەپ ويلايمىن، – دەدى باقىتجان جۇماعۇلوۆ.

ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ كورنەكتى عالىمنىڭ شاكىرتى بولعانىن ماقتانا بايانداپ، ونىڭ تۇلعاسىنا توقتالدى.

– تالاپكەر كەزىمدە ول كىسىنىڭ الدىندا ەمتيحان تاپسىرعانمىن. كەيىن 1-كۋرستا بىزگە جوعارى ماتەماتيكادان ءدارىس وقىدى. ومەكەڭدى ستۋدەنتتەر وتە جاقسى كورەتىن. ويتكەنى ول ستۋدەنتتەرگە اركەز جىلى كوزقاراسپەن قارايدى. جاردەم سۇراعان شاكىرتىنە ايانباي كومەگىن بەرەدى. قاراپايىمدىلىعى دا ونى جاقىنداتىپ تۇراتىن. كەيىن ماسكەۋدە اسپيرانتۋرانى ءبىتىرىپ كەلگەننەن كەيىن ول كىسىنىڭ قابىلداۋىنا كىرىپ، كەزىندە الدىندا ەمتيحان تاپسىرعانىمدى، شاكىرتى بولعانىمدى ايتىپ، العىسىمدى جەتكىزدىم. سونشالىقتى تىعىز قارىم-قاتىناستا بولعان جوقپىز. مەن شىمكەنت، قاراعاندى قالالارىندا جۇمىس ىستەدىم. ول كىسى الماتىدا. بىراق قايدا جۇرسەك تە ول كىسىدەن ءبىلىم العانىمىزدى ماقتانىش ەتتىك، – دەيدى عالىم.

سونداي-اق جيىن بارىسىندا رەكتور ەلىمىزدىڭ جوو-لارى اراسىندا وتكىزىلەتىن روبوتوتەحنيكادان «ROBOKON-2021» چەمپيوناتىندا باق سىنايتىن مەحانيكا كافەدراسىنداعى «MECHANICS» كومانداسىنا ومىربەك جولداسبەكوۆتىڭ 90 جىلدىق مەرەيتويىنا وراي ارناۋلى ستيپەنديا تاعايىندالعانىن دا جاريالادى. ستيپەنديا يەلەرىن قۇتتىقتاپ، ولاردىڭ ەڭبەكتەرىنە جەمىس تىلەدى. 

ومىربەك جولداسبەكوۆ 1931 جىلى قازىرگى تۇركىستان وبلىسىندا ومىرگە كەلگەن. سانالى عۇمىرىن عىلىم مەن ءبىلىمنىڭ وركەن جايۋىنا ارناعان جان 1970-1986 جىلدارى قازۇۋ رەكتورى بولىپ قىزمەت ەتتى.  

 

 

 

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار