ايتا كەتۋ كەرەك, ءدال وسىنداي ءىس-شارا ەكى جىل بۇرىن نۇر-سۇلتان قالاسىندا وتكىزىلىپ, وعان ەكى ەلدىڭ 100-دەن استام بيزنەس وكىلى قاتىسقان بولاتىن.
قازاقستاننىڭ 13 وڭىرىنەن 60-تان استام كومپانيا مەن مەملەكەتتىك ورگانداردىڭ وكىلدەرى ەنگەن دەلەگاتسيانى سىرتقى ىستەر ءمينيسترىنىڭ ورىنباسارى الماس ايداروۆ باستاپ باردى. مىسىر تاراپىنان فورۋمعا بيزنەس-قوعامداستىقتىڭ 200-دەن استام وكىلى, سونداي-اق مىسىر سىرتقى ىستەر ءمينيسترىنىڭ ورىنباسارى تاريك ءال-ۋاسيمي, وڭتۇستىك سيناي پروۆينتسياسىنىڭ گۋبەرناتورى, گەنەرال حالەد فۋدا, مىسىر ساۋدا پالاتالارى فەدەراتسياسىنىڭ باسشىسى يبراحيم ءال-ارابي قاتىستى.
فورۋمدا ءسوز العان قازاقستاننىڭ مىسىر اراب رەسپۋبليكاسىنداعى توتەنشە جانە وكىلەتتى ەلشىسى قايرات لاما شاريف:
ء«بىزدىڭ ەلىمىز ەگيپەتتى افريكانىڭ «قاقپاسى» رەتىندە قاراستىرا وتىرىپ, قازاقستان-مىسىر ىسكەرلىك كەڭەسى مەن ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كومەگىمەن ەكسپورتتى ىلگەرىلەتۋگە دايىن. ەاەو-عا مۇشە ەلدەر مەن مىسىر اراسىنداعى ەركىن ساۋدا تۋرالى كەلىسىمگە قول قويۋ قازاقستاندىق ءونىم ەكسپورتىن ۇلعايتۋعا قوسىمشا سەرپىن بەرەدى, بۇل حالقى 100 ملن ادامنان اساتىن مىسىر نارىعىنا جول اشادى», دەپ اتاپ ءوتتى.
سپيكەرلەردىڭ ايتۋىنشا, ءونىمنىڭ قىمباتتاۋى جانە ەكى ەل اراسىنداعى ساۋدا قارقىنىنىڭ باياۋلاۋى مەملەكەتتەردىڭ اراسى الىستىعىنا بايلانىستى. سوعان قاراماستان, قازاقستاننىڭ تاۋار اينالىمىن 4 ەسەگە جۋىق ۇلعايتۋعا مۇمكىندىگى بار. «بۇل تۇرعىدا قازاقستاندىق كومپانيالار 300 ملن دوللارعا جۋىق سوماعا ساپالى تاۋارلار ۇسىنا الادى», دەدى ساۋدا جانە ينتەگراتسيا ۆيتسە-ءمينيسترى قايرات تورەباەۆ.
وسى باعىتتاعى جۇمىستى جانداندىرۋ الداعى ۋاقىتتا بولاتىن مىسىر سىرتقى ىستەر ءمينيسترىنىڭ قازاقستانعا العاشقى رەسمي ساپارىمەن, سونداي-اق ەكى ەل اراسىندا كەزەكتى ساياسي جانە كونسۋلدىق كونسۋلتاتسيالار وتكىزۋمەن بايلانىستى.
ءىس-شارا بارىسىندا «قازاقستاندا جاسالعان» امبەباپ كورمە ۇيىمداستىرىلىپ, وندا قازاقستاندىق وندىرۋشىلەردىڭ افريكا قۇرلىعىنا ەكسپورتتايتىن ونىمدەرى ۇسىنىلدى. سونىمەن قاتار وتاندىق جانە مىسىرلىق كومپانيالار اراسىندا ەكىجاقتى كەلىسسوزدەر جۇرگىزىلىپ, بىرقاتار ەكونوميكالىق قۇجاتقا قول قويىلدى.
«ەگەمەن-اقپارات»
