كوروناۆيرۋس • 15 اقپان، 2021

قازاقستاندا «سپۋتنيك-V» ۆاكتسيناسىن تىركەۋ اياقتالدى

76 رەت كورسەتىلدى

قاراعاندى فارماتسەۆتيكالىق كەشەنى قازاقستان اۋماعىندا «گام-كوۆيد-ۆاك» («سپۋتنيك – V») كوروناۆيرۋستىق ينفەكتسياعا قارسى ۆاكتسينانى تىركەۋ ءراسىمىن اياقتادى، دەپ حابارلايدى Egemen.kz.

كاسىپورىننىڭ ءباسپاسوز قىزمەتى حابارلاعانداي، 2021 جىلعى 13 اقپاندا قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ساراپتاما ۇيىمىنىڭ، تىركەۋ دەرەكناماسىنىڭ ماتەريالدارىن قاراۋ ناتيجەسى بويىنشا ۆاكتسينانىڭ قاۋىپسىزدىگى، ساپاسى مەن تيىمدىلىگى تۋرالى قورىتىندىسى الىندى.

اتالعان قورىتىندى نەگىزىندە قر دسم مەديتسينالىق جانە فارماتسەۆتيكالىق باقىلاۋ كوميتەتىنە تىركەۋ كۋالىگىن الۋعا ءوتىنىم جولداندى.

وسىلايشا، قازاقستان «سپۋتنيك-V» ۆاكتسيناسىن قولدانۋدى ماقۇلداعان 27-ءشى مەملەكەت بولدى. بۇگىنگى كۇنى ۆاكتسينا رەسەي، بەلارۋس، ارگەنتينا، بوليۆيا، سەربيا، الجير، پالەستينا، ۆەنەسۋەلا، پاراگۆاي، تۇركمەنستان، ۆەنگريا، ءباا، يران، گۆينەيا رەسپۋبليكاسى، تۋنيس، ارمەنيا، مەكسيكا، نيكاراگۋا، سەرب رەسپۋبليكاسى (بوسنيا جانە گەرتسەگوۆينا ەنتيتەتى)، ليۆان، ميانما، پاكىستان، موڭعوليا جانە باحرەين سياقتى مەملەكەتتەردە تىركەلگەن.

ەستەرىڭىزگە سالا كەتەيىك، قازاقستاندا ۆاكتسينا ءوندىرۋ تۋرالى شەشىم قر دەنساۋلىق ساقتاۋ مينيسترلىگى مەن رەسەيدىڭ تىكەلەي ينۆەستيتسيالار قورىنىڭ كوميسسياسى قازاقستاندىق فارماتسەۆتيكالىق كاسىپورىندارىنا جۇرگىزىلگەن ساراپتامالارىنىڭ ناتيجەسىندە قابىلدانعان بولاتىن. قفك الاڭى رەسەيلىك سۋبستانتسيادان دايىن ءونىمدى وندىرۋگە اناعۇرلىم دايىن بولىپ شىقتى. رتيق ماماندارى جۇرگىزگەن تەحنيكالىق اۋديت ناتيجەسى وندىرىستىك الاڭنىڭ كوروناۆيرۋسقا قارسى ۆاكتسينانىڭ دايىن ءتۇرىن شىعارۋ ءۇشىن بارلىق تالاپتارعا سايكەس كەلەتىنىن راستادى.

الدىن الا ەسەپتەۋلەر بويىنشا، وسى جىلدىڭ اقپان ايىنىڭ سوڭىندا ەلىمىزدىڭ بارلىق وڭىرلەرىنە قفك وندىرگەن «سپۋتنيك - V» ۆاكتسيناسىنىڭ 90 مىڭعا جۋىق دوزاسىن جەتكىزۋ جوسپارلانۋدا.

دەنساۋلىق ساقتاۋ مينيسترلىگىندە اتاپ وتكەندەي، قازاقستاندا ءوز ازىرلەۋشىلەرىنىڭ بولۋى، سونداي-اق ۆاكتسينالار ءوندىرىسى ءۇشىن جەرگىلىكتى الاڭداردىڭ بولۋى – بۇل ۆاكتسينامەن قامتاماسىز ەتۋگە بايلانىستى تاۋەكەلدەردى ازايتۋعا جانە ەلىمىزدىڭ ەپيدەميولوگيالىق احۋالىنىڭ تۇراقتانۋىنا ەلەۋلى ىقپال ەتۋگە مۇمكىندىك بەرەدى.

سوڭعى جاڭالىقتار

پرەزيدەنت الماتى اكىمىن قابىلدادى

پرەزيدەنت • بۇگىن، 14:07

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

ۇقساس جاڭالىقتار