اقتاۋدا ونىڭ جاڭا قوندىرعىسى ىسكە قوسىلدى
ماڭعىستاۋ تۋرالى «تەڭىزدىڭ جاعاسىندا وتىرىپ, سۋعا جارىمايسىڭدار» دەپ ءازىل-شىنى ارالاس قاعىتىپ قالادى كورشى ايماقتاعىلار. راس-اق. اعىن سۋ ەمەس, توستاعانعا تۇنعان كوجەدەي توماعا-تۇيىق بولعاندىقتان, تۇزدىلىعى وتە جوعارى تەڭىز سۋىن تۇششىتىپ كادەگە جاراتۋ كەرەك. ال بۇل – ۇلكەن جۇمىس. اقتاۋدا وسى جۇمىستى «ماەك-قازاتومونەركاسىپ» جشس موينىنا العان.
اقتاۋدا ونىڭ جاڭا قوندىرعىسى ىسكە قوسىلدى
ماڭعىستاۋ تۋرالى «تەڭىزدىڭ جاعاسىندا وتىرىپ, سۋعا جارىمايسىڭدار» دەپ ءازىل-شىنى ارالاس قاعىتىپ قالادى كورشى ايماقتاعىلار. راس-اق. اعىن سۋ ەمەس, توستاعانعا تۇنعان كوجەدەي توماعا-تۇيىق بولعاندىقتان, تۇزدىلىعى وتە جوعارى تەڭىز سۋىن تۇششىتىپ كادەگە جاراتۋ كەرەك. ال بۇل – ۇلكەن جۇمىس. اقتاۋدا وسى جۇمىستى «ماەك-قازاتومونەركاسىپ» جشس موينىنا العان.
ماڭعىستاۋدا «ماەك» مەكەمەسىنىڭ مارتەبەسى زور, ويتكەنى, اۋىز سۋدان بولەك تۇرمىسقا قاجەتتى ىستىق جانە سۋىق سۋىن ايىرىپ, جىلۋ جانە جارىقپەن قامتاماسىز ەتەتىن مەكەمەنى بىلمەگەندە شە؟! «دۇنيەنى نۇرلاندىرا تۇسەيىك» دەپ ۇرانداتاتىن ماڭعىستاۋلىق «ماەك-ءتىڭ» ەمحاناسى دا ەلگە ماقتاۋلى. ءوز قىزمەتكەرلەرىن الدىمەن قابىلدايتىن ەمحانادا ۇزاق-سونار كەزەك كۇتەتىن تۇرعىندار, مۇندا ەڭ باستىسى, بىلىكتى دارىگەرلەردىڭ بارىنا شۇكىر ەتەدى.
قازىرگى تاڭدا 4 مىڭنان استام ادامدى جۇمىسپەن قامتىپ وتىرعان كاسىپورىندا سۋ تۇششىتاتىن قوندىرعىلار كونەرگەندىكتەن, ولاردى جاڭامەن اۋىستىرۋ ماسەلەسى وزەكتىلىككە يە بولاتىن. وسىدان ونشاقتى جىل بۇرىن پايدالانۋعا بەرىلگەن قوندىرعىلار ەسكىرۋمەن بىرگە, تۇرعىندار سانى ول جىلدارداعىدان الدەقايدا ارتقان ايماقتىڭ قاجەتىن وتەۋگە قاۋقار-قۋات جاعىنان قينالىپ تا قالاتىن. جۇمىس ىستەپ تۇرعان 7 قوندىرعىنىڭ ەڭ جاڭاسى وسىدان بەس جىل بۇرىن قولدانىسقا ەنگىزىلگەن ەكەن. ەگەر سۋ تۇششىتۋ قوندىرعىلارى جاڭارسا, تۇشىتىلاتىن سۋ كولەمىن دە, ونىڭ ساپاسىن دا ارتتىرۋعا بولاتىندىعىن ايتاتىن ماماندار. جاقسى وي ۇلىق مەرەكەگە وراي وڭعارىلدى. تاۋەلسىزدىك مەرەكەسى قارساڭىندا «قازاتومونەركاسىپ» ۇاك» اق باسقارما توراعاسى ۆ.شكولنيك ماڭعىستاۋعا كەلىپ, «ماەك-تەگى» قوس قۋانىشتىڭ باسى-قاسىندا بولدى.
ايماق باسشىسى ا.ايدارباەۆ جانە «قازاتومونەركاسىپ» ۇاك» اق باسقارما توراعاسى ۆ.شكولنيك جاڭادان سۋ تۇششىتۋ قوندىرعىسىن ىسكە قوسۋ سالتاناتىنا قاتىستى. سۋ تۇششىتۋ سالاسىنداعى جاڭا ۇلگى سانالاتىن كولبەۋ تۇتىكتى پلەنكالىق بۋلاندىرعىشپەن جابدىقتالعان قوندىرعى فرانتسيانىڭ «SIDEM» كومپانياسىندا جاسالعان. كاسپي تەڭىزىنىڭ اششى سۋىن «ماەك-ءتىڭ» سۇزگىسىنەن وتكىزىپ, اۋىز سۋ رەتىندە تۇتىناتىن تۇرعىندار ساپالى سۋعا قول جەتكىزەدى دەگەن ءۇمىت بار.
كاسىپورىنداعى ەكىنشى جاڭالىق – «ماەك-قازاتومونەركاسىپ» جشس-نىڭ جوندەۋدەن وتكەن دارىگەرلىك-سانيتارلىق ءبولىمىنىڭ ىسكە قوسىلۋى بولدى. ءبىر اۋىسىمدا 150 ادامدى قابىلداي الاتىن ەمحانادا 79 دارىگەر قىزمەت ەتەدى. جاتىپ ەم الامىن دەۋشىلەرگە 20 توسەكتىك ورىن دا بار. جوندەلگەن جاڭا ەمحانانىڭ مەرەيى دارىگەرلەردىڭ ساپالى قىزمەت كورسەتۋىمەن اسقاقتاي تۇسسە دەيمىز.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتەردى تۇسىرگەن سەرىك مايەمەروۆ.
