ءبىرىنشىسى, اكىمدىكتەردىڭ ءبىلىم بەرۋ سالاسىنداعى فۋنكتسيالارى وبلىستىق دەڭگەيگە بەرىلەدى. بۇرىن جەرگىلىكتى جەردەگى اۋدان اكىمدەرى ءبولىم باسشىلارىن تاعايىنداپ كەلسە, ەندى ونى باسقارما ىسكە اسىرادى. ەكىنشىسى, قاڭتار ايىنان باستاپ, سالانى قارجىلاندىرۋ وبلىستىق دەڭگەيگە وتۋدە. بارلىق ءبىلىم بەرۋ ۇيىمدارى باسقارمانىڭ ۆەرتيكالدى باسقارۋ جۇيەسىنە كوشەدى, ياعني, اۋداندىق جانە قالالىق ءبىلىم بەرۋ بولىمدەرىن قارجىلاندىرۋ جانە باسقارۋ قۇزىرەتى وبلىستىق ءبىلىم بەرۋ باسقارمالارىنا بەرىلەدى.
وتكەن جىلى ءبىلىم باسقارماسىنىڭ بيۋدجەتى 59 ملرد تەڭگە بولسا, ۆەرتيكالدى باسقارۋ جۇيەسى ارقىلى بيىلعى قارجى 173,3 ملرد تەڭگەنى قۇرادى.
جيىندا وسى جىلدىڭ العاشقى ۇبت سىناعى تۋرالى دا ايتىلدى. بيىلعى تالاپكەرلەردىڭ باسىم بولىگى وتكەن ايدا تەستىلەۋگە قاتىسقان. ايتا كەتۋ كەرەك, قاڭتار ايىنداعى تەست ناتيجەسى تەك اقىلى تۇردە ءبىلىم الۋعا جارامدى. وبلىس بويىنشا بۇل سىناقتى 7002 ءبىتىرۋشىنىڭ 5832-ءسى تاپسىردى. وسى جولى 100 بالدان اسىرعان بىتىرۋشىلەر سانى – 409 بولسا, 815 ءبىتىرۋشى شەكتى بالدى جيناي الماعان.
بيىل ۇلتتىق بىرىڭعاي تەستىلەۋدى وتكىزۋ ەلەكتروندى فورماتقا اۋىستىرۋ جوسپارلانىپ وتىر. تۇلەكتەر مەملەكەتتىك گرانت الۋ ءۇشىن ناۋرىز-ماۋسىم ارالىعىندا ۇلتتىق تەست تاپسىرادى.
