باتىس قازاقستان وبلىستىق تج دەپارتامەنتىنىڭ ءباسپاسوز قىزمەتى ءمالىم ەتكەنىندەي, وقيعا 14 اقپان كۇنى ورال-اتىراۋ جولى بويىندا اقجايىق اۋدانى سامال اۋىلى تۇسىندا بولدى.
ساعات 13.30-دا بەلارۋس ازاماتى اۋا رايىنىڭ قولايسىزدىعىنان (جولدىڭ ناشار كورىنۋى سالدارىنان) Skania جۇك كولىگىمەن جول شەتىندە توقتاپ تۇرعان Toyota Camry جانە Volkswagen Passat اۆتوكولىكتەرىنە بارىپ سوعىلعان.
بقو تج دەپارتامەنتى اپاتتىق مەديتسينالىق ورتالىعى تراسسالىق-مەديتسينالىق قۇتقارۋ بەكەتىنىڭ قىزمەتكەرلەرى 5 ادامعا العاشقى مەديتسينالىق كومەك كورسەتىپ, اقجايىق اۋداندىق ورتالىق اۋرۋحاناسىنا جەتكىزدى.
دارىگەر قاراعاننان كەيىن ءتورت ادام امبۋلاتورلىق ەمدەۋگە جىبەرىلدى. 23 جاستاعى جۇكتى كەلىنشەك اۋرۋحانادا دارىگەر باقىلاۋىندا قالدىرىلدى. ەسكە سالا كەتەيىك, بۇدان بۇرىن باتىس قازاقستاندا بورانعا بايلانىستى جولدار جابىلعانىن جازعان بولاتىنبىز.
