قازاقستان حالقى بيىل التىنشى جىل قاتارىنان العىس ايتۋ كۇنىن اتاپ وتەدى. تاعدىردىڭ تالكەگىمەن ەلىمىزگە قونىس اۋدارعان ءتۇرلى ەتنوس وكىلدەرىن قازاق حالقى قۇشاق جايا قارسى الىپ, اۋىرتپالىق اتاۋلىنى بىرگە كوتەردى. بۇل كۇن - قيىن-قىستاۋ كەزەڭدەردە قۋانىش-قايعىنى ءبولىسىپ, پانا بولا بىلگەن قازاق حالقىنا وزگە ۇلت وكىلدەرىنىڭ العىس ايتاتىن كۇنى.
2016 جىلى 14 قاڭتاردا قر تۇڭعىش پرەزيدەنتى - ەلباسى نۇرسۇلتان نازارباەۆ 1 ناۋرىز - العىس ايتۋ كۇنى دەپ جاريالانعانى تۋرالى جارلىققا قول قويدى. ءدال وسى 1 ناۋرىز كۇنى ەلىمىزدە قازاقستان حالقى اسسسامبلەياسى قۇرىلعان بولاتىن. مەملەكەت باسشىسى نۇرسۇلتان نازارباەۆ 2015 جىلدىڭ 22 ساۋىرىندە اسسامبلەيانىڭ XXII سەسسياسىندا العىس ايتۋ كۇنىن بەلگىلەۋگە نە تۇرتكى بولعانىن ايتقان بولاتىن.
«ولاردى پويىز ۆاگوندارىنان جاپان دالاعا ءتۇسىرىپ كەتتى. ول كەزدەرى مۇندا تەك قازاقتار ءومىر ءسۇردى. سوندىقتان ولار قابىل الىپ, كومەك كورسەتتى. قيىن ۋاقىتتاردى باستان وتكەرىپ جۇرگەن قازاق وتباسىلارى بالشىق ۇيلەرىنە كىرگىزىپ, قابىلدادى. ءبىزدىڭ جانۇيامىز دا ءۇش بالاسى بار ەرلى-زايىپتىنى قابىلدادى. قازاقستان حالقى اسسامبلەياسىنىڭ قۇرىلعان كۇنىن - 1 ناۋرىزدى جىل سايىن بارلىق ەتنوستاردىڭ ءبىر-بىرىنە مەيىرىمدىلىك كورسەتەتىن, ءتۇرلى حالىقتاردى تۋعانىنداي قابىلداعان قازاقتارعا العىس ايتۋ كۇنى دەپ اتاپ وتكەن دۇرىس بولار ەدى. بۇل ءبىزدى ودان ءارى جاقىنداستىرار ەدى. بۇل كۇن بارلىق قازاقستاندىقتاردىڭ ءبىر-بىرىنە مەيىرىم, دوستاستىق جانە ماحاببات تانىتۋ مەرەكەسى بولا الادى», دەدى نۇرسۇلتان نازارباەۆ.
