مينيسترلىكتىڭ كەڭەيتىلگەن القا وتىرىسىندا مارات شورانوۆ مەديتسينالىق-سانيتارلىق العاشقى كومەك كورسەتەتىن دەنساۋلىق ساقتاۋ ۇيىمدارىنا بارعاندار سانى ءبىر تۇرعىنعا شاققاندا 4,9 قۇراعانىن اتاپ ءوتتى. جوسپار – 4,33 بولعان. ياعني قاجەتتى كورسەتكىشكە قول جەتكىزىلدى. الايدا, 5 ءوڭىر اتاپ ايتقاندا, اتىراۋ, سولتۇستىك قازاقستان, اقمولا, باتىس قازاقستان, ماڭعىستاۋ وبلىستارى نىسانالى مانگە جەتپەدى.
«وڭىرلەردە اكىمدىكتەر امبۋلاتوريالىق-ەمحانالىق ۇيىمداردا مەديتسينالىق كومەكتىڭ قولجەتىمدىلىگىن ارتتىرۋ بويىنشا ءىس-شارالار قابىلداۋى قاجەت», دەدى ءبىرىنشى ۆيتسە-مينيستر.
ونىڭ دەرەگىنشە, دەنساۋلىق ساقتاۋداعى جەكە ينۆەستيتسيالاردىڭ ۇلەسى 40,3 پايىزدى قۇرادى. مەديتسينا ۇيىمدارىنىڭ مەديتسينالىق تەحنيكامەن جاراقتاندىرىلۋى 77 پايىز بولسا, مەديتسينا ۇيىمدارى عيماراتتارىنىڭ توزۋ دەڭگەيى 58,2 پايىزعا جەتىپ وتىر.
«كەمشىلىكتەر دەنساۋلىق ساقتاۋ نىساندارىن كۇردەلى جوندەۋگە, سالۋعا جانە قايتا قۇرۋعا بۇرىن جوسپارلانعان قاراجاتتى كورونوۆيرۋس ينفەكتسياسىمەن جانە ونىڭ سالدارىمەن كۇرەسۋگە باعىتتاۋمەن بايلانىستى», دەپ ءتۇسىندىردى ول.
ءبىرىنشى ۆيتسە-ءمينيستردىڭ ايتۋىنشا, وڭىرلەردە مەديتسينالىق كومەكتىڭ قولجەتىمدىلىگىن ارتتىرۋ ءۇشىن اۋىلدىق ەلدى مەكەندەردە 137 فەلدشەرلىك-اكۋشەرلىك, مەديتسينالىق پۋنكتتەر مەن دارىگەرلىك امبۋلاتوريالار اشۋ جوسپارلانعان. 2021 جىلى ءمجا اياسىندا سالىناتىن 20 اۋرۋحانانىڭ 8-ءى مەن نۇر-سۇلتان جانە الماتى قالالارىندا 2 ءىرى مەديتسينالىق زەرتتەۋ ورتالىقتارىنىڭ قۇرىلىسىن باستاۋ كوزدەلگەن.
