اۋعان جاۋىنگەرلەرىنىڭ قاتارىندا سەرگەي ۆەسەلكوۆ, ناشىم وسپانوۆ, ۆالەري روگوۆسكي, ورازبەك بۋيكۋنوۆ, راشيد قاسىموۆ, ۆلاديمير زاتريمايلوۆ سىندى شقتۋ قىزمەتكەرلەرى دە بار. ولار سوناۋ اۋعان دالاسىنداعى ەستە قالعان وقيعالارىمەن ءبولىستى.
– مەن وسكەمەننەن اسكەرگە 1974 جىلى شاقىرىلدىم. جارتى جىلدان سوڭ نوۆوسىبىردەگى جوعارى اسكەري-ساياسي ۋچيليششەسىنە وقۋعا ءتۇسىپ, 1979 جىلى وقۋ ورنىن ءبىتىردىم. كەيىن 1980 جىلى ءوز ەركىممەن ينتەرناتسيونالدىق بورىشتى وتەۋگە اتتاندىم. روتاداعى ساربازداردىڭ ءبارى اۋعانعا اتتاندى. ءبىز اۋعانستانعا كىرگەن العاشقى جاۋىنگەرلەردىڭ قاتارىندا بولدىق. شەندان قالاسى ارقىلى كانداگارعا جەتىپ, سول جەردەگى اۋەجايدى كۇزەتىپ, جاۋعا قارسى تۇردىق. ءبىزدىڭ 70 روتامىز جۇزەگە اسىرىلعان رەيدتىك وپەراتسيالاردىڭ بارىنە قاتىستى دەسەم, ارتىق بولمايدى. تاۋلى ايماقتاردا دا بولدىق. سول جەردەگى تەرەنكوت پروۆينتسياسى ەرەكشە ەسىمدە قالدى. تۇرعىندارى اش. قورىققاننان ءبىز الىپ كەلگەن استىق ونىمدەرىن قولىمىزدان المايتىن. بىرتە-بىردە ءبىزدىڭ ەشقانداي قاۋىپ توندىرمەيتىنىمىزدى ءتۇسىنىپ, كومەگىمىزدى قابىلدادى. ءبىر-بىرىمىزگە باۋىر باسىپ قالعانىمىز سونداي, قايتارىمىزدا قيماي قوشتاستىق. روتامىزدا 20-دان استام ۇلت وكىلى بولدى. سونداي قيىن كەزدە ءبىر-بىرىمىزگە قامقور بولدىق. قازىر جىل سايىن كەزدەسىپ, مايداننان قايتپاعان دوستارىمىزى ەسكە الامىز, – دەيدى اۋعان ارداگەرى ۆلاديمير زاتريمايلوۆ.
كەزدەسۋدە ستۋدەنتتەر قىزىقتىرعان سۇراقتارىن دا قويدى. ارداگەرلەر ءوز ويلارىمەن ءبولىسىپ قانا قويماي, قازىرگى جاستارعا بەيبىت ءومىردى ساقتاۋعا, ءتۇرلى ارانداتۋشىلىققا بوي الدىرماۋعا, وتاندى قورعاۋعا دايىن بولۋعا شاقىردى.
