ايماقتار • 23 اقپان، 2021

وڭداسىن ورازالين سۋ تاسقىنى كەزەڭىنە دايىندىقتى كۇشەيتۋدى تاپسىردى

49 رەت كورسەتىلدى

ءوڭىر باسشىسى وڭداسىن ءورازاليننىڭ توراعالىعىمەن وتكەن اپپارات جيىنىندا سانيتارلىق-ەپيدەميولوگيالىق جاعدايعا بايلانىستى سۇراقتار قارالدى. جيىنعا وبلىس اكىمىنىڭ ورىنباسارلارى، باسقارما باسشىلارى، اقتوبە قالاسى مەن اۋدان اكىمدەرى بەينە بايلانىس ارقىلى قاتىستى، دەپ حابارلايدى Egemen.kz.

«بۇگىندە كوروناۆيرۋس ينفەكتسياسىن جۇقتىرعان بىردە ءبىر جاعداي تىركەلگەن جوق. قازىرگى تاڭدا جۇقپالى اۋرۋلار ستاتسيونارىندا 92 ادام ەم الۋدا، جۇكتەمە 20،6%-دى قۇرايدى. كارانتيندىك ستاتسيوناردا 16 ادام جاتىر، جۇكتەمە 3،6%. 22 اقپان كۇنى ەكپە سالۋدىڭ ەكىنشى كەزەڭىنە كوشكەن بولاتىنبىز، 55 ادام ەگىلدى. مەديتسينالىق مەكەمەلەر ەكپە ساقتايتىن سالقىنداتقىش قوندىرعىلارىمەن قامتاماسىز ەتىلگەن»، دەدى وبلىس اكىمىنىڭ ءبىرىنشى ورىنباسارى نۇرجاۋعان قالاۋوۆ.
 
15-22 اقپان ارالىعىندا 47 باقىلاۋ توبى 181 رەيد جۇرگىزىپ، 851 نىسان تەكسەرىلدى، بەس نىسانعا ايىپپۇل سالىندى. جالپى العاندا، 1373 نىسان تەكسەرىلىپ، 186 ملن تەڭگەگە ايىپپۇل سالىندى.
 
ءوڭىر باسشىسىنىڭ تاپسىرماسىمەن دەپۋتاتتار، قوعامدىق كەڭەس مۇشەلەرى، كاسىپكەرلەر مونيتورينگ جاساۋعا تارتىلدى.
 
«جاعداي تۇراقتى، بىراق بۇل ارقانى كەڭگە سالۋعا بولادى دەگەن ءسوز ەمەس»، دەپ ەسكەرتتى وڭداسىن ورازالين.
 
سونداي-اق وبلىس اكىمى مەملەكەتتىك ورگانداردىڭ باسشىلارىنا سۋ تاسقىنى كەزەڭىنە دايىندىقتى كۇشەيتۋدى تاپسىردى.
 
وڭىردە شارالاردىڭ ءتيىستى جوسپارى جاسالىپ، بەكىتىلدى، وبلىستىق، قالالىق جانە اۋداندىق تاسقىنعا قارسى كوميسسيانىڭ قۇرامى مەن مىندەتتەرى انىقتالدى. سۋ تاسۋ قاۋپى بار جەرلەردىڭ تولقۇجاتتارىن تۇزەتۋ بارىسىندا وبلىستا 11 مىڭنان اسا ادام تۇراتىن سۋ دەڭگەيىنىڭ كوتەرىلۋ قاۋپى بار ايماققا جاتاتاتىن وتىز ەلدى مەكەن انىقتالدى.
 
154 614 م3 قار شىعارىلىپ، 80،5 توننا جانار-جاعارماي، 7​ 970 توننا ينەرتتى ماتەريالدار قورى جاسالدى، 13 مىڭ ادامدى ۋاقىتشا ورنالاستىراتىن 76 ورىن دايىندالدى. وبلىس اۋماعىندا ورنالاسقان 174 گيدروتەحنيكالىق عيمارات تەكسەرىلدى. ولاردىڭ 17-ءسى جوندەۋدى قاجەت ەتەدى.
 
وڭداسىن ورازالين اقتوبە قالاسى مەن اۋدان اكىمدەرىنە توتەنشە جاعدايدىڭ ورىن الۋىنا جول بەرمەۋ ءۇشىن قاۋىپسىزدىكتى قامتاماسىز ەتۋ ماسەلەسىن ەرەكشە باقىلاۋعا الىپ، سۋ قويمالارىن، سونىڭ ىشىندە ​ يەسىز جاتقانداردى تەكسەرۋدى، سونىمەن قاتار، قولدا بار كۇش پەن قۇرالداردى موبيليزاتسيالاۋدى تاپسىردى.
سوڭعى جاڭالىقتار

دوللار ارزاندادى

ەكونوميكا • بۇگىن، 16:52

قوسشىدا جاڭا مەكتەپ اشىلادى

ءبىلىم • بۇگىن، 16:25

ۇقساس جاڭالىقتار