كەزدەسۋ بارىسىندا مينيستر پرەزيدەنتكە وزبەكستان كوشباسشىسىنىڭ تاشكەنت قالاسىندا «ورتالىق ازيا جانە وڭتۇستىك ازيا: وڭىرلىك ءوزارا بايلانىستار. سىن-قاتەرلەر مەن مۇمكىندىكتەر» اتتى حالىقارالىق كونفەرەنتسيا وتكىزۋ تۋرالى باستاماسىنا قولداۋ ءبىلدىرۋ تۋرالى ءوتىنىشىن جەتكىزدى.
سونىمەن قاتار قازاقستان مەن وزبەكستان اراسىنداعى بەرىك دوستىق پەن تاتۋ كورشىلىككە نەگىزدەلگەن ستراتەگيالىق سەرىكتەستىكتىڭ قازىرگى احۋالى جانە ونى ءارى قاراي نىعايتۋدىڭ پەرسپەكتيۆالارى تالقىلاندى.
قاسىم-جومارت توقاەۆ الەمدەگى كۇردەلى جاعدايعا جانە پاندەمياعا قاراماستان ەكى ەلدىڭ قارىم-قاتىناستارى جوعارى دەڭگەيدە ەكەنىن, قازىرگى سىن-قاتەرلەرگە ورنىقتى توتەپ بەرىپ وتىرعانىن ايتتى.
كەزدەسۋ سوڭىندا قاسىم-جومارت توقاەۆ شاۆكات ميرزيوەۆقا زور دەنساۋلىق جانە باق-بەرەكە تىلەگەن سالەمىن جولداپ, وزبەكستان پرەزيدەنتى ەپيدەميالىق احۋال جاقسارعاننان كەيىن قازاقستانعا ساپارمەن كەلەتىنىنە سەنىم ءبىلدىردى.
