قالاداعى تۇرعىن ۇيدەن شىققان ءورت وقيعاسى تەز تۇتانعىش ماتەريالدىڭ بەتىنە اشىق وت كوزىنىڭ ءتۇسۋى سالدارىنان تۋىنداعان. بۇگىن وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن بريفينگتە جامبىل وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى باقىت راتاەۆ ءورت فاكتىسى بويىنشا قازاقستان رەسپۋبليكاسى قىلمىستىق كودەكسىنىڭ 292-بابىنىڭ 3-بولىگى, ءورت قاۋىپسىزدىگى تالاپتارىن بۇزۋ بويىنشا سوتقا دەيىنگى تەرگەۋ باستالعانىن مالىمدەدى. «سوت-ساراپتاما ورتالىعى ماماندارىنىڭ الدىن-الا مالىمەتتەرى بويىنشا, ءولىم ۋلى گازدان ۋلانۋدان, ال ءورتتىڭ اشىق وت كوزى تۇتانعىش ماتەريالدىڭ, ياعني توسەك-ورىن جابىندارىنىڭ بەتىنە تيگەنىنەن بولعان. ءورتتىڭ قورىتىندى سەبەپتەرى بارلىق قاجەتتى ساراپتامالاردىڭ ناتيجەلەرى بويىنشا جاريالاناتىن بولادى», دەدى باقىت راتاەۆ.
سونىمەن قاتار, جامبىل وبلىستىق توتەنشە جاعدايلار دەپارتامەنتىنىڭ باستىعى ەرمەك مومباەۆ ءورت-تەحنيكالىق زەرتحاناسىنىڭ الدىن-الا زەرتتەۋ مالىمەتتەرىن جاريالادى. ء«ورت بەس قاباتتى تۇرعىن ءۇيدىڭ ءۇشىنشى قاباتىنداعى ءۇش بولمەلى پاتەردە ورىن الدى. وت بالالار بولمەسىندە تۇتانعان. جالىن 16 شارشى مەتر اۋماقتى قامتىعان. جىلجىمالى ءورت-تەحنيكالىق زەرتحانامەن زەرتتەۋ جۇرگىزۋ كەزىندە وقيعا ورنىندا جانعان سىمدار مەن ەلەكتر جابدىقتارى, پەش نەمەسە باسقا دا قوسىمشا جىلىتۋ قۇرالدارى تابىلمادى, ءۇي ورتالىق جىلىتۋعا قوسىلعان», دەدى ەرمەك مومباەۆ. ال, جامبىل وبلىسىنىڭ اكىمى بەردىبەك ساپارباەۆتىڭ تاپسىرماسىمەن قۇرىلعان ارنايى كوميسسيانىڭ توراعاسى, وبلىس اكىمىنىڭ ورىنباسارى ۇلان جازىلبەك زارداپ شەككەن وتباسىنا بارلىق قاجەتتى كومەك كورسەتىلەتىنىن اتاپ ءوتتى. «وقيعانىڭ بارلىق ءمان-جايىن انىقتاۋ ءۇشىن وبلىس اكىمىنىڭ وكىمىمەن كوميسسيا قۇرىلدى. ونىڭ قۇرامىنا جەرگىلىكتى اتقارۋشى ورگانداردىڭ, پروكۋراتۋرانىڭ, پوليتسيا دەپارتامەنتىنىڭ, توتەنشە جاعدايلار دەپارتامەنتىنىڭ جانە باسقا دا جاۋاپتى مەملەكەتتىك ورگانداردىڭ وكىلدەرى ەندى. كەشەدەن بەرى كوميسسيا مۇشەلەرى قايعىلى وقيعا ورنىندا بولىپ, جۇمىس جۇرگىزۋدە. ءبىزدىڭ تاراپىمىزدان بارلىق قاجەتتى كومەك كورسەتىلەدى. سونىڭ ىشىندە پسيحولوگيالىق كومەكتى جانە جەرلەۋ ءراسىمىن ۇيىمداستىرۋعا قول ۇشىن بەرەمىز», دەگەن ۇلان جازىلبەك قارا جامىلعان وتباسىنا كوڭىل ايتتى. اكىم ورىنباسارىنىڭ ايتۋىنشا, وتباسى تولىققاندى. بالالاردىڭ اكەسى جۇمىس ىستەيتىن بولسا, اناسى مۇعالىم بولىپ ەڭبەك ەتەدى. الايدا, قازىرگى ۋاقىتتا دەكرەتتىك دەمالىستا ەكەن. سونداي-اق, ۇلان جازىلبەك الەۋمەتتىك جەلىلەردە ورتتەن زارداپ شەككەن 60 جاستاعى ايەل تۋرالى قاۋەسەتتى جوققا شىعاردى. «بۇل اقپارات شىندىققا جاناسپايدى. باسقا زارداپ شەككەندەر جوق», دەدى ول.
