ۇزدىكتەر نۇر-سۇلتاندا باس قوستى

بايراقتى باسەكەنىڭ اشىلۋ سالتاناتىنا مادەنيەت جانە سپورت ءمينيس­ترى اقتوتى رايىمقۇلوۆا، نۇر-سۇلتان قالاسى جەڭىل اتلەتيكا فەدەراتسياسىنىڭ باسشىسى، ەلوردا اكىمى التاي كولگىنوۆ، وليمپيادا چەمپيونى سەرىك ساپيەۆ جانە جازعى وليمپيادا ويىندارىنىڭ جۇلدەگەرى، جەڭىل اتلەت دميتري كارپوۆ ءسوز سويلەپ، جارىسقا قاتىسۋشىلارعا ساتتىلىك تىلەدى.

مينيستر ءوز سوزىندە ەلىمىزدە جاس­تاردىڭ جەڭىل اتلەتيكاعا دەگەن قىزىعۋشىلىعى جوعارى ەكەندىگىن اتاپ ءوتتى. «پرەزيدەنت قاسىم-جومارت توقاەۆ قازاقستان حالقىنا جولداۋىندا وسكەلەڭ ۇرپاقتىڭ سپورتتىق جانە شىعارماشىلىق الەۋەتىنە اسا نازار اۋدارۋ قاجەت ەكەندىگىن ايتقان بولاتىن. وسى ورايدا بۇقارالىق، بالالار-جاسوسپىرىمدەر سپورتىن دامىتىپ، ءار وبلىستا، ءىرى اۋدان ورتالىقتارىندا سپورت ۇيىرمەلەرىن اشۋ قاجەت. سپورتتىق ينفراقۇرىلىمعا دا اسا دەن قويۋ كەرەك. مينيسترلىك وسى باعىتتا جۇمىس جاساپ جاتىر. بۇگىنگى تاڭدا، قازاقستاننىڭ جەڭىل اتلەتتەرى وليمپيا ويىندارىندا، دۇنيەجۇزىلىك چەمپيوناتتار مەن حالىقارالىق جارىستاردا جوعارى نا­تي­جەلەردى كورسەتىپ، جەڭىمپازدار مەن جۇلدەگەرلەر اتاندى. تاۋەلسىز ەلىمىزگە تۇڭعىش التىن مەدالدى 2000 جىلى سيدنەيدە (اۋستراليا) وتكەن وليمپيا ويىنداردا كەدەرگى ار­قىلى جۇگىرۋشى ولگا شيشيگينا اكەلدى. جەڭىل اتلەتيكا سپورتىندا دميتري كارپوۆ، ولگا رىپاكوۆا سەكىلدى الەم مويىنداعان سپورتشىلارىمىز بار. الداعى ۋاقىتتا دا رۋحى مىقتى، قازاقستان سپورتىن الەمگە تانىتاتىن جاس سپورتشىلار شىعادى دەگەن ۇمىتتەمىز. جارىسقا قاتىسۋشىلارعا ساتتىلىك تىلەيمىن»، دەدى اقتوتى رايىمقۇلوۆا.

ەلوردا اكىمى التاي كولگىنوۆ نۇر-سۇلتان قالاسى ەلىمىزدەگى سپورتتىق قالالاردىڭ ءبىرى دەگەن اتقا لايىق ەكەنىن ايتىپ، Qazaqstan جەڭىل اتلەتيكا كەشەنى بىزگە حالىقارالىق دەڭگەيدەگى جارىستار وتكىزىپ قانا قوي­ماي، زاماناۋي سپورت جۇلدىزدارى مەن جاتتىقتىرۋشىلاردى تاربيەلەپ، جاستارىمىزدى بالا كۇنىنەن سپورتپەن شۇعىلدانۋىنا مۇمكىندىك بەرەتىنىن جەتكىزدى.

– مەملەكەت باسشىسىنىڭ تاپسىرماسى بويىنشا سپورت نىساندارىنىڭ قولجەتىمدىلىگىن ارتتىرۋ جانە قالا تۇر­عىندارىن بۇقارالىق سپورتقا قى­زىقتىرۋ بويىنشا ءتيىستى جۇمىستار جۇرگىزىلىپ جاتىر. بالالار مەن جاس­وسپىرىمدەر سپورتىنا، فەدەراتسيالارعا قولداۋ كور­سەتەمىز»، دەدى نۇر-سۇلتان قالاسى جەڭىل اتلەتيكا فەدەراتسيا­سى­نىڭ باسشىسى، ەلوردا اكىمى ا.كولگىنوۆ.

نۇر-سۇلتان قالاسىنىڭ اشىق چەمپيوناتىنا ەلوردا سپورتشىلارىنان بولەك، ەلىمىزدىڭ سقو، قاراعاندى، اقمولا، قوستاناي وبلىسى جانە شىم­كەنت قالاسىنان كەلگەن 150-دەن استام سپورتشىسى جارىس كورىگىن قىزدىرىپ، باس جۇلدە ءۇشىن باق سىنادى. ولار جەڭىل اتلەتيكانىڭ 5 ءتۇرى، ياعني يادرو لاقتىرۋ، 4ح200م ارالاس ەستافە­تا، ۇزىن­دىققا سەكىرۋ، جۇگىرۋ جانە جەڭىل اتلەتيكالىق ءجۇرىس بويىنشا جۇل­دەلەردى ساراپقا سالدى.

ەستەرىڭىزگە سالا كەتەيىك، Qazaqstan جەڭىل اتلەتيكا كەشەنى وتكەن جىلدىڭ كۇزىندە سپورتشىلار ءۇشىن ەسىگىن ايقارا اشقان بولاتىن. بۇل ورىن IAAF-ءتىڭ بارلىق تالابىنا سايكەس كەلەدى. مۇندا رەسپۋبليكالىق جانە حالىقارالىق جارىستار، سونىڭ ىشىندە الەم چەمپيوناتتارى مەن وليمپيا ويىندارىن وتكىزۋگە مۇمكىندىك بار. سپورت كەشەنىندە جۇگىرۋ جولدارى ورناتىلعان اتلەتيكالىق الاڭ، ترەناجەر زالى جانە يادرو لاقتىرۋعا، بيىكتىككە، ۇزىندىققا سەكىرۋگە ارنال­عان سەكتورلارى، بالالار الاڭى، باسسەيندەر سەكىلدى ارتىقشىلىقتارى بار. مانەج 7000 كورەرمەنگە ەسەپتەلگەن. اتالعان چەمپيونات جەڭىل اتلەتيكالىق كەشەنىندە وتكىزىلىپ وتىرعان العاشقى تۋرنير. جۋىق ارادا بۇل جەردە IX ازيا چەمپيوناتى وتەدى دەپ جوسپارلانۋدا.