«تۇرعىندارعا كوروناۆيرۋسقا قارسى ۆاكتسينا ەنگىزۋدى باستاۋ قاجەت. دەنساۋلىق ساقتاۋ ءمينيسترى مەن سانيتارلىق-ەپيدەميولوگيالىق احۋال جانە قوعامدىق دەنساۋلىق قىزمەتىنىڭ باسشىسى ءبىرىنشى كەزەكتە ۆاكتسينا ەگىلۋى ءتيىس تۇرعىندار ساناتىن انىقتاپ, ەلەكتروندىق ءتىزىم قۇرۋى ءتيىس», دەدى وزبەكستان پرەزيدەنتى.
شاۆكات ميرزيوەۆ سونداي-اق قوسىمشا موبيلدىك توپتار قۇرۋدى تاپسىردى.
«وتباسىلىق ەمحانالار مەن اۋىلدىق دارىگەرلىك پۋنكتەردە ۆاكتسينالاۋدىڭ 3 مىڭ بولىمشەسىن دايارلاۋ قاجەت. سونداي-اق, تۇرعىندارعا ۆاكتسينا ەگۋمەن اينالىساتىن موبيلدىك بريگادالار قۇرۋ كەرەك», دەپ تۇيىندەدى ول.
ەسكە سالا كەتسەك, بۇعان دەيىن سانيتارلىق-ەپيدەميولوگيالىق احۋال جانە قوعامدىق دەنساۋلىق قىزمەتىنىڭ باسشىسى بوتيرجون قۇربانوۆ وزبەكستان بيلىگى 2021 جىلدىڭ سوڭىنا قاراي ەل تۇرعىندارىنىڭ 20 پايىزىن كوروناۆيرۋسقا قارسى ۆاكتسينالاۋعا نيەتتى ەكەنىن ءمالىم ەتكەن. ونىڭ سوزىنشە, جاپپاي ۆاكتسينالاۋدى باستاۋ اقپان ايىنىڭ سوڭى, ناۋرىزدىڭ باسىنا جوسپارلانعان.
«ۆاكتسينالاۋ پروتسەسى بۇكىل وزبەكستاندى قامتيدى, بىراق ول كەزەڭ-كەزەڭمەن وتەدى. ءبىرىنشى كەزەڭدە Pfizer ۆاكتسيناسىنىڭ 100 مىڭ دوزاسىنا تاپسىرىس بەرىلدى, تاعى باسقا ليتسەنزيالانعان ۆاكتسينالار پايدا بولعان جاعدايدا, ولار دا پايدالانىلادى», دەدى قۇربانوۆ.
