قر مەملەكەتتىك قىزمەت ىستەرى اگەنتتىگىنىڭ قىزىلوردا وبلىسى بويىنشا دەپارتامەنتى باستاماشى بولعان جوبانىڭ ماقساتى - ازاماتتاردىڭ سۇرانىستارى مەن قاجەتتىلىكتەرىنە جەدەل جاۋاپ بەرە الاتىن باسەكەگە قابىلەتتى امبەباپ ماماندار ازىرلەۋ.
«باسشىلار ءدارىسى» جوباسى ارقىلى مەملەكەتتىك قىزمەتشىلەر ءتۇرلى سالالارداعى اتقارىلىپ جاتقان جۇمىستاردان حاباردار ەتىلەدى. بۇل مەملەكەتتىك ورگاندارعا قابىلداۋعا كەلگەن ادامداردى ءتۇرلى مەكەمەلەرگە ساندالتپاي, مۇمكىندىگىنشە ءبىر جەردەن جان-جاقتى اقپارات بەرۋ ءۇشىن جاسالىپ وتىر», - دەدى دەپارتامەنتتىڭ باسقارما باسشىسى جاسۇلان شىنتاسوۆ.
مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا قولعا الىنعان جوباعا وبلىس اكىمدىگى مەن قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ وبلىستىق فيليالى قولداۋ ءبىلدىردى.
العاشقى كەزەكتە اكادەميانىڭ وبلىستىق فيليالىندا قايتا دايارلاۋ كۋرستارى مەن بىلىكتىلىگىن ارتتىرۋ سەمينارلارىنان ءوتىپ جاتقان تىڭداۋشىلارعا ءدارىس وقىلادى. بيىلعى جىلى فيليال بازاسىندا 500-دەن استام مەملەكەتتىك قىزمەتشى ءبىلىمىن جەتىلدىرەدى دەپ جوسپارلانىپ وتىر.
العاشقى ءدارىستى كاسىپكەرلىك جانە تۋريزم, ىشكى ساياسات باسقارمالارىنىڭ باسشىلارى وتكىزدى. الداعى ۋاقىتتا اۋدان جانە اۋىلدىق وكرۋگ اكىمدىكتەرىنىڭ قىزمەتشىلەرىنە ونلاين فورماتتا ءدارىس وقۋ جوسپارلانۋدا.
بۇگىنگى تاڭدا قىزىلوردا وبلىسىندا 3675 مەملەكەتتىك قىزمەتشى جۇمىس ىستەيدى. ونىڭ ىشىندە, 14 ساياسي, 1 «ا» كورپۋسىنىڭ قىزمەتشىسى, 3660 - «ب» كورپۋسىنىڭ مەملەكەتتىك اكىمشىلىك قىزمەتشىلەرى بار.
