قورعانىس مينيسترلىگى وفيتسەرلەر قۇرامىن اتتەستاتتاۋدى ۇيىمداستىرۋعا قاتىستى ۇسىنىستار ازىرلەدى. ول ەكى كەزەڭدە وتەدى.
العاشقى كەزەڭدە – ءبىرىنشى اقپان مەن ءبىرىنشى شىلدە ارالىعىندا باس شتاب, قورعانىس مينيسترلىگى, قك اسكەر تۇرلەرى باس قولباسشىلارى باسقارمالارى, وڭىرلىك قولباسشىلىقتار اسكەرلەرى مەن اسكەر تەكتەرى قولباسشىلارى باسشىلىق بۋىنىنىڭ, اسكەري بولىمدەر كومانديرلەرىنىڭ بىلىمدەرى مەن قۇزىرەتتەرى تەكسەرىلەدى. قىزمەتىنە جانە جەكە باسىنا قاتىستى جاعىمسىز مىنەزدەمە العان وفيتسەرلەر دە اتتەستاتتاۋعا جاتادى.
ءبىرىنشى شىلدەدە باستالاتىن ەكىنشى كەزەڭ قالعان وفيتسەرلەرگە قاتىستى وتكىزىلەدى. اسكەري قىزمەتشىلەر سىبايلاس جەمقورلىققا قارسى ءىس-قيمىل اياسىنداعى زاڭنامانى بىلۋىنە سىناق تاپسىرادى, اسكەري قىزمەت بويىنشا رەتتەۋشى قۇجاتتاردى بىلۋىنە تەكسەرۋدەن جانە پسيحولوگيالىق تەستىلەۋدەن وتەدى.
كوميسسيا اتتەستاتتالۋشىنىڭ اتقاراتىن لاۋازىمدارىنا سايكەستىگىن جانە ولاردىڭ ءارى قاراي قىزمەت ەتۋ پەرسپەكتيۆاسىن ايقىندايدى.
اتتەستاتتاۋ ناتيجەلەرى بويىنشا ءار اسكەري قىزمەتشى كاسىبي, جەكە قاسيەتتەرى مەن الەۋەتتى مۇمكىندىكتەرىنىڭ جان-جاقتى جانە وبەكتيۆتى سيپاتتاماسىن الادى. ءاربىر اسكەري قىزمەتشىنى قاي باعىتتاردا دايارلاۋ مەن قايتا دايارلاۋ تالاپ ەتىلەتىنىن بەلگىلەيدى.
وسىلايشا, قىزمەتى بويىنشا جوعارىلاتۋ جانە وقۋعا جىبەرۋ ماقساتىندا وفيتسەرلەردىڭ كادرلىق رەزەرۆى قالىپتاستىرىلادى, انىقتالعان كەمشىلىكتەردى جويۋ بويىنشا ۇسىنىمدار ازىرلەنەدى.
قازاقستان رەسپۋبليكاسى قارۋلى كۇشتەرىنىڭ وفيتسەرلەر قۇرامىن اتتەستاتتاۋ 2021 جىلدىڭ قاراشاسىنا دەيىن جالعاسادى.
