قالىپتاسقان ەپيدەميولوگيالىق جاعداي اياسىندا حالىقتىڭ قاۋىپسىزدىگىن قامتاماسىز ەتۋ ماقساتىندا «MEDEÝ» كوللەكتسيالىق مونەتالاردى ونلاين-ساتۋ جانە جەتكىزۋ ۇلتتىق بانكتىڭ ينتەرنەت-دۇكەنىنىڭ جاڭارتىلعان پلاتفورماسى ارقىلى جۇزەگە اسىرىلادى. تاپسىرىستاردى وڭدەۋ بەلگىلى ءبىر ۋاقىتتى قاجەت ەتەتىندىكتەن, مونەتالاردى ساتۋ بىرنەشە كۇنگە بولىنەدى.
MEDEÝ» مونەتاسى ديزاينىنىڭ تۇجىرىمداماسى اتاقتى بوگەتتىڭ جانە «جارىلىستان تۋىنداعان» مۇز ايدىنىنىڭ پايدا بولۋ تاريحىن سۋرەتتەيدى.
مونەتا ديزاينىنىڭ گرافيكالىق تۇجىرىمداماسى بۇكىل الەمگە ايگىلى «مەدەۋ» بيىك تاۋلى مۇز ايدىنىن قورشاعان ىلە الاتاۋىنىڭ جارتاستى تاۋلارىن اللەگوريالىق قابىلداۋ نەگىزىندە جاسالعان.
مونەتالار التىن جالاتىلعان كۇمىستەن, ماسساسى 24 گرامم, ديامەترى 37 مم, «proof» ساپاسىمەن, تارالىمى 3 000 ء(ۇش مىڭ) دانادا دايىندالدى. مونەتالار كوللەكتسيالىق قۇنى بويىنشا ساتۋعا ارنالعان.
مونەتانىڭ اۆەرسىندە ورتالىق بولىگىندە «QAZAQSTAN RESPÝBLIKASY» جازباسىنىڭ, مونەتا نومينالىن جانە مونەتا دايىندالعان مەتالدى, ونىڭ سىناماسى مەن ماسساسىن بىلدىرەتىن جازبالاردىڭ قورشاۋىندا قازاقستان رەسپۋبليكاسىنىڭ مەملەكەتتىك ەلتاڭباسى بەينەلەنگەن.
مونەتانىڭ رەۆەرسىندە ورتاسىندا جارتاستى تاۋلار اياسىندا بيىك تاۋلى «مەدەۋ» مۇز ايدىنىنىڭ بەينەسى ورنالاسقان. مونەتانى اينالدىرا جالپاق جيەكتە مىناداي بەدەرلى جازۋلار ورنالاسقان: مونەتانىڭ سوعىلعان جىلى, مۇز ايدىنىنىڭ رەسمي اشىلعان جىلى, بەلگىلەنگەن الەمدىك رەكوردتار سانى, تەڭىز دەڭگەيىنەن بيىكتىگى جانە مۇز ايدىنىنىڭ جانە ونىڭ ورنالاسقان جەرىنىڭ مەملەكەتتىك تىلدەگى, ورىس جانە اعىلشىن تىلدەرىندەگى اتاۋى.
نومينالى 500 تەڭگەلىك كوللەكتسيالىق مونەتالار تولەمدەردىڭ بارلىق تۇرلەرى بويىنشا قازاقستان رەسپۋبليكاسىنىڭ بۇكىل اۋماعىندا ولاردىڭ بەلگىلەنگەن قۇنىمەن قابىلدانۋعا, سونداي-اق بانك شوتتارىنا ەسەپكە الىنۋعا جانە اۋدارىلۋعا مىندەتتى, قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى.
كۇمىستەن جاسالعان مونەتالار كادەسىيلىق ورامدا شىعارىلادى جانە قازاقستان رەسپۋبليكاسى ۇلتتىق بانكىنىڭ مەملەكەتتىك تىلدەگى, ورىس جانە اعىلشىن تىلدەرىندەگى نومىرلىك ساپا سەرتيفيكاتىمەن جابدىقتالعان.
كوللەكتسيالىق مونەتالار قازاقستاننىڭ تەڭگە سارايىندا دايىندالدى.
