– ناۋقاستاردىڭ اراسىندا تەڭىز كەنىشىنىڭ 32 جۇمىسشىسى, اتىراۋ قالاسىنىڭ 10 تۇرعىنى بار. سونداي-اق قۇرمانعازى اۋدانىندا – 6, ماحامبەت اۋدانىندا 1 ادامنان سovid-19 انىقتالدى. ونىڭ ىشىندە 10 ادامدا ينفەكتسيانىڭ سيمپتومدى ءتۇرى بار. وتكەن تاۋلىكتە كوروناۆيرۋس ينفەكتسياسىنان ساۋىعىپ شىققاندار 95 ادامدى قۇرادى. ال ءۇي جاعدايىندا ەمدەلۋدى جالعاستىرعان ناۋقاستاردىڭ سانى – 276 ادام. وبلىستىق ينفەكتسيالىق ستاتسيوناردا – 72, اۋداندارداعى ستاتسيونارلاردا – 25, تەڭىز كەنىشىندەگى ستاتسيوناردا 377 ناۋقاس ەمدەلىپ جاتىر, – دەپ مالىمدەدى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ارينە, كوروناۆيرۋس ينفەكتسياسىنا بايلانىستى بۇل دەرەكتەر وڭىردەگى ەپيدەميالىق احۋالدىڭ بۇرىنعىدان جاقسارا تۇسكەنىن بايقاتىپ وتىر. ال ونى تەجەۋدىڭ جولى – ۆاكتسينا. ەلىمىزدە باستاۋ العان ۆاكتسينالاۋعا وراي توعىز كۇندە «سپۋتنيك V» ۆاكتسيناسىن 873 ادام سالدىرىپ وتىر. سولاردىڭ قاتارىندا №7 قالالىق ەمحانانىڭ ديرەكتورى گۇلنافيس تاڭباەۆا دا بار. ونىمەن بىرگە №7 ەمحانادا بىرگە جۇمىس ىستەيتىن 260-قا جۋىق اق جەلەڭدى ارىپتەسىنىڭ 10%-دان استامى ۆاكتسينا الىپ ۇلگەردى.
– مەديتسينا سالاسىندا جۇمىس ىستەگەنىمە 25 جىلعا جۋىقتادى. وسى كەزەڭدە حالىقتىڭ دەنساۋلىعىن ساقتاۋ, ءتۇرلى اۋرۋدىڭ الدىن الۋ ءۇشىن دە, مەديتسينا ءىسىن ۇيىمداستىرۋشى رەتىندە دە تۇرعىندارمەن تىعىز بايلانىس ورناتىپ كەلەمىن. ويتكەنى وزگە سالالارعا قاراعاندا مەديتسينا قىزمەتكەرلەرى ادامدارمەن كوبىرەك ارالاسادى. دارىگەرلەرگە سوزىلمالى اۋرۋى بار جاندار, جالپى تۇرعىندار ءجيى جۇگىنەدى, – دەيدى گ.تاڭباەۆا.
ونىڭ ايتۋىنا قاراعاندا, پاندەميا تىركەلگەن كۇننەن بەرى حالىقتىڭ دارىگەرلەرگە دەگەن سەنىمى بۇرىنعىدان دا ارتا ءتۇستى. كوروناۆيرۋستىڭ ءبىرىنشى تولقىنىندا ناۋقاستاردىڭ ءومىرىن اراشالاۋ ءۇشىن الدىمەن دارىگەرلەر كۇنى-ءتۇنى تىنىمسىز ەڭبەك ەتتى.
– قاۋىپتى ۆيرۋسپەن بەتپە-بەت كۇرەسكەن دارىگەرلەر دە, ورتا بۋىن قىزمەتكەرلەرى دە ينفەكتسيا جۇقتىردى. بىراق مەديتسينا قىزمەتكەرلەرىنىڭ مىندەتى – ناۋقاستىڭ ءومىرىن ساقتاپ قالۋ. دارىگەرلەر سول مىندەتىن ادال اتقاردى. ءالى دە كاسىبىنە ادالدىق تانىتۋدى پارىزى سانايدى. ارينە, ءبىرىنشى تولقىنى كەزىندە ىندەتتەن قورعايتىن ۆاكتسينا بولمادى. سوعان قاراماستان وسى سالانىڭ بارلىق قىزمەتكەرى ىندەتكە شالدىققان جانداردىڭ ءومىرى ءۇشىن كۇرەستى. دەسەك تە كەز كەلگەن ينفەكتسيانى توقتاتۋدىڭ دا, ونىڭ الدىن الۋدىڭ دا ءبىر جولى – ۆاكتسينا سالدىرۋ. ۆاكتسينا الدىمەن ادامدى ينفەكتسيادان قورعايدى. سول سەبەپتەن ۆاكتسينانى العاشقىلاردىڭ قاتارىندا الدىم. ماقساتىم – ءوزىمدى, وتباسىم مەن اينالامداعى ارىپتەستەرىمدى, ەمحاناعا كەلەتىن ادامداردى قاۋىپتى ۆيرۋستان قورعاۋ. سوندىقتان جاقىنىڭا, جانىڭدا جۇرگەن جاندارعا جاناشىر بولۋ ءۇشىن ۆاكتسينا الۋدان قورقۋدىڭ قاجەتى جوق, – دەگەن ويىمەن ءبولىستى اتىراۋ قالاسىنداعى №7 ەمحانانىڭ ديرەكتورى.
دارىگەردىڭ پىكىرىنشە, وسى ورايدا ءار ادام قوعام الدىنداعى جاۋاپكەرشىلىكتى جەتە سەزىنۋى كەرەك. بۇل – قاۋىپتى ۆيرۋستى تاراتۋشى بولماۋ. راس, الەۋمەتتىك جەلىدە كوروناۆيرۋسقا قارسى سالىناتىن ۆاكتسينا تۋرالى ءتۇرلى قاۋەسەت جەلدەي ەستى. بىراق رەسمي دالەلدەنبەگەن اقپاراتقا سەنبەگەن ءجون.
ال كاسىپكەرلەر مەيرامحانالار مەن ءدامحانالاردىڭ جۇمىس ۋاقىتىن وزگەرتۋدى قالاپ وتىر. ويتكەنى وڭىردە 700-گە جۋىق قوعامدىق تاماقتانۋ ورنى بار. ونىڭ 400-دەن استامى – اتىراۋ قالاسىندا, 300-گە جۋىعى اۋدانداردا تىركەلىپتى. قازىر مەيرامحانالار مەن ءدامحانالار ساعات 20.00-گە دەيىن جۇمىس ىستەيدى. بۇل – وبلىستىڭ باس سانيتار دارىگەرىنىڭ تالابى.
وسى ماسەلە اتىراۋ وبلىسىنىڭ كاسىپكەرلەر مەن جۇمىس بەرۋشىلەر وداعىندا وتكەن دوڭگەلەك ۇستەلدە كەڭىنەن تالقىعا ءتۇستى. وعان مەيرامحانالار مەن ءدامحانالاردىڭ يەلەرى, سونداي-اق اتىراۋ قالاسى مەن وبلىستىڭ باس سانيتارلىق دارىگەرلەرى قاتىستى. كاسىپكەرلەردىڭ سۇرايتىنى – جۇمىس ۋاقىتىن ساعات 00.00-گە دەيىن ۇزارتۋ.
– اتىراۋ وبلىسىنىڭ باس سانيتارلىق دارىگەرىنىڭ سوڭعى قاۋلىسىنا سايكەس مەيرامحانالار مەن ءدامحانالاردىڭ جۇمىسىنا ساعات 20.00-گە دەيىن عانا رۇقسات ەتىلىپ وتىر. الايدا كليەنتتەر ساعات 20.00-دەن 22.00-گە دەيىنگى ارالىقتا كوپ كەلەدى. بۇل – ءبىزدىڭ قىزمەتكەرلەر شتاتىن ۇستاۋ, كوممۋنالدىق تولەمدەر مەن نەسيەلەردى تولەۋ, باسقا دا وپەراتسيالىق شىعىستاردى جابۋ ءۇشىن اقشا تابا الاتىن ۋاقىتىمىز, – دەيدى كاسىپكەر نۇرلان مۇقىشەۆ.
كاسىپكەرلەر جۇمىس ۋاقىتىن شەكتەۋ شىعىنعا ۇشىراتقانىن العا تارتادى. ويتكەنى مەيرامحانا بيزنەسىندەگى تابىستىڭ 90%-عا جۋىعى جۇما كۇنى كەشتە جانە دەمالىس كۇندەرى تۇسەدى ەكەن.
– دەمالىس كۇندەرى مەيرامحانالار مەن ءدامحانالار ءبىر ساعاتتا ايلىق كىرىستىڭ 20%-ىن تابادى. سول سەبەپتەن جەكە تۇرعان مەيرامحانالار مەن دامحانالارعا ءبىر ادامعا 5 شارشى مەترلىك ورىن ۇسىنۋمەن تۇنگى ساعات 00.00-گە دەيىن جۇمىس ىستەۋگە رۇقسات بەرۋدى سۇرايمىز, – دەگەن ۇسىنىسىن ايتتى قازاقستان رەسپۋبليكاسى قوعامدىق تاماقتانۋ قاۋىمداستىعىنىڭ كەڭەسشىسى ۆەرونيكا نۇرپەيىسوۆا.
وسىعان وراي وبلىستىڭ باس سانيتارلىق دارىگەرى مادەنيەت تاناۋوۆ بۇل ماسەلەنى قاراستىرۋعا ۋادە بەرىپ وتىر. الايدا بۇل ءۇشىن بىرنەشە سەبەپكە نازار اۋدارۋ قاجەت ەكەن.
– ءبىر اپتادا وڭىردەگى ەپيدەميالىق جاعداي ناشارلاماي, «سارى ايماقتا» قالۋ جالعاسۋى كەرەك. سوندا عانا مەيرامحانالار مەن ءدامحانالاردىڭ جۇمىس ۋاقىتىن ساعات 00.00-گە دەيىن ۇزارتۋ مۇمكىندىگىن قاراستىرامىز, – دەيدى باس سانيتار دارىگەر م.تاناۋوۆ.
مۇنايلى ءوڭىردىڭ «سارىدان» اتتاپ ءوتىپ, «جاسىل ايماققا» ەنۋى ەپيدەميالىق احۋالدى جاقسارتار جاقسىلىقتىڭ جارشىسىنداي قابىلدانىپ وتىر. وبلىستىڭ باس سانيتار دارىگەرى مەيرامحانا بيزنەسىندەگى كاسىپكەرلەرگە بەرگەن ۋادەسىن ورىندادى. ونىڭ كەشەگى قاۋلىسىمەن بۇگىننەن باستاپ قوعامدىق تاماقتانۋ ورىندارىنىڭ جۇمىس ۋاقىتى ساعات 00.00-گە دەيىن سوزىلاتىن بولدى.
اتىراۋ وبلىسى
