وتكەن جىلى جەو-2-ءنى جاڭعىرتىپ, ونى تابيعي گازعا اۋىستىرۋعا بايلانىستى كوپجىلدىق ماسەلە شەشىمىن تاپتى. جەكەمەنشىك سەكتوردى تولىق گازداندىرۋ جۇمىسى اياقتالۋدا. جاسىل قوردى ۇلعايتۋ بويىنشا اۋقىمدى جۇمىستار جۇرگىزىلۋدە. ميلليون اعاش ەگۋ بويىنشا ءۇش جىلدىق «جاسىل الماتى» باعدارلاماسى قابىلداندى. 2020 جىلى 282 مىڭنان استام جاسىل جەلەك وتىرعىزىلدى.
قوعامدىق كولىك گازبەن ەلەكتر ەنەرگياسىنا اۋىسادى.
ديزەل تەحنيكاسىن ساتىپ الۋعا تىيىم سالىندى. «الماتىەلەكتروترانس» كوممۋنالدىق اۆتوپاركى 150 اۆتوبۋس جەتكىزۋگە كەلىسىمشارت جاسادى. العاشقى 41 اۆتوبۋس باعىتى جولعا شىقتى. قالعان 109-ى جاقىن ارادا كەلەدى. سونىمەن قاتار, جەكە تاسىمالداۋشىلار 83 اۆتوبۋس, سونىڭ ىشىندە 38 ەلەكتروبۋس ساتىپ الۋدى جوسپارلاپ وتىر. وسىلايشا بيىل جولاۋشىلار تاسىمالى پاركىن ەكولوگيالىق تازا 233 بىرلىككە جاڭارتامىز.
قالا ەكولوگياسىن جاقسارتۋ اياسىندا بيىل 350 مىڭنان استام جاسىل جەلەك وتىرعىزۋ, سونداي-اق شەتكەرى جەرلەردە بەس جاڭا ساياباق سالۋ, قالاعا كىرە بەرىستە 19 ەكوپوست ورناتۋ جوسپارلانعان.
وتكەن جىلى قالا بويىنشا حالىقتى كەڭىنەن قۇلاقتاندىرۋ ماقساتىندا اۋا قۇرامىنا مونيتورينگ جۇرگىزەتىن 10 داتچيك ورناتىلدى. بيىل تاعى 10 داتچيك قويىلادى. دەرەكتەر LED-ەكراندا كورسەتىلىپ, ونلاين-كارتادا كورىنەتىندەي ەكولوگيالىق دەرەكتەردىڭ بىرىڭعاي بازاسىنا تۇسەدى. ستانسالار اتموسفەراداعى لاستاۋشى زاتتاردىڭ كولەمىن, ىلعالدىلىق پارامەترلەرىن, تەمپەراتۋرانى, قىسىمدى, جەلدىڭ باعىتى مەن جىلدامدىعىن ولشەيدى. بۇعان قوسا كەزەڭ ىشىندەگى جانە تاۋلىكتىك ورتاشا شەكتى رۇقسات ەتىلگەن كونتسەنتراتسيا كولەمى كورسەتىلەدى. قالا اكىمى ب.ساعىنتاەۆتىڭ تاپسىرماسىمەن جۇزەگە اسقان بۇل جوبانىڭ ماقساتى – قاتارداعى قالا تۇرعىندارىنا, ساراپشىلار مەن ماماندارعا دەرەكتەردى ونلاين فورماتتا ۇسىنۋ بولىپ تابىلادى.
قوعامدىق جانە كوممۋنالدىق اۆتوپاركتەردى ەكولوگيالىق تازا وتىنعا اۋىستىرۋ شارالارىمەن قاتار ترانزيتتىك جۇك كولىكتەرىنىڭ قوزعالىسىن شەكتەۋ مۇمكىندىگى زەرتتەلۋدە. جۇرگىزىلگەن مونيتورينگ تاۋلىك سايىن قالاعا قورشاعان ورتاعا تەحنوگەندىك اۋىرتپالىق تۇسىرەتىن 17 مىڭنان استام جۇك كولىگى كىرەتىنىن كورسەتتى.
