شقو قاج دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ەر ادام 2020 جىلدىڭ جازىندا الماتى قالاسىندا جۇرگەندە وڭاي اقشا تابۋعا بەل بۋعان.
Instagram جەلىسىنە تىركەلگەن ول ءوزىن ەسترادا انشىلەرىنىڭ مەنەدجەرى رەتىندە تانىستىرادى. سودان كەيىن جەلى پايدالانۋشىلارىن اۆتوكولىك پەن 500 مىڭ تەڭگە اقشا تىگىلگەن ۇتىس ويىنىنا قاتىسۋعا شاقىرعان.
پاراقشاسىنا جازىلعاندار اراسىنان جەڭىمپازداردى, دالىرەك ايتقاندا جابىرلەنۋشىلەردى ىرىكتەپ الىپ, ولارعا كەلەسى مازمۇنداعى حابارلاما جىبەرگەن: «سالەمەتسىز بە! ءسىز ءبىزدىڭ ۇتىس ويىنىمىزدىڭ جەڭىمپازى اتاندىڭىز! ساتتىلىك سەرىك بوپ, باعىڭىز جاندى! ەندى وسى ءانشىنىڭ اۆتورلىق البومىن ساتىپ الۋىڭىز كەرەك, سودان كەيىن ءوز ۇتىسىڭىزدى الا الاسىز». بۇدان سوڭ «جەڭىمپاز» بەلگىلى ءبىر سومانى الاياقتىڭ «Kaspi Gold» كارتاسىنا اۋدارىپ, ءوزىنىڭ ۇتىسىن كۇتكەن. الايدا اقشاعا قول جەتكىزگەن جالعان مەنەدجەر سول ادامدى بۇعاتتاپ, ءوز اككاۋنتىن ءوشىرىپ تاستاعان», دەلىنگەن حابارلامادا.
كوپ ۇزاماي الاياق ۇستالىپ, ونىڭ ءىسى سوتقا جەتتى. سوت ۇكىمىمەن ايىپتالۋشى ءۇش جىلعا باس بوستاندىعىنان شەكتەلدى.
«بۇل ىستەگەنىمە قاتتى وكىنەمىن. ءبىرىنشى رەت سوتتالىپ وتىرمىن. ەندى زاڭدى بۇزباسپىن. قىلمىس جاساعان كەزدە ونىڭ سوڭى وسىنداي بولادى دەپ ەش ويلامادىم. قازىرگى ۋاقىتتا جابىرلەنۋشىلەرگە كەلتىرىلگەن ماتەريالدىق شىعىندى وتەپ جاتىرمىن», دەدى ەر ادام.
