بايقاۋدا باق سىناعان قاتىسۋشىلار اقىننىڭ ءبىر ولەڭىن ناقىشىنا كەلتىرە وقىپ ءارى ولەڭ مازمۇنىنا ساي بەينەروليك ءتۇسىرىپ جەلىگە جۇكتەدى. ءبىر اپتاعا سوزىلعان جىر دوداسىنا ەكى مىڭنان استام جەلى قولدانۋشىسى قاتىسقان. ولاردىڭ اراسىندا ەلگە تانىمال اقىندار مەن ارتىستەر, سونداي-اق مەكتەپ وقۋشىلارى دا بولدى. باۋىرجان جاقىپ, باقىت بەدەلحان, اقبەرەن ەلگەزەك, رينات زايىتوۆ سىندى قالامگەرلەر قازىلىق ەتكەن سايىستا مۇقاعاليدىڭ ء«سابي انا» ولەڭىن تەبىرەنە وقىپ, اسەرلى بەينەروليككە ۇلاستىرعان ەركەجان تولەۋبەك ءبىراۋىزدان جەڭىمپاز دەپ تانىلدى.
«مۇقاعالي جىرى تۇنىپ تۇرعان مۋزىكا. ونى جۇرەكپەن سەزىپ, جانىڭمەن قابىلداۋ قاجەت. جەڭىسكە ادال ەڭبەكپەن جەتتىم دەپ ويلايمىن. ءۇش مينۋتتىق جوبانى جاساۋعا ءۇش كۇنىمىزدى جۇمسادىق. ولەڭدى ءوزىم وقىعانىممەن, بەينەباياندا كاسىبي شەبەرلەردىڭ, ۇلكەن ۇجىمنىڭ ەڭبەگى جاتىر. باس جۇلدە الۋىما وسى شىعارماشىلىق توپتىڭ ەڭبەگى ءسىڭدى», دەيدى ەركەجان تولەۋبەك.
قازىلار القاسىنىڭ ۇيعارىمىمەن ءبىرىنشى, ەكىنشى جانە ءۇشىنشى ورىنداردى يەلەنگەن جۇلدەگەرلەر دە "ULY DALA" كومپانياسى ۇسىنعان باعالى سىيلىقتارعا يە بولدى.
– قانىنا ولەڭ سىڭگەن ادامنىڭ رۋحى بيىك, جانى دا تازا. ۇمىتكەرلەردىڭ ونەرىن سارالاي كەلە, اقىن ولەڭىن جاي عانا وقىپ قانا قويماي ونىڭ مازمۇنىمەن قابىساتىن بەينەروليك تۇسىرگەن ناعىز جۇيرىكتى انىقتادىق. مۇقاعالي جىرى ۇرپاق بويىنا تازالىقتىڭ, ادامگەرشىلىكتىڭ اسىل ءنارىن ەگەتىن قۇندى مۇرا. بيىلعى مەرەيتوي اياسىندا مۇنداي رۋحاني ءمانى تەرەڭ شارالار كوپتەپ ۇيىمداستىرىلسا نۇر ۇستىنە نۇر, – دەيدى قازاقستان جازۋشىلار وداعىنىڭ مۇشەسى, اقىن باقىت بەدەلحان.
