– كوپ ساتىلى كوماندالىق-شتابتىق جاتتىعۋلارعا ءار دەڭگەيدەگى شتابتار قاتىسادى. قۇرلىق اسكەرلەرى, وڭىرلىك قولباسشىلىقتار مەن اسكەري بولىمدەر دەڭگەيىندە تاجىريبەلىك جۇمىستار جۇرگىزىلەدى. باستى ماقسات – الىس قاشىقتىقتا ورنالاسقان باسقارۋ ورگاندارىنىڭ اراسىندا زاماناۋي تەحنيكالىق بايلانىس قۇرالدارى كومەگىمەن اقپارات الماسۋ, – دەيدى «باتىس» وڭىرلىك قولباسشىلىعىنا قاراستى جەدەل باسقارمانىڭ باستىعى, پولكوۆنيك تالعات كەنجەتاەۆ.
ونىڭ ايتۋىنشا, كوماندالىق-شتابتىق جاتتىعۋلار – كومانديرلەردىڭ, شتابتار مەن كوماندالىق-باسقارۋ قىزمەتتەرىنىڭ بىرلەسكەن جاتتىعۋىنىڭ ءبىر ءتۇرى. مۇنداي وقۋ-جاتتىعۋلار كەزىندە اسكەري ءىستى جەتىلدىرۋدىڭ جاڭا تۇرلەرى زەرتتەلىپ, باعىنىستى بولىمشەلەرگە باسشىلىق ەتۋدىڭ جەتىلدىرىلگەن ادىستەرى سارالانادى. ماسەلەن, بارلاۋشىلار – اسكەريلەردىڭ كوزى مەن قۇلاعى. سوندىقتان ولاردىڭ دايىندىعى وتە كۇردەلى, اۋىر ءارى قىزىقتى احۋالدارعا تولى بولادى.
«باتىس» وڭىرلىك قولباسشىلىعىنىڭ وقۋ پوليگوندارىندا بارلاۋشىلار توبى جاۋىنگەرلىك اتىستى ورىنداپ, قوسىمشا ىزدەۋ, رەيد پەن تورۋىلداۋ جۇرگىزۋدى پىسىقتادى. بارلاۋ بولىمشەلەرى كۇندىزگى جانە تۇنگى ۋاقىتتا شتاتتىق قارۋدان جاۋىنگەرلىك اتۋدى جۇرگىزدى. سونىڭ ىشىندە وتكەن جىلدىڭ كۇزىندە شاقىرىلعان مەرزىمدى قىزمەتتەگى ساربازدار العاش رەت بولىمشەلەر مەن توپتاردىڭ قۇرامىندا تاجىريبەلىك بارلاۋ جاتتىعۋلارىنا قاتىستى.
بارلاۋشىلاردىڭ جاۋىنگەرلىك اتىستارى زاماناۋي ۇرىستارعا بارىنشا ۇقساس جاعدايدا ۇيىمداستىرىلدى. جەكە قۇرام قورعانىستا, شابۋىلدا, سونداي-اق جورىقتا ارەكەت ەتۋ قابىلەتىن شىڭدادى. جاۋىنگەرلىك اتىس كەزىندە كومانديرلەردىڭ دەڭگەيىن تەكسەرۋگە, تەز وزگەرەتىن ورتادا باعىنىشتىلاردى باسقارۋعا ەرەكشە نازار اۋدارىلدى. بولىمشەلەر اسەري تاپسىرمالاردى نەگىزگى كۇشتەردەن الىس جەردە شاعىن توپتار قۇرامىمەن ورىنداۋدى ۇيرەندى.
– جاۋىنگەرلىك اتىس – جەكە قۇرامنىڭ جاۋىنگەرلىك ۇيلەستىرۋ مەن اتىستى دايارلاۋدىڭ سوڭعى كەزەڭى بولىپ تابىلاتىن تاكتيكالىق دايىندىقتىڭ ەڭ جوعارى فورماسى. اتىستى جۇرگىزۋ ءۇشىن شتاتتىق, سونىمەن بىرگە بەكىتىلگەن بولىمشەلەردىڭ بارلىق قارۋ تۇرىمەن جەردەگى جانە اۋەدەگى نىسانالاردى اتۋدى قامتاماسىز ەتەتىن ورتا جاسالدى, – دەيدى ارنايى بارلاۋ روتاسىنىڭ كومانديرى, كاپيتان قوبىلاندى ماراتوۆ.
سونداي-اق بارلاۋ بولىمشەلەرىنىڭ دالالىق جورىعى كەزىندە ولاردىڭ دەربەس جاعدايعا بەيىمدەلۋى مەن كەدەرگىلەر جولاعىنان ءوتۋى, اتىس جاتتىعۋلارىنىڭ نورماتيۆتەرىن ورىنداۋى ەرەكشە قاداعالاندى. بارلاۋشىلاردىڭ پايىمداۋىنشا, تاكتيكالىق دايىندىقتىڭ بۇل كەزەڭى ولاردىڭ ءوزارا ۇيلەسىمدىلىگىن جاقسارتىپ, جەكە قۇرامنىڭ اتىس دايىندىعىن ارتتىرۋعا زور سەپتىگىن تيگىزەدى.
«باتىس» وڭىرلىك قولباسشىلىعىندا مۇنداي جاۋىنگەرلىك دايىندىق باعدارلاماسى اسكەري بايلانىسشىلار ءۇشىن دە وتكىزىلدى. بايلانىسشىلار شتاتتىق تەحنيكالاردا نورماتيۆتەر مەن تاپسىرمالاردى ورىنداۋدى تاعى ءبىر رەت تياناقتادى. مۇنداي ارنايى تاكتيكالىق دايىندىق اسكەريلەردى وقىتۋ مەن دالالىق ماشىعىن ارتتىراتىن نەگىزگى ءپان دەۋگە بولادى. ويتكەنى اسكەري بولىمشەلەردەگى جەكە قۇرامنىڭ (ەكيپاج) ۇرىس جاعدايىنىڭ ءار كەزەڭىندە بايلانىس قۇرالدارىن ورنالاستىرۋى ءۇشىن ۇيلەسىمدى ءارى تياناقتى ءىس-ارەكەتتەردى كەشەندى تۇردە پىسىقتاۋعا مۇمكىندىك بەرەدى. ال تۇراقتى ورنالاستىرۋ پۋنكتتەرىندەگى تاجىريبەلىك جاتتىعۋلاردا اسكەري بايلانىسشىلار روتا كومانديرلەرىنىڭ باسشىلىعىمەن بايلانىس قۇرالدارىنىڭ جالپى قۇرامىن, ستانسالار مەن اپپاراتۋرالاردى قۇرۋدى, بايلانىس ورناتۋدى زەردەلەيدى. سونداي-اق اسكەرلەر مەن قىزمەت باستىقتارىنىڭ راديو جەلىسىندە راديوترەنينگتەر وتكىزەدى.
– ارنايى تاكتيكالىق دايىندىق كەزىندە جەكە قۇرام شتاتتىق راديوستانسالار مەن اپپاراتۋرالاردا تاپسىرمالاردى ورىندادى. سەبەبى ءار ەكيپاج – بەلگىلى ءبىر اۋماقتا جوعارى شتابتىڭ تاپسىرماسىن جەكە ورىنداي الاتىن جاۋىنگەرلىك بىرلىك. سوندىقتان دايىندىقتى جوعارى دەڭگەيدە وتكىزۋدىڭ ماڭىزى زور, – دەدى راديوتاراتۋ كومانديرى, لەيتەنانت ادىلەت قۇرماشەۆ.
ەندى الداعى تاكتيكالىق-جاۋىنگەرلىك دايىندىق كەزەڭىندە اسكەري بايلانىسشىلاردىڭ شەبەرلىگىن بولىمشە مەن ەكيپاجدار قۇرامىندا بىرىڭعاي نورماتيۆتەر بويىنشا باعالاۋ كوزدەلىپ وتىر. كەيىن جاۋىنگەرلىك دايارلىق ۆزۆود قۇرامىندا جالعاسادى. كومانديرلەردىڭ پىكىرىنشە, اسكەري بايلانىسشىلار ۇنەمى جوعارى جاۋىنگەرلىك دايىندىقتا بولۋى كەرەك. ويتكەنى ەل قورعانى سانالاتىن قۋاتتى اسكەر ءۇشىن بارلىق دەڭگەيدەگى اقپاراتتى قابىلداۋ مەن تاراتۋ بايلانىسشىلارعا جۇكتەلىپ وتىر.
اتىراۋ وبلىسى
