ءتىلسىز جاۋدىڭ سالدارىنان كيىمدەر مەن جيھازدار ورتەنىپ كەتكەن. پاتەر ىشىندە اتا-اناسىنىڭ قاراۋىنسىز كامەلەت جاسىنا تولماعان 2015, 2016, 2017, 2019 جانە 2020 جىلى تۋعان بەس بالا قالىپ قويعان. بەلگىلى بولعانىنداي, بالالاردىڭ اكەسى جۇمىستا بولعان, ال اناسى دۇكەنگە شىعىپ كەتكەن. ءورت سالدارىنان بەس بالا دا تۇتىنگە ۋلانىپ, جەدەل تۇردە اۋرۋحاناعا جەتكىزىلدى. وكىنىشكە قاراي, اراعا ءبىراز ۋاقىت سالىپ, ءبارى دە كوز جۇمعان.
قايعىلى وقيعانىڭ سەبەبىن انىقتاۋ ءۇشىن جامبىل وبلىسىنىڭ اكىمى بەردىبەك ساپارباەۆتىڭ تاپسىرماسىمەن ارنايى كوميسسيا قۇرىلدى. وبلىس اكىمىنىڭ ورىنباسارى ۇلان جازىلبەكتىڭ توراعالىعىمەن اتالعان كوميسسيا وقيعا ورنىنا اتتاندى. سونداي-اق, جاڭاتاس قالاسىنا وبلىس پروكۋرورى نۇرعالىم ءابدىروۆ پەن وبلىستىق پوليتسيا دەپارتامەنتىنىڭ باستىعى جانات سۇلەيمەنوۆ تە اتتاندى. سونىمەن قاتار, جولعا جامبىل وبلىستىق توتەنشە جاعدايلار دەپارتامەنتىنىڭ باسشىسى ەرمەك مومباەۆ پەن جەدەل توپ, جىلجىمالى ءورت-تەحنيكالىق زەرتحانا, ءورت ءسوندىرۋ قىزمەتى مەن اپاتتىق-قۇتقارۋ قىزمەتىنىڭ پسيحولوگتارى دا شىقتى. جالپى, كوميسسيا قۇرامىنا پروكۋراتۋرا, پوليتسيا دەپارتامەنتى, توتەنشە جاعدايلار جونىندەگى دەپارتامەنت پەن باسقا دا مۇددەلى مەملەكەتتىك ورگانداردىڭ وكىلدەرى ەنگەن. جەرگىلىكتى اتقارۋشى ورگاندار تاراپىنان قارا جامىلعان وتباسىنا جان-جاقتى كومەك كورسەتىلەدى. پسيحولوگ ماماندار جۇمىلدىرىلىپ, بالالاردى جەرلەۋ شارالارىن ۇيىمداستىرۋعا جاردەم بەرىلەدى.
وقيعا ورنىندا ءورت ءسوندىرۋ قىزمەتىنىڭ 6 قىزمەتكەرى مەن 1 دانا تەحنيكا جۇمىس اتقاردى. قازىرگى كەزدە ءورت تولىعىمەن اۋىزدىقتالدى.
