قازاقستاندىق دەلەگاتسيانى سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى باۋىرجان اقاتاەۆ, ال شۆەيتساريالىق تاراپتى فەدەرالدىق سىرتقى ىستەر دەپارتامەنتى باس ديرەكتورىنىڭ ورىنباسارى لوران پەرريار باسقاردى.
شۆەيتساريا مەملەكەتتىك حاتشىسىنىڭ ورىنباسارى – فەدەرالدىق سىرتقى ىستەر دەپارتامەنتى كونسۋلدىق ديرەكتوراتىنىڭ باس ديرەكتورى يوحاننەس ماتياشي ءوزىنىڭ قۇتتىقتاۋ سوزىندە COVID-19 ىندەتىنىڭ قيىن كەزىندە وسىنداي كونسۋلتاتسيالاردىڭ ۇيىمداستىرىلۋىن تاراپتاردىڭ دوستىق قارىم-قاتىناستارىنىڭ ىلگەرىلەمەلى دامۋىنا ناقتى ۇلەس دەپ اتادى.
كەلىسسوزدەر بارىسىندا 1963 جىلى جاسالعان كونسۋلدىق قارىم-قاتىناستار تۋرالى ۆەنا كونۆەنتسياسى شەگىندە كونسۋلدىق ارەكەتتەستىك ماسەلەلەرى, ەكىجاقتى شارت-قۇقىقتىق بازانى كەڭەيتۋ جانە مەملەكەتتىك قىزمەتتەردى كورسەتۋدە زاماناۋي ساندىق تەحنولوگيالاردى قولدانۋ ماسەلەلەرى تالقىلاندى.
كەلىسسوزدەردىڭ ءتۇيىندى تارماقتارى رەتىندە كوروناۆيرۋس ىندەتى كەزىندە ەرەكشە وزەكتى ازاماتتاردىڭ قۇقىقتارى مەن مۇددەلەرىن قورعاۋ بويىنشا ءوزارا ىقپالداستىقتى جانداندىرۋ ساۋالدارى, كونسۋلدىق-قۇقىقتىق سالاداعى زاڭدى قۇجاتتار رەسىمدەۋ مەن اپوستيلدەۋ ماسەلەلەرى قاراستىرىلدى.
كەزدەسۋگە قاتىسۋشىلار مەملەكەتتىك قىزمەت تۇرلەرىن تسيفرلاندىرۋ سالاسىندا قابىلدانعان شارالارى, ياعني ازاماتتار ءوتىنىش بىلدىرگەن جاعدايدا قاعاز جۇزىندەگى پروتسەدۋرالاردان كەزەڭ-كەزەڭمەن باس تارتۋ, سونداي-اق نورماتيۆتىك-قۇقىقتىق بازاعا سايكەستەندىرۋ شارالارى تۋرالى اقپاراتپەن الماستى. شۆەيتساريانىڭ تسيفرلاندىرۋ سالاسىنداعى جەتىستىكتەرىن ەسكەرە وتىرىپ, وسى سالاعا ارنالعان بىرلەسكەن ترەنينگتەر جانە سەمينارلار ۇيىمداستىرۋدىڭ العىشارتتارى تالقىلاندى.
ءىس-شارا ناتيجەسى بويىنشا تاراپتار كونسۋلدىق بايلانىستاردىڭ بارلىق باعىتتارى بويىنشا ىنتىماقتاستىقتى ودان ءارى دامىتۋعا دايىندىعىن راستادى.
