سوڭعى تاۋلىكتە وڭىردە 67 ادام قار قۇرساۋىنان قۇتقارىلدى. ونىڭ ىشىندە 7 بالا بار. رەسپۋبليكالىق جانە وبلىستىق ماڭىزداعى جولداردىڭ بارلىق ۋچاسكەلەرىندە قوزعالىس توقتاتىلىپ, الدىن الا ەسكەرتۋ جاسالعانىمەن, جولعا شىعىپ, قار قۇرساۋىنان ءتۇسىپ, وزدەرى دە, قۇتقارۋشىلار دا بەينەتكە باتۋدا. قۇتقارۋشىلار جەرگىلىكتى اتقارۋشى ورگاندارمەن جانە پوليتسيا قىزمەتكەرلەرىمەن بىرلەسىپ جولاۋشىلاردى قۇتقارۋ جۇمىسىن جۇرگىزدى. تياناقتى جۇمىستىڭ ناتيجەسىندە جولدا قالعان جەتپىسكە جۋىق جولاۋشى قاۋىپسىز ورىندارعا جەتكىزىلدى.
وقىس وقيعالاردىڭ كوبىرەك ورىن العان جەرى بۋراباي اۋدانىنداعى ششۋچە قالاسىنىڭ ماڭى. ات قۇلاعى كورىنبەيتىن الاپات بوران سوعىپ تۇرسا دا جولعا شىعىپ, كولىكتەرى قاسات قارعا كەپتەلىپ, توڭىپ-جاۋراعان جولاۋشىلار جىلىتۋ پۋنكتەرىنە ورنالاستىرىلدى. ششۋچە-كوكشەتاۋ باعىتىنداعى جول ۇستىندە قالعان 65 جەڭىل اۆتوكولىك قاردان ارشىلىپ الىندى. شالعايداعى جاقسى اۋدانىنىڭ پودگورنوە اۋىلى ماڭىندا جۇكتى ايەلدى قۇتقارۋشىلار جاقسى اۋىلىنداعى اۋرۋحاناعا جەتكىزدى.
ونىڭ الدىندا عانا كوكشەتاۋ-زەرەندى باعىتىندا قاتتى بوراننىڭ سالدارىنان ەكى كولىك ءبىر-بىرىمەن سوعىسىپ, ەكى جولاۋشى وپات بولدى, تورتەۋى دەنە جاراقاتىن الدى. توتەنشە جاعدايلار دەپارتامەنتىنىڭ قىزمەتكەرلەرى بوران-شاشىندا جولعا شىقپاۋ كەرەك ەكەندىگىن قايتا-قايتا ەسكەرتىپ جاتىر. ەسكەرتۋدى ەلەي بەرمەيتىنىمىز جامان.
