قارجى • 12 اقپان، 2021

قارجى نارىعى قانداي «رەۆوليۋتسياعا» تاپ بولدى؟

2020 جىلى قولما-قول اقشاسىز تولەم بۇرىن بولماعان دەڭگەيگە كوتەرىلىپ، ۆيرتۋالدى ترانزاكتسيالار كولەمى 2،6 ەسە وسكەن. قازاقستان قارجىگەرلەر قاۋىمداستىعى بۇل احۋالدى «قولما-قول اقشاسىز تولەم رەۆوليۋتسياسى» دەپ باعالايدى.

اباي قازبەك ۇلى

قاۋىمداستىق دەرەگىنشە 2020 جىلى قولما-قول اقشاسىز جاسالعان ساۋدا-ساتتىق كولەمى 34،6 ترلن تەڭگەنى قۇراعان. وسىلايشا، قولما-قول اقشاسىز وپەراتسيا ۇلەسى 45،5 پايىزدان 67،4 پايىزعا دەيىن ۇلعايىپتى. سونىڭ ىشىندە ينتەرنەت ترانزاكتسيالار كوشتىڭ الدىندا تۇر ەكەن. ول بارلىق قولما-قول اقشا وپەراتسيالارىنىڭ 80 پايىزىن يەلەنەدى. 2020 جىلدىڭ قورىتىندىسى بويىنشا اقشالاي ماندە ينتەرنەت ترانزاكتسيا كولەمى 28،2 ترلن تەڭگەگە جەتكەن.

«بىلتىر اينالىستاعى نەسيەلىك كارتالار سانى ەكى ەسەگە (5،3 – تەن 10،9 ملن بىرلىككە دەيىن)، ال دەبيتتىك كارتالار – 40 پايىزعا (25،5-تەن 35،6 ملن بىرلىككە دەيىن) ءوستى. ەلىمىزدىڭ ءاربىر 100 تۇرعىنىنا بۇگىندە 189 دەبيتتىك جانە 58 نەسيەلىك كارتا تيەسىلى. قولما-قول اقشاسىز ترانزاكتسيالاردىڭ تانىمالدىعى جىل سايىن ءوسىپ كەلەدى: 2018 جىلى ولارعا بارلىق وپەراتسيالار كولەمىنىڭ – 29، 2019 جىلى – 46، 2020 جىلى 67 پايىزى تيەسىلى بولدى. مەملەكەت الەۋمەتتىك بايلانىستى ازايتىپ، حالىق تابىسىنىڭ تومەندەۋىن وتەۋ ءۇشىن بانك بولىمشەسىنە، ساۋدا جانە سەرۆيس مەكەمەلەرىنە بارۋدى شەكتەيتىن شارالار پاكەتىن قابىلدادى. سونىڭ ناتيجەسىندە قاشىقتان قىزمەت كورسەتۋ دامىدى. ناتيجەسىندە جۇزدەگەن مىڭ قازاقستاندىقتاردا ەسەپ ايىرىسۋدىڭ قولما-قول اقشاسىز نىسانىنا كوشۋگە قوسىمشا ىنتالاندىرۋلار مەن مۇمكىندىكتەر پايدا بولدى. بۇل قاشىقتان قول جەتىمدى تاۋارلار مەن قىزمەتتەردى ءبىرىنشى كەزەكتە تاڭداۋدى انىقتايتىن جاڭا تۇتىنۋ مادەنيەتىن قالىپتاستىرۋعا نەگىز بولدى» دەلىنگەن قاۋىمداستىق حابارلاماسىندا.

ينتەرنەت ترانزاكتسيا اسىرەسە، الماتى، نۇر-سۇلتان جانە شىمكەنت قالالارىندا تانىمال. قاۋىمداستىق اتالعان مەگاپوليستەردە تولەم كارتاسى مەن ءموبيلدى قوسىمشانى پايدالانۋشىلار كوپ جانە حالىقتىڭ قارجىلىق ساۋاتتىلىعى جوعارى دەيدى. مۇنى جاناما تۇردەگى جان باسىنا شاققانداعى بانك كارتالارىنىڭ سانى دا راستايدى. مىسالى، الماتىدا ءبىر تۇرعىنعا 5،1 دەبيتتىك جانە 1،4 كرەديتتىك كارتادان كەلسە، سولتۇستىك قازاقستان وبلىسىندا ءبىر تۇرعىنعا 1،3 دەبيتتىك جانە 0،4 كرەديتتىك كارتا تيەسىلى.

قارجىگەرلەر قاۋىمداستىعىنىڭ حابارلاۋىنشا، تاۋارلار مەن قىزمەتتەردى ونلاين تولەم ارقىلى قولجەتىمدى ەتۋ قازاقستاننىڭ cashless-ەكونوميكاعا ءوتۋىن جەدەلدەتەدى. بۇل ءوز كەزەگىندە ازاماتتارعا قاۋىپسىزدىك پەن جايلىلىق سىيلاپ، قارجىلىق وپەراتسيالار شىعىندارىن وپتيميزاتسيالايدى، قارجى اينالىمىن كۇشەيتەدى. تيىسىنشە كولەڭكەلى ەكونميكانىڭ ۇلەسىن ازايتىپ، سالىقتىق اكىمشىلەندىرۋدى جاقسارتپاق.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز