بۇعان دەيىن دە تالاي مارتە جازعانىمىزداي, ەندى رەسەي ءوز اۋماعىندا جۇمىس ىستەگەن قىرعىزستان, ارمەنيا ازاماتتارىنا زەينەتاقى تاعايىندايدى. تيىسىنشە, قازاقستانعا كەلىپ ەڭبەك ەتكەن وداق ەلدەرىنىڭ ازاماتتارى بىرىڭعاي جيناقتاۋشى زەينەتاقى قورىنان دا (بجزق) زەينەتاقى الۋعا قۇقىلى. ەگەر ءبىر ازامات ءتورت ەل اۋماعىندا دا قىزمەت اتقارسا, سول ءتورت ەلدىڭ ۇكىمەتىنەن دە زەينەتاقى الا الادى.
زەينەتاقى بەرۋ كەلىسىمنىڭ 12-بابىنا سايكەس مىناداي نەگىزگى تارتىپپەن جۇزەگە اسادى. بۇل تۋرالى بجزق حابارلاپ وتىر.
كەلىسىم كۇشىنە ەنگەننەن كەيىن جيناقتالعان جۇمىس ءوتىلى ءۇشىن زەينەتاقىنى ەاەو-عا مۇشە مەملەكەت اۋماعىندا ەڭبەك ەتىپ, جيناقتالعان جۇمىس ءوتىلى ءۇشىن سول مەملەكەت تاعايىندايدى جانە تولەيدى. كەلىسىم كۇشىنە ەنگەنگە دەيىن جيناقتالعان جۇمىس ءوتىلى ءۇشىن زەينەتاقى ەاەو-عا مۇشە مەملەكەتتەردىڭ زاڭناماسىنا جانە 1992 جىلعى 13 ناۋرىزداعى تاۋەلسىز مەملەكەتتەر دوستاستىعىنا قاتىسۋشى مەملەكەتتەر ازاماتتارىنىڭ زەينەتاقىمەن قامسىزداندىرۋ سالاسىنداعى قۇقىقتارىنىڭ كەپىلدىكتەرى تۋرالى كەلىسىمگە, ال بەلارۋس رەسپۋبليكاسى مەن رەسەي فەدەراتسياسى ءۇشىن – 2006 جىلعى 24 قاڭتارداعى رەسەي فەدەراتسياسى مەن بەلارۋس رەسپۋبليكاسى اراسىنداعى الەۋمەتتىك قامسىزداندىرۋ سالاسىنداعى ىنتىماقتاستىق تۋرالى شارتقا سايكەس تاعايىندالادى جانە تولەنەدى.
بۇدان بىلاي قازاقستان جۇمىس بەرۋشى ەڭبەك نەمەسە ازاماتتىق-قۇقىقتىق شارت جاساسۋ كەزەڭىندە قازاقستاندىق كاسىپورىندا ەڭبەك ەتەتىن ەاەو ەلى ازاماتىنىڭ (ارمەنيا, بەلورۋس, قىرعىزستان, رەسەي) تابىسىن, مىندەتتى زەينەتاقى جارناسىن جانە مىندەتتى كاسىپتىك زەينەتاقى جارناسىن مىندەتتى تۇردە اي سايىن ەسەپتەپ, ۇستاپ تۇرۋعا جانە ولاردى قازاقستاننىڭ زەينەتاقى زاڭناماسىندا بەلگىلەنگەن ءتارتىپ پەن شارتتارعا ساي بجزق-عا اۋدارىپ وتىرۋى ءتيىس.
«بۇل بولاشاقتا ەڭبەككەرگە قازاقستاندىق زاڭنامادا كوزدەلگەن زەينەتكەرلىك جاسقا تولعان كەزدە نەمەسە مۇگەدەكتىگى مەرزىمسىز بولىپ بەلگىلەنگەن بولسا, I جانە II توپتارداعى مۇگەدەكتىك بەلگىلەنگەن كەزدە ءوزى قالىپتاستىرعان زەينەتاقى جيناقتارى ەسەبىنەن بجزق-دان زەينەتاقى تولەمدەرىن الۋ قۇقىعىن قامتاماسىز ەتۋگە مۇمكىندىك بەرەدى» دەلىنگەن قۇزىرەتتى ورگان حابارلاماسىندا.
كەلىسىم ەرەجەسىنە سايكەس ەگەر ەڭبەكشىنىڭ ءبىر مەملەكەت اۋماعىنداعى جۇمىس ءوتىلى زەينەتاقى الۋعا جەتكىلىكسىز بولسا, وندا ەاەو-نىڭ باسقا ەلدەرىندە, ونىڭ ىشىندە مۇنداي جۇمىس ءوتىلى ۋاقىت بويىنشا سايكەس كەلەتىن جاعدايلاردى قوسپاعاندا, كەلىسىم كۇشىنە ەنگەنگە دەيىن جيناقتاعان جۇمىس ءوتىلى ەسكەرىلەدى. ول ءۇشىن بەس ەلدىڭ قۇزىرەتتى ورگاندارى ەۋرازيالىق ەكونوميكالىق كوميسسيامەن بىرلەسە وتىرىپ ءتيىستى اقپاراتتاردى الماسىپ وتىرادى.
سونداي-اق مۇگەدەكتىگى بويىنشا زەينەتاقى تولەمدەرىن تاعايىنداۋ ءۇشىن مەديتسينالىق تەكسەرۋدەن وتكىزۋ ەڭبەككەردىڭ تۇرعىلىقتى ەلىنىڭ زاڭناماسى بويىنشا, ال مۇگەدەكتىك توبى مەن مەرزىمىن بەلگىلەۋ ءۇشىن كۋالاندىرۋ ەڭبەككەر جۇمىسقا ورنالاسقان, مۇگەدەكتىك بويىنشا زەينەتاقى تاعايىندايتىن ەلدىڭ زاڭناماسى بويىنشا جۇرگىزىلەتىن بولادى.
