باتىس قازاقستان وبلىسى ءدىن ىستەرى باسقارماسىنىڭ باسشىسى ماقسات رامانقۇلوۆتىڭ ايتۋىنشا, «جۋسان» وپەراتسياسى بارىسىندا اق جايىق وڭىرىنە اكەلىنگەندەردىڭ ىشىندە 32 ايەل, 85 بالا), 3 ەر ادام بار ەكەن. بالالاردىڭ 46-سى – مەكتەپ جاسىندا, 38-ءى – مەكتەپكە دەيىنگى جاستا, بىرەۋى – ستۋدەنت كورىنەدى.
بۇل ايەلدەردىڭ ءدىني كوزقاراسىن انىقتاۋ جانە دەراديكالداندىرۋ ماقساتىندا 70 ءدارىس ساباعى وتكىزىلگەن. ونلاين فورماتىندا 4 ءدارىس ۇيىمداستىرىلعان.
«ولارعا تەولوگيالىق ساباقتار, جەكە كەزدەسۋلەر, «ونلاين» ساباقتار ۇيىمداستىرىپ, مۇراجايلارعا, تابيعات اياسىنا بىرگە شىقتىق. كينوتەراپيا, اشىق كونكۋرستار جۇرگىزۋ ارقىلى قازاقستاندىق قوعامنىڭ قۇندىلىقتارىنا باۋلىدىق. وسىنداي 17 ءىس-شارا ۇيىمداستىرىلدى» دەيدى ماقسات رامانقۇلوۆ.
باسقارما باسشىسىنىڭ ايتۋىنشا, جاسالعان جۇمىستاردىڭ ناتيجەسى بار, اتالعان ساناتتاعى ايەلدەردىڭ كوزقاراستارىندا راديكالدى يدەولوگيانىڭ بەلگىلەرى بايقالمايدى. ولاردىڭ باسىم كوپشىلىگى قازاقستاندىق قوعام قۇندىلىقتارىنا بەيىمدەلگەن.
جالپى سوڭعى ءبىر جىل ىشىندە وڭىردە دەسترۋكتيۆتى ءدىني يدەولوگيانىڭ الدىن الۋ جانە قاۋىپتى ءدىني اعىمداردىڭ جاقتاستارىن وڭالتۋ باعىتىندا ماماندار 778 ادامدى قامتىپ, 1246 جەكە كەزدەسۋ وتكىزگەن ەكەن. «وڭالتۋ جۇمىستارىنىڭ ناتيجەسىندە 30 ەر, 19 ايەل ادام ءداستۇرلى دىنگە اۋىستى, 82 ادام ەلىمىزدىڭ قوعامدىق قۇندىلىقتارىنا بەيىمدەلدى, 32 ادام كەزدەسۋدەن باس تارتتى, ال 11 ادام دىننەن مۇلدەم الىستاپ كەتكەن», دەلىنگەن باتىس قازاقستان وبلىسى ءدىن ىستەرى باسقارماسى تاراتقان ءباسپاسوز حابارلاماسىندا.
2020 جىل ىشىندە وبلىستا ءدىني قارىم-قاتىناس سالاسى بويىنشا 23 اكىمشىلىك قۇقىق بۇزۋشىلىق دەرەگى تىركەلگەن ەكەن. بۇل 2019 جىلمەن سالىستىرعاندا 4 وقيعاعا كوپ. زاڭ بۇزعان ازاماتتارعا ءتيىستى قۇجاتتار تولتىرىلىپ, سوت قاۋلىسىمەن ايىپپۇل سالىنعان.
«جالپى وبلىس اۋماعىندا ءدىني احۋال تۇراقتى. وڭىردە ءتۇرلى ەتنوستار مەن كونفەسسيالار وكىلدەرى بەيبيتشىلىك پەن بىرلىكتە ءومىر سۇرۋدە», دەيدى باتىس قازاقستان وبلىسى ءدىن ىستەرى باسقارماسىنىڭ باسشىسى ماقسات رامانقۇلوۆ.
باتىس قازاقستان
