بۇل - "Qazaqstan" جاڭا جەڭىل اتلەتيكا كەشەنىنىڭ قابىرعاسىندا ءوتىپ جاتقان العاشقى سپورتتىق ءىس-شارا. جارىسقا ەلىمىزدىڭ ءار وڭىرىنەن سپورتشىلار قاتىستى. ءىس-شارا سانيتارلىق نورمالاردى قاتاڭ ساقتاي وتىرىپ, جانكۇيەرسىز وتكىزىلدى. جارىس باعدارلاماسىندا يادرو لاقتىرۋ, جۇگىرۋ, ەستافەتا, ۇزىندىققا سەكىرۋ جانە جەڭىل اتلەتيكالىق ءجۇرۋ سياقتى سپورت تۇرلەرى بولدى.
«ەلىمىزدەگى سپورتتىق قالالاردىڭ ءبىرى دەگەن اتاۋدى ەلوردامىز لايىقتى يەلەنىپ كەلەدى! قالامىزدا ءوزىنىڭ سپورتتىق كلاستەرى بار. سونىمەن قاتار, حالىقارالىق تالاپتارعا ساي بىرقاتار ءىرى سپورت مەكەمەلەرى اشىلدى. "Qazaqstan" جەڭىل اتلەتيكالىق كەشەنى بىزگە حالىقارالىق دەڭگەيدەگى جارىستار وتكىزىپ قانا قويماي, زاماناۋي سپورت جۇلدىزدارى مەن جاتتىقتىرۋشىلاردى تاربيەلەپ, جاستارىمىزدى بالا كۇنىنەن سپورتپەن شۇعىلدانۋىنا مۇمكىندىك بەرەدى.
مەملەكەت باسشىسىنىڭ تاپسىرماسى بويىنشا سپورت نىساندارىنىڭ قولجەتىمدىلىگىن ارتتىرۋ جانە قالا تۇرعىندارىن بۇقارالىق سپورتقا قىزىقتىرۋ بويىنشا ءتيىستى جۇمىستار جۇرگىزىلىپ جاتىر. بالالار مەن جاسوسپىرىمدەر سپورتىنا, فەدەراتسيالارعا قولداۋ كورسەتەمىز», - دەدى نۇر-سۇلتان قالاسى جەڭىل اتلەتيكا فەدەراتسياسىنىڭ باسشىسى, ەلوردا اكىمى التاي كولگىنوۆ.
التاي كولگىنوۆ قالانىڭ سپورتتىق مەكەمەلەرى تەك ويىن وتكىزۋ جانە كاسىبي سپورتشىلاردىڭ جاتتىعۋى رەتىندە عانا ەمەس, بالالاردىڭ دا سپورتپەن شۇعىلدانۋىنا ارنالعان بازا رەتىندە پايدالانىلاتىنىن اتاپ ءوتتى.
قالا چەمپيوناتىندا سپورتتى دارىپتەۋدىڭ جانە سپورت مەكەمەلەرى جەلىسىن كەڭەيتۋدىڭ ماڭىزدىلىعىن مادەنيەت جانە سپورت ءمينيسترى اقتوتى رايىمقۇلوۆا دا ءوز سوزىندە اتاپ ءوتتى.
ەستەرىڭىزگە سالا كەتەيىك, جاڭا جەڭىل اتلەتيكا كەشەنى وتكەن جىلدىڭ كۇزىندە اشىلعان بولاتىن. بۇل ورىن IAAF-ءتىڭ بارلىق تالابىنا سايكەس كەلەدى. مۇندا رەسپۋبليكالىق جانە حالىقارالىق جارىستار, سونىڭ ىشىندە الەم چەمپيوناتتارى مەن وليمپيادا ويىندارىن وتكىزۋگە مۇمكىندىك بار. سپورت كەشەنىندە جۇگىرۋ جولدارى ورناتىلعان اتلەتيكالىق الاڭ, ترەناجەر زالى جانە يادرو لاقتىرۋعا, بيىكتىككە, ۇزىندىققا سەكىرۋگە ارنالعان سەكتورلارى, بالالار الاڭى, باسسەيندەر سەكىلدى ارتىقشىلىقتارى بار. مانەج 7000 كورەرمەنگە ەسەپتەلگەن.
جەڭىل اتلەتيكا كەشەنى ەلباسىنىڭ تاپسىرماسى بويىنشا "سامۇرىق-قازىنا" كومپانياسىنىڭ قاراجاتى ەسەبىنەن سالىندى.
