ءوڭىر باسشىسىنىڭ ايتۋىنشا, كۇردەلى كەزەڭدەگى بارلىق قيىندىققا, توتەنشە جاعداي رەجىمى مەن كارانتيندىك شەكتەۋلەرگە قاراماستان, وبلىس دامۋدىڭ وڭ ديناميكاسىن ساقتاپ قالا العان.
– ءبىزدىڭ ءبىرىنشى كەزەكتەگى مىندەتتەرىمىز – تۇرعىنداردىڭ دەنساۋلىعىن ساقتاۋ, بيزنەستى قولداۋ, تۇراقتى تابىس پەن جۇمىسپەن قامتۋدى قامتاماسىز ەتۋ بولدى. وتكەن جىل ارالىعىندا 11 جاڭا ءوندىرىس ىسكە قوسىلىپ, 2500-دەن استام تۇراقتى جۇمىس ورنى اشىلدى. ونەركاسىپتە ءونىم كولەمى 1,5% وسىممەن 2,9 ترلن تەڭگەنى قۇرادى. ينۆەستيتسيا تارتۋعا كوپ كوڭىل ءبولىندى. وتكەن جىلى ولاردىڭ كولەمى 678,2 ملرد تەڭگەنى قۇرادى, ونىڭ 81,6%-ى – جەكەنىڭ قاراجاتى, – دەدى وبلىس اكىمى.
وبلىستاعى باسىم باعىتتاعى مىندەتتىڭ ءبىرى – جاڭا جۇمىس ورىندارىن اشىپ, جۇمىسسىزدىقتىڭ الدىن الۋ. وسى ورايدا بىلتىر ءتۇرلى باعدارلامالاردىڭ ارقاسىندا 35 مىڭ جاڭا جۇمىس ورنى اشىلعان. «جۇمىسپەن قامتۋدىڭ جول كارتاسى» مەملەكەتتىك باعدارلاماسى بويىنشا وڭىردەگى 140 ەلدى مەكەندە 622 ينفراقۇرىلىمدىق جوبا ىسكە اسىرىلىپ, سونىڭ ارقاسىندا 16 مىڭ جۇمىس ورنى قۇرىلعان. قالالار مەن اۋىلدىق جەرلەردە شامامەن 300 شاقىرىم جول, 200-دەن استام الەۋمەتتىك نىسان جوندەۋدەن وتكەن. سونىمەن قاتار 37 ەلدى مەكەندە سۋمەن جابدىقتاۋ جاقساردى.
بىلتىر قالىپتاسقان جاعدايعا بايلانىستى دەنساۋلىق ساقتاۋ سالاسىنا قوماقتى قاراجات جۇمسالعان. سونىڭ ارقاسىندا قاراعاندى وبلىسى كوروناۆيرۋس ينفەكتسياسىمەن كۇرەستە ءتاۋىر ناتيجەلەرگە قول جەتكىزدى. قىسقا مەرزىمدە وبلىستا جۇمىس ىستەپ تۇرعان اۋرۋحانالار ينفەكتسيالىق گوسپيتالدارعا قايتا بەيىندەلدى. جەزقازعان قالاسىندا 200 ورىنعا شاقتالعان جاڭا جۇقپالى اۋرۋلار گوسپيتالى سالىنىپ, پايدالانۋعا بەرىلدى. ءوڭىر بويىنشا مەديتسينالىق جابدىقتار پاركى جاڭارتىلدى. وكپەنى جاساندى جەلدەتۋدىڭ 242 اپپاراتى, 40 تسيفرلى رەنتگەن-اپپارات ساتىپ الىنعان. جالپى, وتكەن جىلى بەس كومپيۋتەرلىك توموگرافيا كابينەتى جانە 11 پتر-زەرتحانا اشىلدى. سونىڭ ارقاسىندا وبلىستا پاندەميانىڭ قوزعالىسىن قاداعالاپ وتىرۋدىڭ مۇمكىندىگى تۋدى.
ال بولاشاقتاعى جوسپارلار تۋرالى ءسوز بولعاندا, وبلىس باسشىسى جاڭادان 14 ءىرى ءوندىرىستى ىسكە قوسۋ كوزدەلىپ وتىرعانىن ايتتى. بولجام بويىنشا, ينۆەستيتسيا 715 ملرد تەڭگەنى قۇراۋى ءتيىس.
تاعى ءبىر اسا ماڭىزدى سالا – تۇرعىن ءۇي قۇرىلىسىنىڭ اۋقىمى بۇرىنعىدان دا ۇلعايا تۇسپەك. شامامەن العاندا الەۋمەتتىك تۇرعىدا از قورعالعان ءۇش مىڭنان استام وتباسىن پاتەرمەن قامتاماسىز ەتۋ جوسپاردا بار.
جولداردى جوندەۋ دە كۇن تارتىبىندە وتكىر تۇرعان ماسەلەنىڭ ءبىرى. بيىل وبلىستىق جانە كەنتىشىلىك جولداردى رەتكە كەلتىرۋ جۇمىستارى جالعاسىن تابادى. ءوڭىر باسشىسى قالالار مەن اۋدانداردا سۋ جانە جىلۋمەن جابدىقتاۋدى جاقسارتۋ ءۇشىن بىرقاتار جوبا جۇزەگە اسىرىلاتىنىن ءمالىم ەتتى.
ۇكىمەتتىڭ قولداۋىنىڭ ارقاسىندا وڭىردە بىردەن جەتى ءىرى كارىز-تازارتۋ جەلىسى سالىنىپ جاتىر. بيىل پريوزەرسك, اباي قالالارى, ۇلىتاۋ مەن قاراباس كەنتتەرىندە تازارتۋ قۇرىلىستارى پايدالانۋعا بەرىلەدى. سونداي-اق قارقارالى اۋدانىنىڭ قاراعايلى كەنتى مەن اقتوعايدا جوبالاردى ىسكە اسىرۋ جوسپارلانعان.
جەڭىس قاسىمبەك قازىرگى تاڭداعى باستى مىندەت – وبلىس تۇرعىندارىنىڭ ءال-اۋقاتىن ارتتىرۋ ەكەندىگىن اتاپ ءوتتى.
– وبلىستا شەشىمىن تابۋدى قاجەت ەتەتىن ماسەلەلەر ءالى دە از ەمەس. وسى ورايدا سىزدەردىڭ قولداۋلارىڭىز ءبىز ءۇشىن وتە ماڭىزدى بولماق. ءتىل تابىسىپ, تىزە قوسىپ جۇمىس ىستەسەك, العا قويعان ماقساتتارىمىزعا قول جەتكىزە الاتىنىمىزعا سەنىمدىمىن, – دەدى ج.قاسىمبەك.
جالپى, جيىن بارىسىندا وبلىستىق قوعامدىق كەڭەس مۇشەلەرى مەن ونىڭ توراعاسى ەرقارا ايماعامبەتوۆ ءوڭىر بويىنشا اتقارىلىپ جاتقان جۇمىستارعا وڭ باعا بەردى.
– ەكونوميست رەتىندە مەن وبلىس اكىمدىگى ۇجىمىنىڭ كۇردەلى كەزەڭدەگى ءتيىمدى قىزمەتىن اتاپ وتكىم كەلەدى. ەڭ باستىسى – بىزدە تۇراقتىلىق بار, جۇمىس ورىندارى اشىلىپ جاتىر. ينۆەستيتسيا تارتۋدىڭ, ونەركاسىپتى دامىتۋدىڭ جاقسى كورسەتكىشتەرى بار, – دەدى وبلىستىق قوعامدىق كەڭەس توراعاسى, قازتۇتىنۋوداعى قاراعاندى ەكونوميكالىق ۋنيۆەرسيتەتىنىڭ رەكتورى ەرقارا ايماعامبەتوۆ.
