جاڭا مەكتەپتىڭ جۇمىسى وقۋشىلاردى اقىندىق پەن ايتىس ونەرىنە باۋلۋ, سويلەۋ جانە جازۋ مادەنيەتىنە ۇيرەتۋ, كوركەمسوز بەن مانەرلەپ وقۋ, ءداستۇرلى اۋەن, ماقام-سازداردى ناسيحاتتاۋ باعىتىندا بولماق. سونداي-اق مۇندا سالت-ءداستۇر, ۇلتتىق قۇندىلىقتار جونىندە دارىستەر, پراكتيكالىق جۇمىستار وتكىزىلەدى دەپ جوسپارلانعان.
جاڭا باستاما تۋرالى قادىر مىرزا ءالى اتىنداعى وبلىستىق مادەنيەت جانە ونەر ورتالىعىندا تالقىلاۋ ءوتىپ, ورتالىق ديرەكتورى باۋىرجان حاليوللا جانسايا مۋسينانىڭ ونەر مەكتەبىن اشۋ جونىندەگى باستامانى قولدايتىنىن, جان-جاقتى قولداۋ كورسەتەتىنىن جەتكىزدى. «باستامانى جۇزەگە اسىرۋعا جانسايانىڭ قارىم-قابىلەتى, تاجىريبەسى تولىق جەتەدى. سونىمەن قاتار بۇل ونەر مەكتەبى جاھاندانۋدىڭ ەلىمىزگە تيگىزەر كەرى اسەرىنە, بار ۋاقىتىن ۇيالى تەلەفونمەن, كومپيۋتەرمەن وتكىزەتىن وقۋشىلاردىڭ «عالامتور دەرتىنە» تويتارىس بەرە الادى», دەپ سانايدى باۋىرجان ەرگەن ۇلى.
جانسايا مۋسينا بولاشاق ونەر مەكتەبىنىڭ جۇمىسىن جولعا قويۋدا جان-جاقتى قولداۋ جاساپ وتىرعان قادىر ورتالىعىنىڭ ۇجىمىنا زور العىسىن ايتتى. ۇرپاق تاربيەسى, ۇلت مۇددەسى جولىندا ايانباي قىزمەت ەتەتىنىن ورتاعا سالدى.
قازىر اتالعان ۇيىرمەلەردى جۇرگىزۋ ءۇشىن وبلىستاعى بەلگىلى ونەر يەلەرىمەن, تاجىريبەلى ماماندارمەن كەلىسسوزدەر جۇرۋدە. جوسپار ناقتىلانىپ, كەلىسسوزدەر اياقتالا كەلە, جۋىق ارادا ونەر مەكتەبى ءوز جۇمىسىن باستايدى.
– مەكتەپ وقۋشىلارىنا ارنالعان مۇنداي شىعارماشىلىق اقىلى ۇيىرمەلەر بۇرىننان بار, حالىققا تاڭسىق ەمەس. بىراق ولار مۇنداي كەشەندى بولماعان, ونەردىڭ ءبىر باعىتىنا عانا باۋلي الاتىن. مىسالى, قاراقات ءابىلدينانىڭ, ساۋلە جانپەيىسوۆانىڭ, التىنبەك قورازباەۆتىڭ ت.ب. ونەر مەكتەپتەرى جەكە ستۋديا تۇرىندە قىزمەت ەتىپ, نەگىزىنەن انشىلىككە ۇيرەتەدى. ال جانسايا اشقالى وتىرعان مەكتەپتە بىرنەشە ونەر كەشەندى تۇردە, ءبىر-بىرىمەن بايلانىستىرا قاراستىرىلادى. بۇعان ءبىزدىڭ قادىرسارايدىڭ بازاسى تولىق مۇمكىندىك بەرەدى, – دەيدى باۋىرجان حاليوللا.
ايتا كەتەيىك, جالپى ۇستازدىق دەگەن جانسايا مۋسينا ءۇشىن تىڭ كاسىپ ەمەس. ويتكەنى ول كوپ جىلدان بەرى ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىندە وقىتۋشى بولىپ قىزمەت ەتەدى.
باتىس قازاقستان وبلىسى
