وقيعا 2019 جىلدىڭ شىلدە ايىندا بولعان. ەرلى-زايىپتىلار ورال قالاسىنداعى تۋريستىك اگەنتتىكتەرىنىڭ بىرىنە جۇگىنەدى. جاسالعان كەلىسىم شارتقا سايكەس, ولار قىركۇيەك ايىنىڭ 9-16 ارالىعىندا سامارا قالاسىنان ۇشۋ ارقىلى تۇركيانىڭ انتاليا كۋرورتىنا تۋر جوسپارلاعان. تۋردىڭ قۇنى 481 980 تەڭگەنى تولىق تولەگەن. الايدا سامارا قالاسىنىڭ حالىقارالىق كۋرۋموچ اۋەجايىندا ورالدىق تۋريستەر كورسەتىلگەن رەيستىڭ جولاۋشىلار تىزىمىندە جوق ەكەندىگى انىقتالادى. اۋەجاي مەنەدجەرى اگەنتتىكتىڭ ەلەكتروندى بيلەتتەرى قولدان جاسالعان دەپ مالىمدەيدى.
ورالعا قايتىپ كەلگەن ەرلى-زايىپتى اگەنتتىكتىڭ يەسىنە تالاپ-حات جىبەرگەن. الايدا تۋروپەراتوردىڭ كىناسىنەن ساياحاتتىڭ شىرقى بۇزىلدى دەگەندى العا تارتقان ولار كىناسىن مويىندامايدى. اباي پوليتسيا بولىمىنە جولدانعان ءوتىنىش تە ەش ناتيجە بەرمەيدى. ءوتىنىش تىركەلگەنىمەن, كەلىسىم-شارتتىق قاتىناستارعا سىلتەمە جاسالىپ, قاراۋسىز قالدىرىلادى.
وسىدان كەيىن ساياحاتشىلار سوتقا جۇگىنۋگە ءماجبۇر بولدى.
ورال قالاسىنىڭ №2 سوتى ازاماتتىق ءىستى قاراۋ كەزىندە «ك» جەكە كاسىپكەرى تۋريستىك اگەنتتەردىڭ مەملەكەتتىك ەلەكتروندىق تىزىمىنە ەنگىزىلمەگەنىن انىقتالدى. سونىمەن قاتار, ناقتى قۇجاتتاردىڭ ورنىنا جاۋاپكەر تالاپكەرلەرگە جالعان تۋريستىك پاكەت بەرگەن. اتاپ ايتقاندا تۋروپەراتوردىڭ «Sanmar» ۆاۋچەرى, ال ۆاۋچەردىڭ تومەنگى جاعىندا «Space Travel» تۋروپەراتورى دەپ كورسەتىلگەن. ناقتى جولدامالاردا ەكى ءتۇرلى وپەراتوردىڭ اتى-ءجونى بولماۋى كەرەك جانە تۇپنۇسقادا بەرىلۋى كەرەك. سونىمەن بىرگە تۋرپاكەتكە اقى تولەۋ كەزىندە قولما-قول تۇبىرتەك بەرىلىپ, فيسكالدى تۇبىرتەك بەرىلمەگەن.
كومپانيانىڭ جاۋابىنا قاراعاندا «ك» جەكە كاسىپكەرى ولارمەن ەشقاشان ىنتىماقتاستىق تۋرالى كەلىسىم جاساماعان بولىپ شىقتى. ەكسكۋرسياعا ۇسىنىلعان قۇجاتتار تۇپنۇسقا بولا المايتىندىعى انىقتالدى. ويتكەنى «Sanmar» تۋروپەراتورىندا وزىندىك جولدامالار بار, ونى وزگەرتۋ مۇمكىن ەمەس بولاتىن.
وسى دالەلدەر جينالا كەلە, تۋريستىك قىزمەتتەردى كورسەتۋ كەلىسىمشارتى جالعان دەپ تانىلدى. كەلىسىمشارت بويىنشا تولەمنىڭ بارلىق سوماسىن جانە سوت شىعىندارىن ءوندىرۋ تۋرالى تالاپ قاناعاتتاندىرىلدى.
ءوز كەزەگىندە سوت تۋراگەنتتىڭ ءىس-ارەكەتىندە قىلمىستىق قۇقىق بۇزۋشىلىقتىڭ بار-جوقتىعىن باعالاۋ ءۇشىن ورال قالاسىنىڭ پروكۋرورىنا, سونداي-اق اگەنتتىك قىزمەتىنىڭ زاڭدىلىعىن تەكسەرۋ ءۇشىن مەملەكەتتىك كىرىستەر دەپارتامەنتىنە حابارلاما جولداعان بولاتىن.
وسى جەكە قاۋلىلار بويىنشا مەملەكەتتىك كىرىستەر دەپارتامەنتى سوتتالۋشىنى اكىمشىلىك جاۋاپكەرشىلىككە تارتتى, ال پروكۋراتۋرا الاياقتىق فاكتىسى بويىنشا سوتقا دەيىنگى تەرگەۋدى باستاپ, ونىڭ ماتەريالدارى سوتقا جىبەرىلدى.
- بۇگىنگى كۇنى ورال قالالىق سوتىنىڭ ۇكىمىمەن تۋريستىك كومپانيانىڭ يەسى الاياقتىق قىلمىسى بويىنشا كىنالى دەپ تانىلىپ, 4 جىل مەرزىمگە باس بوستاندىعى شەكتەلدى. ول جازاسىن وتەۋدىڭ بارلىق كەزەڭىندە جىلىنا 100 ساعات ءماجبۇرلى جۇمىسقا تارتىلادى, - دەيدى باتىس قازاقستان وبلىستىق سوتىنىڭ ءباسپاسوز حاتشىسى نۇرگۇل قاناتباەۆا.
