ايماقتار • 18 اقپان، 2021

بەستاماقتاعى شوشقا فەرماسى جۇمىسىن توقتاتتى

511 رەت كورسەتىلدى

ەكونوميكالىق سوت اقتوبە وبلىسى بەستاماق اۋىلىنداعى شوشقا فەرماسىنىڭ قىزمەتىن قالدىق سۋ اعىزعانى ءۇشىن توقتاتۋ تۋرالى شەشىم شىعاردى. بۇدان باسقا، بيولوگيالىق قالدىقتار قويماسىن پايدالانۋعا تىيىم سالىندى، دەپ حابارلايدى Egemen.kz

شوشقا فەرماسىنىڭ يەلەرىنە قاتىستى قاتاڭ شارالار كاسىپورىندا ەكولوگيالىق نورمالار ورەسكەل بۇزىلعانى بەلگىلى بولعاننان كەيىن قولدانىلدى. باستاپقىدا بۇل تۋرالى كاسىپورىن ورنالاسقان بەستاماق اۋىلىنىڭ تۇرعىندارى حابارلادى.

جوسپاردان تىس تەكسەرۋ بارىسىندا شوشقا فەرماسىنداعى بارلىق وندىرىستىك جانە بيولوگيالىق قالدىق، تۇرمىستىق جانە قۇرىلىس قالدىقتارى اۋىلدىڭ جانىنداعى ورعا كومىلگەنى بەلگىلى بولدى. ول جەردىڭ اۋماعى 6 گەكتارعا جۋىق.

تەكسەرۋشىلەر 200 تونناعا جۋىق قالدىقتى قازىپ شىعاردى. بۇدان باسقا، كاسىپورىن ەكى جىل بويى قورشاعان ورتاعا ەميسسيا بولماي، رۇقساتسىز جۇمىس ىستەگەنى انىقتالدى. فەرمادا جوبادا ايتىلعان 40 مىڭ شوشقانىڭ ورنىنا 50 مىڭنان اسا شوشقا بولعان. بارلىق زاڭبۇزۋشىلىقتان كەلگەن جالپى زالال 7 ميلليارد تەڭگە بولدى.

"جيناقتاۋىش توعاندارعا جانە جەرگىلىكتى تەرريتورياعا وندىرىستىك قالدىق سۋدى اعىزۋ بولىگىندە سەرىكتەستىكتىڭ شارۋاشىلىق قىزمەتى توقتاتىلدى. سونداي-اق زاڭبۇزۋشىلىق جويىلعانعا دەيىن بيولوگيالىق قالدىقتار قويماسىن پايدالانۋعا تىيىم سالىندى. جاۋاپقا تارتىلعان مەكەمە قورشاعان ورتاعا ەميسسياعا رۇقسات الۋ مۇمكىندىگىنەن ايىرىلدى"، دەدى سۋديا جانار جۇباتوۆا.

ايتا كەتەيىك، بىلتىر 19 قاراشادا اقتوبە وبلىسى العا اۋدانى بەستاماق اۋىلىنىڭ 80-نەن استام تۇرعىنى شوشقا فەرماسىن جابۋدى تالاپ ەتىپ، نارازىلىققا شىققانى حابارلانعان ەدىك. كەيىن شوشقا فەرماسىنىڭ يەسى گايك تەرتەريان كاسىپورىن قانداي جاعدايدا جابىلاتىنىن ايتىپ ءوتتى.

سوڭعى جاڭالىقتار

ۇقساس جاڭالىقتار