قولدا بار رەسۋرس پەن كۇشتىڭ ەداۋىر بولىگى كوروناۆيرۋسقا قارسى ءىس-قيمىلعا جۇمسالعانىنا قاراماستان 2020 جىلى الماتىنى دامىتۋدىڭ باسىم باعىتتارى بويىنشا جۇمىس توقتاعان جوق. قالا شەتىندەگى ينفراقۇرىلىمدى جاقسارتۋ ءۇشىن «جاڭا الماتىنى» دامىتۋدىڭ 5 جىلدىق كەشەندى جوسپارى قابىلداندى. 200 ملرد تەڭگەگە 504 جوبانى ىسكە اسىرۋ باستالدى.
«پاندەميانىڭ ەكونوميكاعا تيگىزگەن قىسىمىنا قاراماستان, ءبىز «شەتسىز قالا» قاعيداتى بويىنشا دامۋدى جالعاستىردىق. وزدەرىڭىز بىلەتىندەي, بۇل مەنىڭ تۇبەگەيلى تاڭداۋىم. مەن وسى باعىتتا جۇمىستى جالعاستىرامىن. ءاربىر الماتىلىق تۇرعىلىقتى جەرىنە قاراماستان تەڭ ءومىر ءسۇرۋ ستاندارتىنا يە بولۋى ءتيىس», دەدى قالا اكىمى باقىتجان ساعىنتاەۆ.
قالاعا قوسىلعان ىقشاماۋدانداردىڭ ينجەنەرلىك ينفراقۇرىلىمىن دامىتۋ شەڭبەرىندە 2020 جىلى 50 مىڭنان استام ادامدى قامتيتىن 300 شاقىرىم سۋ قۇبىرى مەن كارىز جەلىلەرى سالىندى. 16,1 شاقىرىم جىلۋمەن جابدىقتاۋ جەلىلەرى قايتا جاڭارتىلدى. الماتىنىڭ ءتورت اۋدانىن 100 پايىز قامتي وتىرىپ, قالا شەتىندەگى كوشەلەرگە جارىق جۇيەسى جۇرگىزىلدى. 42,8 شاقىرىم جول سالىنىپ, 219,1 شاقىرىم جول جوندەلدى. ۇزىندىعى 86 شاقىرىمعا جەتەتىن جاياۋ جۇرگىنشىلەر جولى جوندەلدى.
بيىل «جاڭا الماتى» كەشەندى جوسپارى اياسىندا ينجەنەرلىك جانە كولىك ينفراقۇرىلىمىن دامىتۋ جالعاسادى. 40,4 شاقىرىم جاڭا جول سالىنىپ, 200 شاقىرىمنان استام جولدى ورتاشا جوندەۋدەن وتكىزىپ, ءۇش جول ايرىعىنىڭ قۇرىلىسىن جالعاستىرۋ جانە ءتورت كوشەنى تەسۋ بويىنشا جوبالار جوسپارلانۋدا. سونداي-اق, «سارىارقا» جانە «دوستىق» مەترو ستانسالارىنىڭ قۇرىلىسىن اياقتاۋ جانە «قالقامان» ستانساسىنىڭ قۇرىلىسىن جالعاستىرۋ كوزدەلۋدە.
ينجەنەرلىك جەلىلەر بويىنشا بىرقاتار پروبلەمالاردى جۇيەلى شەشۋ ءۇشىن «اقساي» سۋ جيناۋ ستانساسى, ناۋرىزباي اۋدانىندا كوللەكتور سالىناتىن بولادى. بۇدان وزگە 170 شاقىرىم سۋ قۇبىرى مەن 145 شاقىرىم كارىز جەلىلەرىنىڭ قۇرىلىسى جۇرگىزىلەدى.
