قوعام • 27 اقپان، 2021

ازاماتتىق ۇيىمدار جەكە باستىڭ ەمەس، قوعام يگىلىگى ءۇشىن قىزمەت ەتەدى - ايدا بالاەۆا

19 رەت كورسەتىلدى

بۇگىن اقپارات جانە قوعامدىق دامۋ ءمينيسترى ايدا بالاەۆا ۇكىمەتتىك ەمەس ۇيىم وكىلدەرىمەن كەزدەستى. ءىس-شارا جىل سايىن 27 اقپاندا اتاپ وتىلەتىن دۇنيەجۇزىلىك ۇكىمەتتىك ەمەس ۇيىمدار كۇنى اياسىندا ءوتتى

كەزدەسۋگە پارلامەنت ءماجىلىسىنىڭ دەپۋتاتتارى ەرلان سايروۆ، ۆەرا كيم، قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەلەرى راحىم وشاقباەۆ، مارات ءباشىموۆ، بەلگىلى قوعام قايراتكەرلەرى ايگۇل سولوۆەۆا، بانۋ نۇرعازيەۆا، تىلەۋبەك مۇقاشەۆ، ەمين اسكەروۆ، نۇرگۇل ۇلجەكوۆا، قۇرالاي تۇسپەكوۆا جانە ليما دياس قاتىستى.

ايدا بالاەۆا ءوزىنىڭ قۇتتىقتاۋ سوزىندە قازىرگى حالىقارالىق ۇەۇ كۇنى قازاقستان تاۋەلسىزدىگىنىڭ 30 جىلدىعى اياسىندا ءوتىپ جاتقانىن جانە ەرەكشە مانگە يە ەكەنىن جەتكىزدى. ول ءوز ەلىنىڭ ازاماتى بولۋ – بۇل ۇكىمەتتىك ەمەس ۇيىم جەتەكشىلەرى دە جان-جاقتى تۇسىنەتىن جاۋاپكەرشىلىك ەكەنىن اتاپ ءوتتى.

«وسىندا وتىرعان ءاربىرىڭىز وتار ەلدەن ازات ەل بولۋىمىزعا وزدەرىڭىزدىڭ ۇلكەن ازاماتتىق ۇلەستەرىڭىزدى قوستىڭىزدار. بۇگىن دە ايانباي اتسالىسىپ كەلەسىزدەر»، - دەدى مينيستر.

ايدا بالاەۆا تاۋەلسىزدىكتىڭ العاشقى جىلدارى ۇكىمەتتىك ەمەس ۇيىمدار سەمەي يادرولىق پوليگونىن جابۋ (نەۆادا-سەمەي)، كىشى ارالدى قالپىنا كەلتىرۋ (ارالدى قۇتقارۋ قورى)، انا مەن بالانى قورعاۋ («بوبەك» قورى) سياقتى جاھاندىق مىندەتتەردىڭ باستاۋىندا تۇرعانىن ەسكە سالدى.

«جالپى، قوعامدىق ۇيىم قۇرۋدىڭ ءوزى – ادامي ەرىكتىلىكتەن، ازاماتتىق بەلسەندىلىكتەن باستاۋ الادى. ازاماتتىق ۇيىمدار – جەكە باستىڭ پايداسى ءۇشىن ەمەس، مەملەكەت مۇددەسى، قوعامنىڭ يگىلىگى ءۇشىن قىزمەت ەتەدى.

مەملەكەتتىڭ بارلىق ماسەلەنى تۇگەل قامتىپ قاراۋى مۇمكىن ەمەس. بۇل ورايدا، وسى ولقىلىقتىڭ ورنىن تولتىراتىن بىردەن ءبىر كۇش ول ارينە – ۇكىمەتتىك ەمەس ۇيىمدار»، دەدى ۆەدومستۆو باسشىسى.

سونىمەن قاتار، مينيستر كەزدەسۋ حالىقارالىق ۇەۇ كۇنىن اتاپ ءوتۋ ءۇشىن عانا ەمەس، ۇكىمەتتىك ەمەس سەكتوردى دامىتۋدىڭ ماڭىزدى ماسەلەلەرى بويىنشا وزەكتى تاقىرىپتاردى تالقىلاۋ، تۇششىمدى وي-پىكىرلەردى ورتاعا سالۋ ءۇشىن ءوتىپ جاتقانىن اتاپ ءوتتى.

كەزدەسۋگە قاتىسۋشىلار پىكىرتالاسقا بەلسەندى قاتىسىپ، مەملەكەت پەن ازاماتتىق قوعام ينستيتۋتتارىنىڭ ءوزارا ىقپالداستىعىنىڭ ماڭىزدىلىعىن اتاپ ءوتتى.

دۇنيەجۇزىلىك ۇەۇ كۇنى – بۇل ەركىندىككە، قوعامدىق داۋىسقا، ادامداردىڭ قاۋىپسىزدىگىنە، تابيعاتقا، ادامزاتتىڭ مادەني مۇراسىنا، ادامزاتتىڭ بولاشاعىنا قامقورلىق جاساۋعا باعىتتالعان جاھاندىق قۇندىلىقتاردى، ۇەۇ ۇمتىلىسى مەن ناتيجەلەرىن كورسەتەتىن حالىقارالىق سيمۆول.

سوڭعى جاڭالىقتار

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

سۇيىسپەنشىلىك ساباعى

ايماقتار • كەشە

ۇقساس جاڭالىقتار