ماسەلەن, جانىبەك اۋداندىق باس مەملەكەتتىك سانيتارلىق دارىگەردىڭ قاۋلىسىمەن 2021 جىلعى 19 اقپان مەن 5 ناۋرىز ارالىعىندا جانىبەك اۋىلىندا سەنبى-جەكسەنبى كۇندەرى بارلىق بازار, ساۋدا ۇيلەرى مەن ازىق-ت ۇلىكتىك ەمەس دۇكەندەر جابىلادى. 9-11- سىنىپ وقۋشىلارىنان باسقالارى قاشىقتان وقيدى. مەملەكەتتىك ورگاندار مەن كۆازيمەملەكەتتىك سەكتور ۇيىمدارى قىزمەتكەرلەرى ۇجىمداعى ادام سانىنا بايلانىستى كەمىندە 80, 50, 30%-ىن ونلاين رەجىمگە اۋىستىرادى.
ءدال وسىنداي شەكتەۋلەر شىڭعىرلاۋ اۋدانىندا دا ەنگىزىلدى. جوعارىداعى تالاپتارعا قوسا, مۇندا ءدىني نىساندارداعى بارلىق بۇقارالىق ءىس-شارالار, فيتنەس, جاتتىعۋ زالدارىنىڭ جۇمىسى توقتاتىلدى.
وبلىستىق دەنساۋلىق باسقارماسى باسشىسىنىڭ مىندەتىن اتقارۋشى ارمان قاليبەكوۆتىڭ ايتۋىنا قاراعاندا, وبلىس «سارى ايماقتا» تۇر. بۇگىنگە دەيىن وڭىردە 12 473 ادام ىندەتتى جۇقتىرسا, 10 031 ادام جازىلىپ شىققان. وكىنىشكە قاراي, 199 ادام كوروناۆيرۋستىق ينفەكتسيادان كوز جۇمعان. سوڭعى دەرەكتەر بويىنشا 195 توسەكتىك ورىنعا ارنالعان 4 كارانتيندىك ستاتسيوناردا 19 ناۋقاس جاتىر. ال 591 توسەكتىك ورىن 7 ينفەكتسيالىق ستاتسيوناردا 312 ادام ەمدەلۋدە. اۋرۋحانالار تولىمدىلىعى 52,7%-دى قۇرايدى. ينفەكتسيالىق ستاتسيونارلارداعى 62 رەانيماتسيالىق توسەكتىك ورىندا 18 ناۋقاس ەمدەلۋدە. اۋرۋحانالاردىڭ تەڭ جارىمى بوس. ادەتتەگىدەي, جانساقتاۋ بولىمىندە جاتقان ناۋقاستاردىڭ 61 پايىزى – جاسى 60-تان اسقان ەگدە جاندار. ولاردىڭ ىشىندە 13 ناۋقاستىڭ بۇرىننان ىلەسپەلى اۋرۋى بار ەكەن. دارىگەرلەر قازىرگى تاڭدا وكپەنى جاساندى جەلدەتۋ اپپاراتىنا – 4 ناۋقاس, وتتەگى كونتسەنتراتورىنا – 11 ناۋقاس, ورتالىقتاندىرىلعان وتتەگى كوزىنە – 98 ناۋقاس قوسىلعانىن حابارلادى.
پاندەميا كۇرت كۇشەيگەن جاعدايدا قامسىز بولماۋ ءۇشىن وبلىستا قوسىمشا 1 986 توسەكتىك ورىن رەزەرۆتىك قور دايىندالعان بولاتىن. ونىڭ 1 221 توسەكتىك ورىن – ينفەكتسيالىق ستاتسيونارلاردا, 765 توسەكتىك ورىن كارانتيندىك ستاتسيونارلاردا ورنالاسقان.
ورال قالاسىنداعى ءار ەمحانادا COVID-19 جانە پنەۆمونيا سيمپتومدارى بار پاتسيەنتتەردى, سوزىلمالى اۋرۋلارى بار ادامداردى, سونداي-اق كورسەتكىشتەر بويىنشا جۇكتى ايەلدەر مەن بالالاردى ۇيدە باقىلاۋ ءۇشىن 124 ءموبيلدى بريگادا جۇمىس ىستەۋدە. ءموبيلدى بريگادا تاۋلىگىنە ورتا ەسەپپەن 350 مارتە شاقىرۋعا بارادى, ونىڭ ىشىندە 65-ءى – COVID-19 بويىنشا قوڭىراۋ ەكەن.
وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپاەۆ 1 اقپاننان بەرى COVID-19 جۇقتىرعان 1 354 جاعداي انىقتالعانىن حابارلادى. ناۋقاستارمەن قارىم-قاتىناستا بولعان 1 990 ادام مەديتسينالىق باقىلاۋعا الىنعان.
– سوڭعى اپتادا وتكەن اپتامەن سالىستىرعاندا اۋرۋشاڭدىق 15,7%-عا تومەندەدى, – دەيدى مۇحامعالي قايىرجان ۇلى.
ساراپتاماعا قاراساق, ناۋقاستاردىڭ 31,9%-ى – جۇمىس ىستەيتىن ادامدار. دەگەنمەن اۋرۋ جۇقتىرعاندار اراسىندا زەينەتكەرلەر مەن جۇمىسسىزدار دا از ەمەس, تيىسىنشە 26,8% (364 ادام) جانە 23,1% (313 ادام) بولىپ تۇر. وقۋ جىلى باستالعالى COVID-19 مەكتەپتە ءداستۇرلى فورماتتا وقيتىن – 212, قاشىقتان وقيتىن – 209, بارلىعى 421 وقۋشىدا انىقتالعان. ال 11 قاڭتاردا باستالعان ءۇشىنشى توقساندا 207 وقۋشى ۆيرۋس جۇقتىرعان. ونىڭ 114-ءى – ءداستۇرلى فورماتتا, 93-ءى قاشىقتان وقيدى ەكەن. 12-18 اقپان ارالىعىندا ورال قالالىق جانە ءتيىستى اۋدانداردىڭ باس مەملەكەتتىك سانيتارلىق دارىگەرلەرى قاۋلىسىمەن 4 مەكتەپ كارانتينگە جابىلعان.
وبلىستىڭ باس سانيتار دارىگەرىنىڭ ايتۋىنشا, سالىنعان تىيىمداردى بۇزىپ, كوپشىلىك شارالار وتكىزەتىن, باسقا دا تالاپتاردى بۇزاتىن مەكەمە-ۇيىمدار, جەكەلەگەن ادامدار ازايماي وتىر. ارنايى قۇرىلعان مونيتورينگتىك توپتار 1 قاڭتاردان بەرى وڭىردە 916 مارتە رەيد جۇرگىزگەن. وسىلايشا 7 925 نىسان تەكسەرىلگەن كەزدە, 25 نىساندا بۇزۋشىلىقتار انىقتالعان. بۇعان بايلانىستى 79 حاتتاما تولتىرىلىپ, جالپى كولەمى 5 090 165 تەڭگە ايىپپۇل سالىندى.
باتىس قازاقستان وبلىسى
