ەكونوميكا • 23 اقپان، 2021

قارجىمىزدى قانداي كومپانيالار باسقارادى؟

135 رەت كورسەتىلدى

ەل ازاماتتارى زەينەتاقى جيناعىنداعى قارجىسىن جەكە كومپانيالار باسقارۋىنا بەرە الادى. وسىعان وراي قارجى نارىعىن رەتتەۋ جانە دامىتۋ اگەنتتىگى زەينەتاقى قارجىسىن باسقارۋعا لايىقتى كومپانيالار ءتىزىمى مەن ولارعا قويىلاتىن تالاپتاردى جاريا ەتتى.

– زەينەتاقى جيناقتارىن ينۆەستيتسيالىق پورتفەلدى باسقارۋعا ارنالعان ليتسەنزياسى بار، كەمىندە 3 ملرد تەڭگە مولشەرىندەگى مەنشىكتى كاپيتالى، سوڭعى ءۇش جىلدا كليەنتتەردىڭ 5 ملرد تەڭگە مولشەرىندەگى اكتيۆتەرىن باسقارۋ تاجىريبەسى بار، سونداي-اق سوڭعى ەكى جىل ىشىندە شىعىنعا ۇرىنباعان كومپانيالارعا بەرۋگە بولادى، – دەگەن ەدى اگەنتتىك توراعاسىنىڭ ورىنباسارى ماريا حادجيەۆا.

اگەنتتىك ەلدەگى ينۆەستيتسيالىق پورتفەلدى باسقارۋ ليتسەنزياسى بار 18 كومپانيا اراسىنان التاۋىن تاڭداپ العان. ولار – Jysan Invest جانە First Heartland Capital، Halyk Global Market، Halyk Finance، BCC Invest، Centras Securities. م.حادجيەۆانىڭ ايتۋىنشا، باسقارۋشى كومپانيالاردى تىزىمگە قوسۋ ولار زەينەتاقى اكتيۆتەرىن باسقارۋ بويىنشا قىزمەت كورسەتەدى دەگەندى بىلدىرمەيدى. شەشىمدى كومپانيانىڭ ءوزى نەمەسە اكتسيونەرلەر قابىلدايدى. زەينەتاقى جيناقتارىن بۇل كومپانيالاردىڭ باسقارۋىنا بەرۋ ءۇشىن ولار سەنىمگەرلىك باسقارۋعا جانە كاستودياندىق قىزمەت كورسەتۋگە شارتتار جاساۋى قاجەت. الدىمەن بجزق ءوزىنىڭ رەسمي سايتىندا ءوزى سەنىمگەرلىك باسقارۋعا شارتتار جاساعان باسقارۋشى كومپانيالاردىڭ ءتىزىمىن جاريالايدى. سودان كەيىن عانا سالىمشىلار ءوز جيناقتارىن بۇل كومپانيالاردىڭ باسقارۋىنا اۋدارۋعا قۇقىلى.

كومپانيالاردى تاڭداۋ كەزىندە پورتفەلدى ينۆەستيتسيالاۋ جانە ءارتاراپتاندىرۋ تاۋەكەلدەرىن بارىنشا ازايتۋ كوزدەلگەن. رەتتەۋشى (اگەنتتىك) زەينەتاقى اكتيۆتەرىن قارجى قۇرالدارىنىڭ ءبىر شىعارىلىمىنا ينۆەستيتسيالاۋ ليميتتەرىن بەلگىلەدى – وبليگاتسيالار ءۇشىن زەينەتاقى اكتيۆتەرىنىڭ 50 پايىزىنان اسپايدى جانە اكتسيالار ءۇشىن 10 پايىزىنان اسپايدى، سونداي-اق ءبىر ۇيىم جانە ونىڭ ۇلەستەس تۇلعالارى شىعارعان قارجى قۇرالدارىنا 10 پايىزدان اسپايدى.

«ۆاليۋتا تۇرلەرى بويىنشا قارجى قۇرالدارىنىڭ تەڭگەرىمدى پورتفەلىن قالىپتاستىرۋ ءۇشىن شەتەل ۆاليۋتاسىمەن نومينيرلەنگەن قارجى قۇرالدارىنا ينۆەستيتسيالاۋ ليميتتەرى كوزدەلەدى: بۇل زەينەتاقى اكتيۆتەرىنىڭ 50 پايىزىنان كوپ ەمەس. بۇل رەتتە زەينەتاقى اكتيۆتەرىن قانداي دا بولسىن قارجى قۇرالىنا ينۆەستيتسيالاۋدىڭ ناقتى ليميتتەرى باسقارۋشى كومپانيا بەكىتەتىن ينۆەستيتسيالىق دەكلاراتسيادا بەلگىلەنەتىن بولادى» دەلىنگەن اگەنتتىك حابارلاماسىندا.

– زەينەتاقى اكتيۆتەرىن باسقارۋدى جوسپارلاپ وتىرعان جەكە باسقارۋشى كومپانيالار قازىردىڭ وزىندە سەنىمدى باسقارۋ كەلىسىمشارتتارىن جاساۋ بويىنشا بجزق-مەن جۇمىستى باستاپ كەتتى. كەلەسى اپتادا بۇل وپتسيا سالىمشىلار ءۇشىن قولجەتىمدى بولادى، – دەيدى اگەنتتىكتىڭ باعالى قاعازدار نارىعى دەپارتامەنتىنىڭ باسشىسى ەدىل مەدەۋ.

قىسقاسى، اگەنتتىك زەينەتاقى جيناقتارىن جەكە باسقارۋعا بەرۋ ماسەلەلەرىن رەگلامەنتتەيتىن ءتيىستى قاۋلىلاردى قابىلداعان. ول بويىنشا ينۆەستيتسيالاۋ ستراتەگياسىن باسقارۋشى كومپانيانىڭ ءوزى ايقىندايدى. بجزق سالىمشىلار مۇددەسىن قورعايدى. سالىمشىلار زەينەتاقى جيناقتارىن ءبىر باسقارۋشى كومپانيادان ەكىنشىسىنە جىلىنا ءبىر رەتتەن ارتىق بەرە المايدى. بۇل رەتتە جيناعىن ۇلتتىق بانكتىڭ باسقارۋىنا تەك ەكى جىلدان سوڭ عانا قايتارا الادى.

– زەينەتاقى اكتيۆتەرىن ينۆەستيتسيالاۋدان ىقتيمال شىعىندارعا بايلانىستى نە وپەراتسيالىق قىزمەت بارىسىندا تۋىندايتىن تاۋەكەلدەردى بارىنشا ازايتۋ ماقساتىندا، رەتتەۋشى بەلگىلەگەن نەگىزگى تالاپتاردىڭ ءبىرى – باسقارۋشى كومپانيالاردىڭ مەنشىكتى كاپيتالىنا قويىلاتىن تالاپ. باسقارۋشىلار سەنىمگەرلىك باسقارۋعا قابىلداعان زەينەتاقى اكتيۆتەرى كىرىستىلىگىنىڭ ەڭ تومەن دەڭگەيىن قامتاماسىز ەتۋگە ءتيىس. ەگەر كومپانيا كورسەتكىشى كىرىستىلىكتىڭ ەڭ تومەن مانىنەن از بولسا، باسقارۋشى كومپانيا بۇل تەرىس ايىرمانى ءوز كاپيتالىنىڭ ەسەبىنەن وتەۋى ءتيىس. ءوز كەزەگىندە، كىرىستىلىكتىڭ ەڭ تومەن دەڭگەيى بارلىق جەكە باسقارۋشى كومپانيالاردىڭ باسقارۋىنداعى زەينەتاقى اكتيۆتەرىنىڭ نومينالدى كىرىستىلىگىنىڭ ورتاشا الىنعان كوەففيتسيەنتىنىڭ 70 پايىزى دەڭگەيىندە بەلگىلەنەدى، – دەدى م.حادجيەۆا.

بجزق دەرەكتەرىنە سايكەس، 2021 جىلعى 1 اقپانداعى جاعداي بويىنشا زەينەتاقى جيناقتارى بار 829 368 ادام زەينەتاقى جيناقتارىنىڭ ءبىر بولىگىن بجزق-عا جەكە باسقارۋشى كومپانيالارعا سەنىمگەرلىك باسقارۋعا بەرۋ قۇقىعىن پايدالانا الادى.

زەينەتاقى جيناقتارىن جەكە باسقارۋعا بەرۋ قۇقىعىن ۇسىنۋ بجزق سالىمشىلارىنىڭ وزدەرىنىڭ جيناق اقشاسىن باسقارۋعا دەگەن مۇددەلىلىگىن ارتتىرادى، قازاقستاندىق ەميتەنتتەردىڭ باعالى قاعازدارىنا ينستيتۋتسيونالدىق سۇرانىستى ىنتالاندىرادى جانە جالپى العاندا ەكونوميكاعا وڭ اسەر ەتەدى دەپ باعالانىپ وتىر.

– وسىعان دەيىن ايتىلعانداي، ۆاليۋتا قۇرالىنىڭ پورتفەلدىڭ 50 پايىزىنان اسپاۋ كەرەك ەكەنىن، بارلىق تاۋەكەلدىڭ كومپانياعا تيەسىلى ەكەنىن، ال مەملەكەتتىك كەپىلدىڭ بولمايتىنىن ەسكەرە وتىرىپ باسقارۋشىلار سالىمشىلارعا بجزق ۇسىنىپ وتىرعاننان وزگەشە بولاتىنداي اگرەسسيۆتى ستراتەگيا ۇسىنا المايدى دەپ بايلام جاساۋعا بولادى. كاپيتالعا قويىلىپ وتىرعان قاتاڭ تالاپ جانە ونى شەكتەۋلى كوميسسياسى بار جيىنتىق ورتاشا كىرىسپەن جابۋ جەكە باسقارۋشىلارعا دەموتيۆاتسيا بولادى، سونداي-اق سالىمشىلار ءۇشىن ينۆەستيتسيالاۋعا ەشبىر نۇسقا قالدىرمايدى، – دەيدى EXANTE حالىقارالىق ينۆەستيتسيالىق كومپانياسىنىڭ ساراپشىسى اندرەي چەبوتارەۆ.

اگەنتتىك حابارلاۋىنشا، زەينەت جاسىنا جەتپەگەن، جيناعىنداعى قارجىسى مەملەكەت بەكىتكەن جەتكىلىكتى مولشەردەن اساتىن، ساقتاندىرۋ كومپانيالارىمەن زەينەتاقى اننۋيتەتى كەلىسىمشارتىن جاساعان ازاماتتار (كومپانيا ولاردى ءومىر بويى اننۋيتەتتى تولەممەن قامتاماسىز ەتەدى) ءوز قارجىسىن جەكە كومپانيالاردىڭ باسقارۋىنا بەرە الادى. سالىمشى زەينەتاقى جيناعىن كومپانياعا اۋدارۋ ءۇشىن الدىمەن بجزق-عا حابارلاسادى نەمەسە ەلەكتروندى ءوتىنىش جولدايدى. جيناقتى تەكسەرىپ شىققان زەينەتاقى قورى قارجىنى كومپانيا شوتىنا 30 كۇن ىشىندە اۋدارادى. زەينەتاقى جيناعىنىڭ قالعان بولىگى ۇلتتىق بانك باقىلاۋىندا قالا بەرەدى.

سونداي-اق كوپشىلىكتى «جەكە كومپانياعا اۋدارعان قارجىمدى ينفلياتسيا «جۇتىپ» قويماي ما؟» دەگەن ساۋال دا مازالاۋى مۇمكىن. سول ءۇشىن سالىمشىلاردىڭ دا ءوز ينۆەستيتسيالىق قاراجاتىن باسقارۋىنا مۇمكىندىك بەرىلىپ وتىر. ءسىز ءوزىڭىزدىڭ جەكە زەينەتاقى جوسپارىڭىزدى قۇرىپ، ءوز قارجىڭىزدى ينۆەستيتسيالاۋدىڭ جانە تابىس تابۋدىڭ بالاما ساياساتىن تاڭداۋعا قۇقىلىسىز. ينۆەستيتسيالىق پورتفەلدى باسقارۋشىنى جانە ينۆەستيتسيالىق ستراتەگيانى تاڭداي وتىرا سالىمشى تاۋەكەلدى ءوز موينىنا الادى. بۇل ءبىرىنشى كەزەكتە زەينەتاقى جارنالارىنىڭ ساقتالۋىنا مەملەكەتتىك كەپىلدىكتىڭ باسقارۋشى كومپانيانىڭ كەپىلدەمەسىمەن اۋىستىرىلۋىمەن بايلانىستى. بۇل كەم دەگەندە زەينەتاقى اكتيۆتەرى تابىستىلىعىنىڭ مينيمالدى دەڭگەيىن قامتاماسىز ەتۋى ءتيىس.

 

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار