ءمينيستردىڭ اقپاراتى بويىنشا, اۋىل شارۋاشىلىعىنىڭ جالپى ءونىم كولەمى قاڭتار ايىندا 2,5%-عا ارتىپ, 170 ملرد تەڭگەدەن اسقان. ءوسىم مال شارۋاشىلىعىنداعى ءوندىرىس كولەمىنىڭ 2,7%-عا, ياعني, 158,4 ملرد تەڭگەگە دەيىن ۇلعايۋى ەسەبىنەن قامتاماسىز ەتىلدى. بيىل جىلدىڭ العاشقى ايىندا سويىلعان مال ەتى ءوندىرىسى 5,3%-عا, ءسۇت ءوندىرىسى 3,8%-عا ءوستى. قاڭتاردا 10,2 ملرد تەڭگەگە وسىمدىك شارۋاشىلىعى ءونىمى ءوندىرىلدى. جالپى ءوسىم كولەمى جىلىجاي شارۋاشىلىقتارىنا تيەسىلى.
ازىق-ت ۇلىك ءوندىرىسى قاڭتار ايىندا 0,8%-عا, ياعني, 142,1 ملرد تەڭگەگە دەيىن ءوستى. اتاپ ايتقاندا, وسىمدىك مايىنىڭ ءوندىرىسى 26,7%-عا (33 توننادان 42 مىڭ تونناعا دەيىن), قىزىلشا قانتى 25,1%-عا (4,6-توننادان 5,8 مىڭ تونناعا دەيىن), سارى ماي 16,3%-عا (1,4 مىڭ توننادان 1,6 مىڭ تونناعا دەيىن), وڭدەلگەن ءسۇت 3,2%-عا (48,2 مىڭ توننادان 49,7 مىڭ تونناعا دەيىن), ىرىمشىك پەن سۇزبە 0,8%-عا (2 358-توننادان 2 377 تونناعا دەيىن) ۇلعايدى.
سونداي-اق ۆەدومستۆا باسشىسى اۋىل شارۋاشىلىعى مينيسترلىگىنىڭ 2021 جىلعا ارنالعان جۇمىس جوسپارلارى تۋرالى دا حابارلادى.
بيىل جالپى اۋىل شارۋاشىلىعى ءونىمىنىڭ ءوسىمىن 105%-كە, تاماق ونىمدەرى ءوندىرىسىنىڭ ءوسىمىن 107% دەڭگەيىنە جەتكىزۋ جوسپارلانىپ وتىر.
جوسپارلى ينديكاتيۆتەرگە ىشكى نارىقتى الەۋمەتتىك ماڭىزى بار ازىق-ت ۇلىكتەرمەن تولىقتىرۋ جانە قازاقستان اگروونەركاسىپ كەشەنىنىڭ باسەكەگە قابىلەتتىلىگىن ارتتىرۋ جونىندە شارالار قابىلداۋدىڭ ناتيجەسىندە قول جەتكىزىلەدى. بۇل ءۇشىن اوك سۋبەكتىلەرىن مەملەكەتتىك قولداۋ, ونىڭ ىشىندە ينۆەستيتسيالىق سۋبسيديالاۋ, وسىمدىك شارۋاشىلىعى مەن مال شارۋاشىلىعىن سۋبسيديالاۋ جۇمىستارى جالعاساتىن بولادى. بۇل ماقساتقا شامامەن 309 ملرد تەڭگە بولىنەدى.
مەملەكەت باسشىسىنىڭ تاپسىرماسىنا سايكەس, سقو-دا ءداندى داقىلداردى, اقمولا وبلىسىندا مايلى داقىلداردى, اقتوبە جانە الماتى وبلىستارىندا ەت ءوندىرۋ جانە قايتا وڭدەۋ بويىنشا ەكوجۇيەلەردى قۇرۋعا باعىتتالعان ينۆەستيتسيالىق جوبالار ىسكە اسىرىلادى.
بۇدان بولەك, يمپورتتى الماستىرۋ ماقساتىندا بيىل 35 تاۋارلى ءسۇت فەرماسىن (جالپى قۋاتى 131 مىڭ توننا ءسۇت), 2 مىڭ گەكتاردان استام باقشا (وندىرىستىك قۋاتى جىلىنا 73,5 مىڭ توننا الما), 3 ەت كومبيناتىن (قۋاتى 45 مىڭ توننا ەت ونىمدەرى), 5 قۇس فابريكاسىن (قۋاتى 42 مىڭ توننا), بالىق وندىرەتىن 4 نىساندى (جالپى قۋاتى 8 مىڭ تونناعا جۋىق بالىق) ىسكە قوسۋ جوسپارلانعان. سونىمەن بىرگە, وندىرىستىك قۋاتى 150 مىڭ توننا بولاتىن قانت زاۋىتىنىڭ قۇرىلىسى باستالادى. جالپى, 2021-جىلى ءتۇرلى باعىتتاعى 79 ينۆەستيتسيالىق جوبانى ىسكە اسىرۋ جوسپارلانىپ وتىر.
سونىمەن قاتار, اۋىل شارۋاشىلىعى مينيسترلىگى كوكتەمگى ەگىس ناۋقانىنا دايىندىق جۇمىستارىن باستاپ كەتتى. جوسپار بويىنشا بيىل جالپى ەگىس القابى قوسىمشا 86,4 مىڭ گەكتارعا ۇلعايىپ, 22,7 ملن گەكتارعا دەيىن جەتەتىن بولادى. مايلى, ازىقتىق, كوكونىس-باقشا داقىلدارىنىڭ, سونداي-اق قاراقۇمىق پەن قانت قىزىلشاسى سياقتى الەۋمەتتىك داقىلداردىڭ القاپتارىن ۇلعايتۋ جوسپارلانعان. ال, بيداي, كۇرىش جانە ماقتا سياقتى مونوداقىلدار مەن ىلعالدى كوپ قاجەت ەتەتىن داقىلدار ەگىلەتىن القاپتار قىسقارتىلادى.
«كوكتەمگى ەگىس جۇمىستارىن ۋاقتىلى جۇرگىزۋ ءۇشىن فەرمەرلەر 70 ملرد تەڭگەنىڭ جەڭىلدەتىلگەن نەسيەسىمەن, سونداي-اق 380 مىڭ تونناعا جۋىق كولەمدە 11%-عا ارزانداتىلعان جانار-جاعار مايمەن قامتاماسىز ەتىلەدى. سونىمەن قاتار, فەرمەرلەرگە كومەك رەتىندە 350 مىڭ تونناعا جۋىق اۋىل شارۋاشىلىق ونىمدەرىن فورۆاردتىق ساتىپ الۋ جوسپارلانۋدا. تۇقىم شارۋاشىلىعىن سۋبسيديالاۋعا 11,8 ملرد تەڭگە بولىنەدى. بۇل ساپالى تۇقىمعا قول جەتكىزۋ مۇمكىندىگىن ارتتىرادى. كوكتەمگى دالا جۇمىستارىن جۇرگىزۋ مينيسترلىكتىڭ ەرەكشە باقىلاۋىندا بولادى», دەدى مينيستر.
