ال العاشقى مەملەكەتتىك گيمنىمىز 2006 جىلى اۋىستىرىلىپ, ءسوزىن اقىن جۇمەكەن ناجىمەدەنوۆ, مۋزىكاسىن كومپوزيتور ءشامشى قالداياقوۆ جازعان «مەنىڭ قازاقستانىم» ءانى ماتىنىنە تۇڭعىش پرەزيدەنتىمىز – ەلباسى نۇرسۇلتان نازارباەۆ وزگەرىستەر ەنگىزگەن سوڭ جاڭا ءانۇرانىمىز بولىپ قابىلدانعانى ءمالىم. سودان بەرى سان الۋان سالتاناتتى ءىس-شارالاردا جانە داڭقتى سپورتشىلارىمىز الەمدىك جارىستاردا چەمپيوندىق تۇعىرعا كوتەرىلگەندە مەملەكەتىمىزدىڭ مەرەيىن اسىرا شىرقالىپ جۇرگەن وسى مەملەكەتتىك گيمنىمىزدىڭ ءانى مەن سوزىنە كىنا تاعىپ, سىن ايتىپ جاتقان ەشكىم جوق.
دەگەنمەن, اتىراۋ قالاسىنداعى «مەملەكەتتىك رامىزدەردى ناسيحاتتاۋ جونىندەگى ۇلتتىق ورتالىق» قوعامدىق بىرلەستىگىنىڭ اتقارۋشى ديرەكتورى رۋسلان حامزا مەملەكەتىك گيمننىڭ ماتىنىندەگى تىنىس بەلگىلەرىنەن بىرنەشە دالسىزدىك تاۋىپتى. ونىڭ سىني ەسكەرتپەلەرى بويىنشا ءبىلىم جانە عىلىم مينيسترلىگىنە قاراستى ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ جەتەكشى عالىمدارى عىلىمي ساراپتاما جاساپ, ر.حامزانىڭ كەيبىر كۇمانى نەگىزدى دەگەن قورىتىندىعا كەلگەن. اتاپ ايتقاندا, عالىمدار ولەڭنىڭ ءبىرىنشى شۋماعىنىڭ ءۇشىنشى جولىنان كەيىن قويىلعان ءۇتىردىڭ ورنىنا «تيرە» (سىزىقشا) بەلگىسى قويىلۋى كەرەك دەپ سانايدى. ياعني:
«التىن كۇن اسپانى,
التىن ءدان دالاسى,
ەرلىكتىڭ داستانى –
ەلىمە قاراشى!»
– بولىپ جازىلۋى قاجەت.
سونداي-اق مەملەكەتتىك گيمن ءماتىنىنىڭ بەسىنشى جولىنداعى «ەر» ءسوزى تىرناقشاعا الىنىپ جازىلۋى جانە «قازاعىم مىقتى عوي» دەگەن سەگىزىنشى جولىنان سوڭ لەپ بەلگىسىن قويۋ قاجەت ەكەن. ياعني ەكىنشى شۋماقتىڭ دۇرىس نۇسقاسى مىناداي:
«ەجەلدەن «ەر» دەگەن
داڭقىمىز شىقتى عوي.
نامىسىن بەرمەگەن
قازاعىم مىقتى عوي!»
وسىعان وراي, ءبىز ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ عىلىمي ساراپتاماسىندا كورسەتىلگەن دالسىزدىكتەردى تۇزەتۋ ءۇشىن مەملەكەتتىك رامىزدەر سالاسىندا باسشىلىقتى, سالاارالىق ۇيلەستىرۋدى جانە مەملەكەتتىك رەتتەۋدى جۇزەگە اسىراتىن ۋاكىلەتتى ورگان رەتىندە مادەنيەت جانە سپورت مينيسترلىگىنە جۇگىندىك. بىزگە بەرىلگەن جازباشا جاۋاپ تومەنگىدەي:
«بۇگىنگى تاڭدا قازاقستان رەسپۋبليكاسىنىڭ مەملەكەتتىك رامىزدەرى تۋرالى» قازاقستان رەسپۋبليكاسىنىڭ 2007 جىلعى 4 ماۋسىمداعى №258 كونستيتۋتسيالىق زاڭىنىڭ مەملەكەتتىك گيمن تاراۋىنا قانداي دا ءبىر وزگەرىس ەنگىزۋ ماسەلەسى كۇن تارتىبىندە تۇرعان جوق.
وسىعان بايلانىستى اتالعان كونستيتۋتسيالىق زاڭمەن بەكىتىلگەن قازاقستان رەسپۋبليكاسىنىڭ مەملەكەتتىك گيمنىنىڭ ماتىنىندەگى تىنىس بەلگىلەرىنە وزگەرىستەر ەنگىزۋدى ماقساتقا ساي ەمەس دەپ سانايمىز».
مادەنيەت جانە سپورت مينيسترلىگىندەگى ەڭ مادەنيەتتى مەملەكەتتىك قىزمەتشىلەردىڭ «سىرعىتپا» جاۋابى وسىنداي. ال بۇل دۇنيەدە قاسيەتتى قۇراننان باسقا, قاتەلىك كەتپەيتىن, وزگەرتىلمەيتىن ەشتەڭە جوقتىعى ايان. سونىڭ ىشىندە قوس پالاتالى پارلامەنتتە دە ءارتۇرلى سەبەپتەرمەن اسىعىس قابىلدانىپ كەتكەن كەيبىر زاڭداعى ءىرىلى-ۇساقتى كەمشىلىكتەر ارادا ۋاقىت وتە كەلە انىقتالىپ, ىلە تۇزەتىلىپ جاتادى. ول – ءومىر شىندىعى.
مەملەكەتتىك گيمننىڭ ءماتىنى مەملەكەتتىك مەكەمەلەر مەن ءبىلىم بەرۋ ۇيىمدارى عيماراتتارىنىڭ كەلۋشىلەر كوزىنە بىردەن شالىناتىن ورىندارىندا وزگە مەملەكەتتىك رامىزدەرمەن قاتار, قابىرعاعا كورنەكى ەتىپ ءىلىنىپ قويىلاتىندىعى بەلگىلى. سوندىقتان ونىڭ ءۇتىر-نۇكتەسىنە دەيىن دۇرىس جازىلىپ, بارشا جۇرتتىڭ, سونىڭ ىشىندە وسكەلەڭ ۇرپاقتىڭ بارىنشا ساۋاتتى بولۋىنا سەپتىگىن تيگىزىپ تۇرعانى ءجون.
«حالىقتىڭ كوزى قىراعى, ءمىنىڭدى كورىپ تۇرادى» دەمەكشى, مەملەكەت باسشىسى «حالىق ۇنىنە قۇلاق اساتىن مەملەكەت» قۇرۋ مىندەتىن العا قويىپ وتىرعان قازىرگى ۋاقىتتا مادەنيەت جانە سپورت مينيسترلىگىندەگى اعايىندار «جاۋىردى جابا توقىماي», مەملەكەتتىك رامىزدەردى ناسيحاتتاپ جۇرگەن اتىراۋلىق ازامات رۋسلان حامزانىڭ سىندارلى سىنىنان ءتيىستى ناتيجە شىعارۋ جولىن ىزدەستىرسە, قۇبا-قۇپ ەمەس پە؟
