– قازىر جوعارى ءبىلىمدى ماماندارعا قويىلاتىن تالاپ كۇشەيدى. اسىرەسە قايتا دايارلاۋ ماسەلەسى, جاڭا تەحنولوگيالاردى مەڭگەرۋ ماڭىزدى بولىپ وتىر. «Total energy school» مەكتەبى ۇيىمداستىراتىن كۋرستار وسى ماسەلەلەردى شەشۋگە سەپتىگىن تيگىزەدى. بۇعان دەيىن نازارباەۆ ۋنيۆەرسيتەتى مەن ءال-فارابي اتىنداعى قازۇۋ-دە وتكەن كۋرستار تيىمدىلىگىن كورسەتتى. س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە ەكى اپتادا 350 ادام وسى كۋرسقا قاتىسىپ, ءبىلىمىن جەتىلدىرەدى. بۇل جاستاردىڭ عىلىم-بىلىمگە دەگەن قۇلشىنىسىن ارتتىرىپ, بولاشاعىنا سەنىم مەن سەرپىن بەرەدى, – دەدى ەنەرگەتيكا ءمينيسترى نۇرلان نوعاەۆ.
ۋنيۆەرسيتەت رەكتورى گۇلزادا شاكۋليكوۆانىڭ ايتۋىنشا, تومەن كومىرتەكتى ەنەرگەتيكا سالاسىنىڭ كوشباسشىسى اتانىپ وتىرعان «Total energy school» الەمدەگى ەڭ ۇزدىك ەنەرگەتيكالىق كومپانيالاردىڭ جۇمىسىن تەك تەوريالىق تۇرعىدا ەمەس, ءىس جۇزىندە زەرتتەۋگە مۇمكىندىك بەرىپ وتىر. «Total» پروفەسسورلار قاۋىمداستىعى باكالاۆريات پەن ماگيستراتۋرادا ءبىلىم الاتىن ستۋدەنتتەرگە, پروفەسسور-وقىتۋشىلار قۇرامىنا مۇناي-گاز, مۇناي-حيميا, ەنەرگەتيكا جانە قورشاعان ورتا پاندەرىنەن كۋرستار ۇيىمداستىرادى.
– بۇل تاجىريبە ستۋدەنتتەردىڭ بولاشاقتا جۇمىسقا ورنالاسۋىنا داڭعىل جول اشادى. دارىستەردى «Total» ماماندارى كاسىبي ساراپتاما مەن ناقتى ءىس-تاجىريبەدەگى مىسالداردى زەردەلەۋ نەگىزىندە دايىنداپ وتىر. ءبىز ىنتىماقتاستىقتى تەك مۇناي-گاز سەكتورىندا عانا ەمەس, بولاشاعى زور جاڭعىرمالى ەنەرگيا كوزدەرى سالاسىندا دا جالعاستىرۋعا, بىرلەسكەن جوبالاردى دامىتۋعا نيەتتىمىز, – دەدى گۇلزادا شاكۋليكوۆا.
جاقىندا اتالعان ۋنيۆەرسيتەتتە بەلسەندى ترانسفورماتسيالاۋ اياسىندا ءبىلىم بەرۋ پروتسەسىنە تاعى ءبىر ۇزدىك تاجىريبە ەنگىزىلدى. بۇل جولى ەنەرگەتيكا سەكتورىن كاسىبي ماماندارمەن قامتۋ ءۇشىن مۆا باعدارلاماسى اشىلدى. رەكتور گۇلزادا شاكۋليكوۆانىڭ پىكىرىنشە, بۇل باعدارلاما تەك ءوڭىردىڭ عانا ەمەس, ەلىمىزدىڭ يندۋسترياسىنا ۇلتتىق كادرلاردى دايارلاۋعا ىقپال ەتەدى. ويتكەنى كوشباسشى ماماندى تەك ۇزدىكسىز كاسىبي جانە جەكە دامۋ عانا ەرەكشەلەيدى. سول سەبەپتەن مۆا باعدارلاماسى مانسابىن ودان ءارى جوعارىلاتۋدى, سونداي-اق قوعامنىڭ دامۋىنا ۇلەسىن قوسۋدى كوزدەيتىن كوشباسشىلارعا ارنالىپ وتىر.
– كەز كەلگەن مەملەكەتتىڭ دامۋىنىڭ نەگىزى – ءبىلىم مەن عىلىمدى جەتىلدىرۋ. بۇعان ءبىزدىڭ ۋنيۆەرسيتەتتەگى مۆا باعدارلاماسىنىڭ قوسار ۇلەسى زور بولماق. مۇندا ءدارىس بەرەتىن قازاقستاندىق جانە شەتەلدىك ءىرى كومپانيالاردىڭ تاجىريبەلى وقىتۋشىلارى مەن تانىمال ساراپشىلارى مودۋلدىك نىسانداعى جۇمىستان قول ۇزبەي وقىتۋدى, شەتەلدىك تاعىلىمدامانى, كوممۋنيكاتسيالىق مۇمكىندىكتى كەڭەيتۋدى كوزدەيدى, – دەدى گ.شاكۋليكوۆا.
اتىراۋ وبلىسى
