ايماقتار • 24 اقپان، 2021

الماتى وبلىسىندا زاڭسىز بالىق اۋلاعان ەكى ادام ۇستالدى

الماتى وبلىسىندا زاڭسىز بالىق اۋلاعان ەكى تۇرعىن ۇستالدى، دەپ حابارلايدى Egemen.kz Polisia.kz سايتىنا سىلتەمە جاساپ.

ۇيعىر اۋدانى جەرگىلىكتى پوليتسيا قىزمەتىنىڭ وكىلدەرى تابيعاتتى قورعاۋ زاڭناماسى تالاپتارىنىڭ ساقتالۋىن قاداعالاۋ بويىنشا جۇرگىزگەن ارنايى شارا بارىسىندا ىلە وزەنىندە زاڭسىز بالىق اۋلاپ جۇرگەن ەكى ادامدى ۇستادى. ۇرمەلى قايىققا مىنگەن براكونەرلەردەن 66 كەلى بالىق تاركىلەندى.

تەكسەرۋ بارىسىندا بالىق اۋلاۋشىلاردىڭ زاڭمەن تىيىم سالىنعان اۋدى پايدالانعانى اشكەرەلەنگەن. ولاردىڭ قايىعىنان اق امۋر، ءدوڭماڭداي، اق مارقا، تابان بالىقتارى تابىلىپ، تاركىلەندى. قازىرگى تاڭدا تابيعات قورعاۋشىلار مەملەكەتكە كەلتىرىلگەن ماتەريالدىق شىعىندى ەسەپتەۋدە.

– اتالعان دەرەك بويىنشا قر قىلمىستىق كودەكسىنىڭ 335-بابىنىڭ 3-بولىگىمەن (بالىق رەسۋرستارىن، باسقا دا سۋ جانۋارلارىن نەمەسە وسiمدiكتەرىن زاڭسىز الۋ) قىلمىستىق ءىس قوزعالدى. ۇرمەلى قايىق، پلاستيكالىق اۋ مەن بالىقتار تاركىلەندى. كەتپەن اۋىلىنىڭ ەكى تۇرعىنى مەكەنجايىن وزگەرتپەۋ تۋرالى مىندەتتەمەمەن بوساتىلدى. تەرگەۋ قۇپيالىعىنا بايلانىستى وزگە اقپارات تاراتىلمايدى، – دەدى ۇيعىر اۋدانىنىڭ پب تابيعاتتى قورعاۋ پوليتسياسى توبىنىڭ ينسپەكتورى سايات داركەنباەۆ.

الدىن الا تەرگەۋ بارىسىندا ۇستالعان ادامنىڭ ءبىرى – وزبەكستان رەسپۋبليكاسىنىڭ 1989 جىلى تۋعان ازاماتى ەكەنى بەلگىلى بولدى. سوتقا دەيىنگى تەرگەۋ بارىسىندا ءتارتىپ ساقشىلارى ونىڭ ەلىمىزگە قاشان جانە نە سەبەپپەن كەلگەنىن، قۇجاتتارىنىڭ زاڭعا سايكەستىگىن مۇقيات تەكسەرەتىن بولادى.

– تابيعات قورعاۋ شارالارى بارىسىندا جىل باسىنان بەرى اۋداندا 23 قۇقىق بۇزۋشىلىقتى انىقتادىم. ونىڭ 21 دەرەگى بويىنشا اكىمشىلىك حاتتاما تولتىرىلىپ، ايىپپۇلدار سالىندى. ەكى دەرەك بويىنشا قىلمىستىق زاڭناماعا سايكەس تەرگەۋ ءجۇردى. اۋدان تۇرعىندارى مەن قوناقتارىن قولدانىستاعى زاڭ تالاپتارىن قاتاڭ ساقتاۋعا، تابيعاتتى ايالاۋعا شاقىرامىن، – دەپ تولىقتىردى سايات داركەنباەۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز