ايماقتار • 25 اقپان، 2021

تارازدا تانىمال تۇلەكتەردىڭ كەزدەسۋى ءوتتى

200 رەت كورسەتىلدى

بۇگىن تاراز يننوۆاتسيالىق-گۋمانيتارلىق ۋنيۆەرسيتەتىندە اۋليەاتا وڭىرىنەن شىققان ازاماتتارمەن "جومارت تۇلەك-2021" اتتى كەزدەسۋ ءوتتى، دەپ حابارلايدى Egemen.kz.

اتالعان كەزدەسۋ جامبىل وڭىرىنەن شىعىپ، بۇگىندە ەلىمىزدىڭ ءار سالاسىندا جەتىستىككە جەتكەن تۇلعالاردىڭ ءومىر جولىن جاستارعا ناسيحاتتاۋ، ءوڭىر تۋمالارىن تۋعان ولكەسىنىڭ الەۋمەتتىك ماسەلەلەرىن شەشۋ بويىنشا شارالار قابىلداۋعا تارتۋ ماقساتىندا ۇيىمداستىرىلدى. كەزدەسۋدە قاتىسۋشىلارعا "تاۋەلسىزدىك جىلناماسى" اتتى بەينەفيلم كورسەتىلدى. فيلم 1991 جامبىل وبلىسىندا ءار بەس جىلدىقتا اتقارىلعان جۇمىستارعا، ءوڭىردىڭ الەۋمەتتىك-ەكونوميكالىق دامۋ كورسەتكىشتەرىنە ارنالدى.

"جومارت تۇلەك-2021" كەزدەسۋىن جامبىل وبلىسىنىڭ اكىمى بەردىبەك ساپارباەۆ ءسوز سويلەپ اشىپ، جۇرگىزىپ وتىردى. اكىم ءوز سوزىندە اتالعان جيىننىڭ ماڭىزدىلىعىنا توقتالدى. سونداي-اق، تاۋەلسىزدىكتىڭ 30 جىلدىعىنا وراي ىسكە اساتىن 30 يگى ءىس تۋرالى ايتىپ ءوتتى. اۋەلى قازاقستان رەسپۋبليكاسى تۇڭعىش پرەزيدەنتى كەڭسەسىنىڭ باسشىسى ماحمۋت قاسىمبەكوۆ ءسوز الىپ، ەلباسى نۇرسۇلتان نازارباەۆتىڭ قۇتتىقتاۋ حاتىن جەتكىزدى. سونداي-اق، جامبىل وڭىرىندە بۇگىندە اتقارىلىپ جاتقان جۇمىستارعا توقتالىپ، ءوزى ءبىلىم العان شۋ اۋدانىنداعى س.سەيفۋللين اتىنداعى مەكتەپكە قولداۋ كورسەتىپ كەلە جاتقانىن ايتتى. سونىمەن قاتار، جيىندا قازاقستاننىڭ ەڭبەك ەرى ءاسانالى ءاشىموۆ، مەملەكەت جانە قوعام قايراتكەرى ومىربەك بايگەلدى، قازاقستاننىڭ ەڭبەك ەرى اياگۇل ميرازوۆا، قازاقستان رەسپۋبليكاسى پارلامەنتى ءماجىلىسى توراعاسىنىڭ ورىنباسارى گۇلميرا يسىمباەۆا، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاكير بالىقباەۆ، حالىق قاھارمانى باقىتجان ەرتاەۆ، مەملەكەتتىك سىيلىقتىڭ لاۋرەاتى التىنبەك قورازباەۆ جانە وزگە دە تانىمال جامبىلدىقتار ءسوز الىپ، ءاردايىم اۋليەاتا جەرىنىڭ دامۋىنا، وركەندەۋىنە تىلەكتەستىگىن ءبىلدىردى. قازاقستاننىڭ ەڭبەك سىڭىرگەن قايراتكەرى، اقىن مارالتاي رايىمبەك ۇلى "كونە تاراز" اتتى ولەڭىن وقىدى.

ەلىمىز تاۋەلسىزدىك العان جىلداردان بەرى جامبىل وبلىسىنداعى مەكتەپتەردى 400 مىڭنان استام تۇلەك بىتىرگەن. تۇلەكتەر سوڭعى بەس جىلدا وڭىردەگى ءبىلىم مەكەمەلەرىنە 2 ميلليارد تەڭگەگە جۋىق كومەك كورسەتكەن. اتالعان جيىن ەلىمىزدىڭ ءار قيىرىندا ەڭبەك ەتىپ جۇرگەن تۇلعالاردى عانا ەمەس، شەت ەلدەردە ءومىر ءسۇرىپ جاتقان ازاماتتاردى دا قامتىدى. كەزدەسۋ سوڭىندا تانىمال تۇلەكتەرگە "جومارت تۇلەك-2021" سىيلىعى تابىستالدى.

سوڭعى جاڭالىقتار

بىرلىگى جاراسقان ەلمىز

پىكىر • بۇگىن، 08:10

قازاق كىتابىنىڭ كۇنى قاجەت

قوعام • بۇگىن، 07:57

«بولاشاقتىڭ» عالىمدارى

عىلىم • بۇگىن، 07:42

ارىنعازى

رۋحانيات • بۇگىن، 07:32

ەلداناعا ەل ريزا

سپورت • كەشە

جۇمەكەننىڭ «بالاۋساسى»

رۋحانيات • كەشە

ۇقساس جاڭالىقتار