«وزدەرىڭىزگە ءمالىم, جاڭارتىلاتىن ەنەرگيا كوزدەرىنىڭ ەڭ كەڭ تارالعانى – كۇن مەن جەل ەنەرگياسىن ءوندىرۋ اۋا رايىنىڭ وزگەرۋىنە بايلانىستى. بۇل ءوندىرۋ قۋاتىنىڭ تۇراقسىز بولۋىنا اكەلەدى جانە قازاقستاننىڭ بىرىڭعاي ەنەرگيا جۇيەسىنىڭ ورنىقتىلىعىنا اسەر ەتەدى. وسىعان وراي, ەنەرگەتيكا مينيسترلىگىنە ەكولوگيا مينيسترلىگىمەن جانە «KEGOC» اكتسيونەرلىك قوعامىمەن بىرلەسىپ, ەلەكتر ەنەرگياسىنىڭ تۇراقتى ءوندىرىسىن دامىتۋ بويىنشا ۇسىنىستار ەنگىزۋدى جانە جاڭارتىلاتىن ەنەرگيا كوزدەرىن جيناقتاۋ قويمالارىن ەنگىزۋ ماسەلەسىن پىسىقتاۋدى تاپسىرامىن», دەدى ۇكىمەت باسشىسى.
ونىڭ ايتۋىنشا, قازىرگى كەزدە جاڭارتىلاتىن ەنەرگيا كوزدەرى وبەكتىلەرىنىڭ شاعىن توراپتىق ايماقتارىن جاساۋ ۇلگىلەرى بار, مۇندا ءبىر ايماقتا بىرنەشە وبەكتى ىسكە اسىرىلادى. وسىعان بايلانىستى ەنەرگەتيكا مينيسترلىگىنە اكىمدىكتەرمەن بىرلەسىپ, جاڭارتىلاتىن ەنەرگيا كوزدەرىنىڭ وڭىرلىك ايماقتارىن قۇرۋ ماسەلەسىن پىسىقتاۋ تاپسىرىلدى.
«گاز ەلەكتر ستانتسيالارىن ىسكە قوسۋ جاڭارتىلاتىن ەنەرگيا كوزدەرىنىڭ قوسىمشا كولەمىن ينتەگراتسيالاۋ بويىنشا ەنەرگيا جۇيەسى مۇمكىندىكتەرىن ۇلعايتۋعا مۇمكىندىك بەرەدى. سوندىقتان ەنەرگەتيكا مينيسترلىگىنە «KEGOC» اكتسيونەرلىك قوعامىمەن بىرلەسىپ, 2022 جىلدان باستاپ ناقتى ۋاقىت رەجيمىندە تەڭگەرىمدى نارىقتى ىسكە اسىرۋ جۇمىسىن جۇرگىزۋدى تاپسىرامىن. وسى شارالاردى ىسكە اسىرۋدىڭ ناتيجەسىندە جاڭارتىلاتىن ەنەرگيا كوزدەرىنىڭ تۇراقتى نارىعىن دامىتۋعا قاجەت جاعداي جاسالىنادى جانە وعان نەگىز بولادى», دەدى اسقار مامين.
