الەم • 13 اقپان، 2021

ازەربايجاندا ۆاكتسينا سالدىرعاندار قايتا اۋىرعان جوق

ازەربايجاندا مىڭداعان مەديتسينا قىزمەتكەرى ۆاكتسينا الىپ، ەشقايسىسى دا دەنساۋلىق جاعدايىنا شاعىمدانعان جوق. بۇل تۋرالى ۆەلي احۋندوۆ اتىنداعى مەديتسينالىق پروفيلاكتيكا عىلىمي-زەرتتەۋ ينستيتۋتىنىڭ ديرەكتورى اديل اللاحۆەرديەۆ ءمالىم ەتتى، دەپ حابارلايدى Egemen.kz

ايىم ءداۋىت

ا. اللاحۆەرديەۆتىڭ ايتۋىنشا، ۆاكتسينالاردىڭ بارلىعىنىڭ دا جەتىلمەگەن جاقتارى بولۋى مۇمكىن. سونداي-اق، ولار جۇيەلى جانە ناقتى ءبىر ماسەلەگە بايلانىستى بولادى.

«جۇيەلى تۇردەگى جاناما اسەرلەرى – دەنە قىزۋى، السىزدىك، بۇلشىقەت اۋىرۋى جانە ت.ب. جەرگىلىكتى اسەر – بۇل ۆاكتسينا ەگىلگەن جەردەگى قىزارۋ، اۋىرسىنۋ. قازىردىڭ وزىندە 60 مىڭنان استام مەديتسينا قىزمەتكەرى ۆاكتسينا الدى. باقىلاۋ جۇمىستارى كورسەتكەندەي، ادامداردا كۇردەلى اسقىنۋلار بايقالماعان. مەن ءوزىم ۆاكتسينا الدىم. دوستارىم سياقتى ەشقانداي شاعىمىم جوق»، دەدى عىلىمي-زەرتتەۋ ينستيتۋتىنىڭ باسشىسى.

دارىگەر تۇركيادا دا، ازەربايجاندا دا ۆاكتسينا العاندار اراسىندا كوروناۆيرۋستى قايتا جۇقتىرۋ جاعدايلارى بولماعانىن اتاپ ءوتتى. بۇگىنگى كۇنگە دەيىن ازەربايجاندا قولدانىلاتىن «Coronovac» ۆاكتسيناسىنىڭ تيىمسىزدىگى تۋرالى ەشقانداي اقپارات جوق.

ا.اللاحۆەرديەۆ بۇدان بۇرىن ايتقانىنداي، ازەربايجانعا جەتكىزىلگەن قىتايلىق «Coronavac» ۆاكتسيناسى جويىلعان COVID-19 ۆيرۋسىنان جاسالعان.

«بۇل ۆاكتسينانىڭ ەڭ ۇلكەن ارتىقشىلىعى – ەكپەدەن كەيىنگى كەز-كەلگەن اۋرۋ بەلگىلەرىنىڭ بايقالماۋىندا. تاعى ءبىر ارتىقشىلىعى ۆاكتسينانى ساقتاۋعا ىڭعايلى»، دەپ سەندىردى ساراپشى.

ازەربايجان مينيسترلەر كابينەتى جانىنداعى جەدەل شتابتىڭ مالىمەتى بويىنشا، وتكەن تاۋلىكتە ەلدە تاعى 191 ادام كوروناۆيرۋس ينفەكتسياسىن جۇقتىرعان. 226 ادام ساۋىعىپ كەتكەنىمەن، 3 ادام قايتىس بولعان. بۇگىنگى كۇنگە دەيىن ەلدە كوروناۆيرۋس جۇقتىرعان 231 840 ادام تىركەلدى. ونىڭ 3173-ءى قايتىس بولدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز