كوللاجدى جاساعان قونىسباي شەجىمباي
ەۋرازيالىق دامۋ بانكىنىڭ جاقىندا جاريالاعان ساراپتاماسىندا ۇلتتىق ۆاليۋتالاردىڭ قازىرگى احۋالى جانە كەلەشەكتەگى ءوسۋ الەۋەتىنە تالداۋ جاسالدى. رەسەي مەن قازاقستان اراسىنداعى ساۋدادا تەڭگەنىڭ ۇلەسى 5 پايىزعا جەتكەن. 2013 جىلى بۇل كورسەتكىش نەبارى 2 پايىزدى قۇراعان ەدى. ءۇشىنشى ەلدەرمەن ساۋدا-ساتتىقتا ەاەو ۇلتتىق ۆاليۋتالارىنىڭ يمپورت تولەمدەرىنە قىزمەت كورسەتۋدەگى ۇلەسى شامامەن 24 پايىز بولعان. ال ەكسپورتتاعى ۇلتتىق ۆاليۋتالاردىڭ ۇلەسى بار بولعانى 9 پايىزعا جەتكەن. بۇل تولەمدەر نەگىزىنەن دوللارمەن جۇزەگە اساتىن وتىن-ەنەرگەتيكالىق ونىمدەر ەكسپورتىنىڭ ەداۋىر ۇلەسىمەن بايلانىستى.
«قازاقستاننىڭ ەاەو ەلدەرىمەن ساۋدا بايلانىسىندا تەڭگە ۇلەسى رۋبل ۇلەسىنە قاراعاندا از. الايدا ساۋدا وپەراتسيالارىنا كورسەتىلگەن قىزمەتتەردە تەڭگە بەلسەندى پايدالانىلىپ ءجۇر. اسىرەسە ونىڭ ايتارلىقتاي ۇلەسىن قىرعىزستانمەن ساۋدا قاتىناسىنان بايقاۋعا بولادى. ەگەر قازاقستان مەن قىرعىزستان اراسىنداعى ساۋدادا تەڭگە ۇلەسى 2013 جىلى 15 پايىز بولسا, 2019 جىلى 19 پايىزعا جەتتى. رەسەي مەن قازاقستان اراسىنداعى ساۋدادا تەڭگە ۇلەسى 5 پايىزعا جەتتى», دەلىنگەن زەرتتەۋدە.
ەاەو ەلدەرىنىڭ ءۇشىنشى ەلدەرمەن يمپورتتىق ساۋدا بايلانىسىنداعى دوللار ۇلەسى جىل ساناپ تومەندەپ كەلە جاتىر دەيدى بانك. سوڭعى جەتى جىلدا دوللاردىڭ ۇلەسى 43-تەن 37 پايىزعا كەمىگەن. ال وداق ەلدەرى اراسىنداعى ساۋدا قاتىناسىنداعى ۇلتتىق ۆاليۋتا ۇلەسى 74 پايىزعا دەيىن جەتىپ وتىر.
بانكتىڭ جازۋىنشا, وداق ەلدەرى نەعۇرلىم دوللاردان الىستاعان سايىن سوعۇرلىم ەكونوميكاسى جاندانا تۇسپەك.
«ەاەو اياسىنداعى ينتەگراتسيالىق پروتسەستەر جالپى ەكونوميكالىق ماسەلەلەردى عانا ەمەس, ءوڭىر دامۋىنا سەرپىن بەرەتىن تەرەڭ پروبلەمالاردى شەشۋگە دە ىقپال ەتەدى. دوللارلانۋ دەڭگەيىنىڭ تومەندەۋى ەاەو ەلدەرىنىڭ ودان ءارى ءتيىمدى دامۋىنىڭ ماڭىزدى شارتتارىنىڭ ءبىرى», دەپ جازادى ەۋرازيالىق دامۋ بانكى.
دەگەنمەن دوللاردىڭ ۇستەمدىگىن ەشكىم دە تۇبەگەيلى جوققا شىعارا المايدى. الەمدىك رەزەرۆتىڭ 60 پايىزى دوللارمەن جاسالسا, ەۋروعا رەزەرۆتىك اكتيۆتەردىڭ 20 پايىزى تيەسىلى. بريتانيا فۋنتى مەن جاپون يەناسىنىڭ ۇلەسى 5 جانە 6 پايىزدى قۇراسا, قىتاي يۋانىنىڭ ۇلەسى 2 پايىزعا باعالانعان.
